បក្សប្រឆាំង ស្នើឲ្យ រដ្ឋាភិបាល បញ្ឈប់ជាបន្ទាន់ នូវការប្រើអំពើ ហិង្សា លើប្រជាពលរដ្ឋ ស្លូតត្រង់
ដោយ៖ ថុល ស្រីលក្ខណ៍ / វិទ្យុវីអូឌី | ថ្ងៃសុក្រ ទី3 ខែមករា ឆ្នាំ2014
គណបក្សសង្គ្រោះជាតិ ស្នើឲ្យគណបក្សប្រជាជនកម្ពុជា ដែលដឹកនាំដោយលោកនាយករដ្ឋមន្ត្រី ហ៊ុន សែន បញ្ឈប់ជាបន្ទាន់ នូវការប្រើកម្លាំងប្រដាប់អាវុធបាញ់បង្ក្រាប លើកម្មករ និងប្រជាពលរដ្ឋខ្មែរស្លូតត្រង់ នៅសួនកាណាឌីយ៉ា រាជធានីភ្នំពេញ ខណៈពួកគេធ្វើបាតុកម្មអហិង្សាទាមទារប្រាក់ឈ្នួល១៦០ដុល្លារ។
សេចក្តីថ្លែងការណ៍របស់គណបក្សសង្គ្រោះជាតិនៅថ្ងៃទី៣ ខែមករា ឆ្នាំ២០១៤នេះ បានថ្កោលទោសយ៉ាងដាច់អហិង្សា ចំពោះការបង្ក្រាបដោយប្រើកងកម្លាំងប្រដាប់អាវុធ បាញ់បង្ក្រាប បណ្តាលឲ្យមានមនុស្សស្លាប់ និងរបួសនៅថ្ងៃនេះ។ សេចក្តីថ្លែងការណ៍ដដែលបាន ហៅការបង្ក្រាបនេះថា ជាអំពើឃោរឃៅ ព្រៃផ្សៃ ទៅលើកម្មករ និងប្រជាពលរដ្ឋស្លូតត្រង់ដោយគ្រាន់តែតវ៉ាទាមទារប្រាក់ឈ្នួលដោយសន្តិវិធី ដើម្បីទាមទារដំឡើងប្រាក់ខែ សម្រាប់ចិញ្ចឹមជីវិត។
សេចក្តីថ្លែងការណ៍ព្រមានថា ក្នុងនាមជាពលរដ្ឋខ្មែរនឹងមិនឈរអោបដៃស្ងៀម មើលអ្នកមានអំណាចប្រើប្រាស់អំពើឃោរឃៅ ទៅលើប្រជាពលរដ្ឋនោះទេ។ គណបក្សនេះ បានអំពាវនាវ ដល់សហគមន៍អន្តរជាតិ ជួយតាមដានឃ្លាំមើល និងជួយអន្តរាគមន៍ ទប់ស្កាត់បញ្ហានេះ។
នៅក្នុងហេតុការណ៍ប៉ះទង្គិច គ្នារវាងកម្មករនិងកងសមត្ថកិច្ច នៅព្រឹកថ្ងៃសុកនេះ នៅលើកំណាត់ផ្លូវវេងស្រេង រាជធានីភ្នំពេញ មានសេចក្ដីរាយកាណ៍ថា កម្មករស្លាប់បីនាក់ និងរងបួស ជិត៣០នាក់៕
No comments:
Post a Comment