តុលាការក្រុង សម្រេច ឃុំមនុស្ស ១៣នាក់ ដែលចាប់ នៅផ្លូវវ៉េងស្រេង បណ្ដោះអាសន្ន
រថយន្តប៉ូលិសដឹកជនសង្ស័យដែលប៉ូលិសចាប់នៅតំបន់ផ្លូវវ៉េងស្រេង ចេញពីសាលាដំបូងរាជធានីភ្នំពេញ នៅថ្ងៃទី៤ ខែមករា ឆ្នាំ២០១៤។
RFA/Ouk Savborey
មនុស្សចំនួន ១៣នាក់ ភាគច្រើនជាកម្មករដែលអាជ្ញាធរភ្នំពេញ បានចាប់ចងដៃ និងធ្វើទារុណកម្មនៅផ្លូវវ៉េងស្រេង ក្នុងបាតុកម្មទាមទារប្រាក់ឈ្នួលអប្បបរមា ១៦០ដុល្លារក្នុង១ខែ ត្រូវតុលាការសាលាដំបូងរាជធានីភ្នំពេញ ឃុំខ្លួនបណ្ដោះអាសន្ន ដោយចោទពីបទបង្កហិង្សា និងបំផ្លិចបំផ្លាញទ្រព្យសម្បត្តិដោយចេតនា។
ក្រុមគ្រួសារដែលមានប្ដី បង ក្មួយ មិត្តភក្ដិនៃអ្នកដែលរងនូវការចោទនោះ អះអាងថា តុលាការហាក់ធ្វើការចន្លោះផ្លូវច្បាប់ក្នុងការចោទប្រកាន់ ព្រោះមានអ្នកខ្លះកំពុងនៅក្នុងផ្ទះ មិនបានចូលរួមបាតុកម្ម តែក្រុមប្រដាប់អាវុធទៅចាប់ពីក្នុងបន្ទប់ជួលក្នុងភូមិត្រពាំងថ្លឹង យកមកចងដៃទៅក្រោយវាយធ្វើបាបបែកមុខមាត់។
យុវជនឈ្មោះ ប៉ាង ដួងលី ជាបុគ្គលិកក្រុមហ៊ុនកសិកម្មមួយ អះអាងថា បងប្រុសឈ្មោះ ប៉ាង វណ្ណី បានជួលផ្ទះស្នាក់នៅក្នុងភូមិត្រពាំងថ្លឹង មិនបានចូលរួមបាតុកម្មទេ តែក្រុមអាវុធហត្ថចូលចាប់ពីក្នុងផ្ទះជួលយកទៅចងដៃវាយកាលពីព្រឹកម៉ោង ៩ ថ្ងៃទី៣ ខែមករា៖ «ធ្វើការទម្លុះទ្វារ ធាក់ទ្វារ ច្រានទ្វារឡើងខ្ទេចខ្ទីចូលទៅចាប់គាត់។ ឥឡូវហ្នឹង ខ្ញុំសុំស្នើឲ្យអង្គការជួយសុំឲ្យបងសមត្ថកិច្ច គាត់ជួយដោះលែងបងខ្ញុំមកវិញផង បងខ្ញុំអត់មានខុសអីទេ»។
កម្មការិនីឈ្មោះ ម៉េង អាយ ឲ្យដឹងថា ប្តីគាត់ឈ្មោះ ហេង រ៉ាត់ ជាអ្នករត់ម៉ូតូឌុប មិនមែនជាកម្មករទេ ត្រូវអាជ្ញាធរចាប់កាលពីទៀបភ្លឺថ្ងៃទី៣ ខែមករា ឆ្នាំ២០១៤។ នៅព្រឹកថ្ងៃទី៤ ខែមករា ប្ដីគាត់ត្រូវប៉ូលិសក្រុងបញ្ជូនមកតុលាការសាលាដំបូងរាជធានីភ្នំពេញ។ គាត់ចង់ជួបមុខប្ដីណាស់ ប៉ុន្តែតុលាការបានបញ្ជូនប្ដីគាត់ទៅឃុំខ្លួនមិនបានឃើញមុខ និងមិនដឹងឃុំនៅទីណា៖ «គាត់អ្នករត់ម៉ូតូឌុបទេ គាត់មិនមែនកម្មករទេ គាត់ឃើញគេបាតុកម្ម គាត់ឈរទៅមើលគេ ហើយដល់ពេលនោះ គេចាប់គាត់ទៅ»។
ក្រុមជាមិត្តភក្ដិបុរសឈ្មោះ សារ៉ាត់ ដែលធ្វើការនៅក្លិបកម្សាន្ត ឲ្យដឹងថា សារ៉ាត់ មិនបានចូលរួមបាតុកម្មទេ គាត់កំពុងនៅក្នុងផ្ទះជាមួយភរិយា ដែលទើបតែសម្រាលកូន ស្រាប់តែអាជ្ញាធរចាប់ពីក្នុងផ្ទះមកចងដៃវាយអោយសន្លប់ កាលពីយប់ថ្ងៃទី៣ ខែមករា។ ពួកគេសុំឲ្យតុលាការដោះលែង ព្រោះបុរសឈ្មោះ សារ៉ាត់ នេះជាអ្នកយាមម៉ូតូនៅក្លិបជាមួយពួកគេ មិនមែនបាតុករទេ៖ «ដោយសារប្រពន្ធគាត់កូនខ្ចីទើបឆ្លងបាន១ខែ អ៊ីចឹងគាត់ត្រូវសម្រាកដើម្បីទៅមើលផ្ទះប្រពន្ធគាត់នៅទីហ្នឹង។ ដល់ពេលកំពុងសម្រាកមិនទាន់បានប្រហែល ២ម៉ោងផង ក៏ខាងកងកម្លាំងហ្នឹងចុះបង្ក្រាប ទៅក៏ចាប់គាត់ទាញចេញមក ធាក់បន្ទប់ធាក់អីចេញមក យកគាត់មកអ៊ីចឹង»។
បុរសឈ្មោះ អឹម រ៉ន ឲ្យដឹងថា ក្មួយប្រុសគាត់ឈ្មោះ រី ស៊ីនួន កម្មកររោងចក្រតម្បាញ សីន លាន ត្រូវបានចាប់ខ្លួនកាលពីទៀបភ្លឺថ្ងៃទី៣ ខែមករា។ គាត់បានសួរស្នងការរាជធានី ទើបដឹងថាជាប់ឃុំ១យប់ ទើបបញ្ជូនមកតុលាការសាលាដំបូងភ្នំពេញ នៅព្រឹកថ្ងៃទី៤ ខែមករា៖ «ព្រោះវាចេញមក៣នាក់ បងប្អូនកាន់ដៃគ្នា។ ដល់ពេលចេញមកហ្នឹង ទទួលគេផ្អើលឈូរមកហ្នឹង វារបូតដៃពីបងប្អូនវាទៅ វាចេញតែវា គេចាប់មួយកំណាត់វាទៅ។ បាត់១ថ្ងៃ១យប់ បានដឹងដំណឹងថាគេចាប់»។
មន្ត្រីអង្គការលីកាដូ (Licadho) លោក អំ សំអាត ឲ្យដឹងថា ក្នុងចំណោម ១៣នាក់ ដែលត្រូវចាប់ខ្លួននោះ មានម្នាក់ជាអនីតិជន ដែលមេធាវីរបស់អង្គការនេះជួយការពារ។ លោក មឿន តុលា ឲ្យដឹងថា កម្មករ និងពលរដ្ឋទាំង ១៣នាក់ ត្រូវបានការពារដោយមេធាវីមកពីអង្គការចំនួន២ គឺអង្គការលីកាដូ និងអង្គការមជ្ឈមណ្ឌលអប់រំច្បាប់សម្រាប់សហគមន៍។ អ្នកទាំង ១៣នាក់នោះមានឈ្មោះ យ៉ន ជា អាយុ ១៧ឆ្នាំ ជា សារ៉ាត់ អាយុ ៣៤ឆ្នាំ ប៊ូ សារិត អាយុ ២៧ឆ្នាំ អ្នកទាំង៣ គឺមេធាវីអង្គការលីកាដូ ជួយការពារក្តី។ ចំណែកឯ ១០នាក់ទៀត គឺមេធាវីរបស់មជ្ឈមណ្ឌលអប់រំច្បាប់សម្រាប់សហគមន៍ការពារក្តី គឺមានឈ្មោះ ជឿន យ៉ុង អាយុ ២៣ឆ្នាំ ហេង រដ្ឋា អាយុ ២២ឆ្នាំ រី ស៊ីនួន អាយុ ១៨ឆ្នាំ ម៉ម ពិសិទ្ធ អាយុ ២៣ឆ្នាំ ណិប ស៊ីនួន អាយុ ២៣ឆ្នាំ ផាង ត្រេន អាយុ ២៤ឆ្នាំ ប៉ាង វណ្ណី អាយុ ៣៨ឆ្នាំ ភឿន ដា អាយុ ២៩ឆ្នាំ រស់ សុភ័ណ្ឌ អាយុ ២៥ឆ្នាំ និង ត្រោង សារ៉ាត់ អាយុ ២៦ឆ្នាំ។
អ្នកទាំង ១៣នាក់ ដែលតុលាការបានចោទប្រកាន់ក្រោយពីសាកសួរតាមការឲ្យដឹងពីសមត្ថកិច្ច សុំមិនបញ្ចេញឈ្មោះប្រាប់ថា បញ្ជូនទៅពន្ធនាគារនៅតាមខេត្ត ប៉ុន្តែមិនទាន់ដឹងថានៅពន្ធនាគារខេត្តពោធិ៍សាត់ ម៤ ឬពន្ធនាគារខេត្តកំពង់ចាម ម៣ នោះទេ។
ទន្ទឹមនោះដែរ ក្រុមគ្រួសារ លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ តំណាងសហជីព សកម្មជនដីធ្លី និងកម្មករ ៧នាក់ផ្សេងទៀត កំពុងព្រួយបារម្ភពីសុវត្ថិភាពរបស់ក្រុមគ្រួសារពួកគេ បន្ទាប់ពីតុលាការសាលាដំបូងរាជធានីភ្នំពេញ សម្រេចឃុំខ្លួនបណ្ដោះអាសន្នកាលពីរសៀលថ្ងៃទី៣ ខែមករា។ ពួកគេបានអះអាងថា ពុំមានព័ត៌មានថាតើអ្នកទាំងនោះត្រូវបញ្ជូនទៅទីណាពិតប្រាកដឡើយ ដ្បិតមិនមានវត្តមានអ្នកទាំង ១០នាក់នោះនៅក្នុងពន្ធនាគារ ម១ ឬព្រៃស នោះទេ។ ពួកគាត់សង្ស័យថា អ្នកទាំង ១០នាក់នោះអាចយកទៅឃុំនៅពន្ធនាគារ ម៤ ខេត្តពោធិ៍សាត់ ឬ ម៣ ខេត្តកំពង់ចាម។
ក្នុងថ្ងៃទី៤ ខែមករា នៅជុំវិញបរិវេណអគារតុលាការសាលាដំបូងរាជធានីភ្នំពេញ មិនមានវត្តមានបាតុករមកបិទផ្លូវទេ មានតែក្រុមគ្រួសារកម្មករ ១៣រូប ដែលរងនូវការចោទថ្មីនោះប៉ុណ្ណោះ៕
All Khmer have seen enough is enough ah Hun Sen beaten and killing innocent Khmer people as follow:
ReplyDeleteAh Hun Sen beaten monks.
Ah Hun Sen killed monks.
Ah Hun Sen beaten factories workers.
Ah Hun Sen killed factories workers.
Ah Hun Sen beaten men, women and children.
Ah Hun Sen killed men, women and children.
Ah Hun Sen sold the whole nation including Koh Trol , Angkor Wat and others to yuon Hanoi in change for Hun Sen and his family interests.
So we million Khmer as the victims of this so-called Hun Sen yuon puppet government must stick together and use every means to force Hun Sen to go and bring this criminal Hun Sen and his thugs to face ICC to seek justice for all Khmer and their families.