សមាជិកក្រុមប្រឹក្សាសង្កាត់បោះឆ្នោតជ្រើសរើសក្រុមប្រឹក្សារាជធានី ខេត្ត-ក្រុង ស្រុក-ខណ្ឌនៅស្ថានីយបោះឆ្នោតមួយកន្លែង
ក្នុងក្រុងភ្នំពេញនាថ្ងៃទី១៧ ឧសភា ២០០៩។
(RFA / Ouk Savborey)
គ.ជ.ប. អំពាវនាវ ដល់ បក្សនយោបាយ ត្រៀមចុះបញ្ជី បោះឆ្នោត ក្រុមប្រឹក្សា អាណត្តិទី២
គណៈកម្មាធិការជាតិ រៀបចំ ការបោះឆ្នោត (គ.ជ.ប) បានឲ្យដឹងថា ពេលវេលា ចុះបញ្ជី ឈ្មោះគណបក្ស និងបេក្ខជន សម្រាប់ការបោះឆ្នោត ជ្រើសរើស ក្រុមប្រឹក្សា រាជធានី ខេត្ត ក្រុង ស្រុក ខណ្ឌ អាណត្តិទី២ នឹងចាប់ផ្ដើម នៅបំណាច់ខែកុម្ភៈ នេះ។
ដោយ ដែន អយុធ្យា / អាស៊ីសេរី | ០៦ កុម្ភៈ ២០១៤
មន្ត្រី គ.ជ.ប បានស្នើដល់គ្រប់គណបក្សនយោបាយដែលមានបំណងចូលរួមប្រកួតប្រជែង ត្រូវត្រៀមឯកសារឲ្យបានគ្រប់ចំនួន និងត្រូវមកយកគំរូពាក្យស្នើសុំចុះបញ្ជីនេះនៅស្ថាប័នពាក់ព័ន្ធរបស់ គ.ជ.ប តាមម៉ោងធ្វើការ។
សេចក្តីជូនដំណឹងរបស់ គ.ជ.ប បានបង្ហាញថា កាលបរិច្ឆេទនៃការទទួលពាក្យចុះបញ្ជីគណបក្សនយោបាយចូលរួមឈរឈ្មោះបោះឆ្នោត និងការចុះបញ្ជីបេក្ខជនឈរឈ្មោះ សម្រាប់ការបោះឆ្នោតជ្រើសរើសក្រុមប្រឹក្សារាជធានីខេត្ត និងក្រុងស្រុកខណ្ឌអាណត្តិទី២ នឹងចាប់ផ្ដើមពីថ្ងៃទី២៧ ខែកុម្ភៈ ដល់ថ្ងៃទី៣ ខែមីនា ឆ្នាំ២០១៤។
ផ្ដើមពីបញ្ហានេះ មន្ត្រី គ.ជ.ប បានស្នើដល់គ្រប់គណបក្សនយោបាយទាំងអស់ ដែលបានចុះបញ្ជីទទួលស្គាល់ដោយក្រសួងមហាផ្ទៃ ហើយមានបំណងចូលរួមប្រកួតប្រជែងការបោះឆ្នោតនេះ ឲ្យត្រៀមឯកសារឲ្យបានគ្រប់ចំនួនជាមុន។
មន្ត្រី គ.ជ.ប ឲ្យដឹងថា តំណាងគណបក្សនយោបាយត្រូវទៅយកគំរូពាក្យស្នើសុំនៅស្ថាប័នពាក់ព័ន្ធរបស់ គ.ជ.ប តាមរាជធានីខេត្តនីមួយៗ។
លោកបណ្ឌិត ហង្ស ពុទ្ធា នាយកប្រតិបត្តិគណៈកម្មាធិការអព្យាក្រឹត ដើម្បីការបោះឆ្នោតដោយត្រឹមត្រូវ និងយុត្តិធម៌នៅកម្ពុជា ឬហៅកាត់ និកហ្វិច (Nicfec) បានស្នើដល់ស្ថាប័ន គ.ជ.ប ត្រូវរៀបចំឲ្យមានលក្ខណៈលទ្ធិប្រជាធិបតេយ្យ និងអនុវត្តទៅតាមច្បាប់បោះឆ្នោតឲ្យបានត្រឹមត្រូវ។ លោកថា ការបោះឆ្នោតនេះ ជាការបោះឆ្នោតអសកល ហើយអ្នកមានសិទ្ធិបោះឆ្នោត មិនមែនជាប្រជាពលរដ្ឋសាមញ្ញនោះទេ ប៉ុន្តែសមាសភាពមកពីសមាជិកក្រុមប្រឹក្សាឃុំសង្កាត់៖ «ខ្ញុំសូមលើកឡើងឲ្យការបោះឆ្នោតក្លាយទៅជាទម្លាប់នៃសង្គមប្រជាធិបតេយ្យ ហើយការបោះឆ្នោតត្រូវតែមានភាពល្អត្រឹមត្រូវ និងយុត្តិធម៌ ទើបមានការគាំទ្រពីប្រជាពលរដ្ឋ»។
កាលបរិច្ឆេទនៃការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក និងក្រុមប្រឹក្សាខណ្ឌ អាណត្តិទី២ នឹងចាប់ផ្ដើមនៅថ្ងៃទី១៨ ខែឧសភា ឆ្នាំ២០១៤។ ការបោះឆ្នោតនេះ សម្រាប់មន្ត្រីគណបក្សប្រជាជនកម្ពុជា និងគណបក្សសង្គ្រោះជាតិ បានត្រៀមលក្ខណៈរួចរាល់តែរៀងៗខ្លួន។
លោក យ៉ែម បុញ្ញឫទ្ធិ មន្ត្រីនាំពាក្យគណបក្សសង្គ្រោះជាតិ មានប្រសាសន៍នៅថ្ងៃព្រហស្បតិ៍ ទី៦ ខែកុម្ភៈ ថា ចំពោះការបោះឆ្នោតជ្រើសរើសក្រុមប្រឹក្សាអាណត្តិទី២ ដែលនឹងចាប់ផ្ដើមនៅខែឧសភា ខាងមុខ បក្សខ្លួនបានត្រៀមឯកសារសម្រាប់ចុះឈ្មោះគណបក្ស និងបេក្ខជនរួចហើយ៖«ដោយសារការបោះឆ្នោតនេះ ជាការបោះឆ្នោតអសកល យើងចូលរួម ហើយយើងនៅតែពិនិត្យទាមទារ ដើម្បីឲ្យមានកំណែទម្រង់បោះឆ្នោតដដែល»។
ដូចគ្នាដែរ លោក អ៊ក គីមហាន ប្រធាននាយកដ្ឋានបូកសរុបនៃខុទ្ទកាល័យគណៈកម្មាធិការកណ្ដាលគណបក្សប្រជាជនកម្ពុជា មានប្រសាសន៍ថា គណបក្សខ្លួនក៏បានត្រៀមឯកសារ ដើម្បីចុះបញ្ជីគណបក្ស និងបេក្ខជនសម្រាប់ការបោះឆ្នោតជ្រើសរើសសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២រួចហើយដែរ។ លោកប្ដេជ្ញាថា បក្សប្រជាជនកម្ពុជា នឹងអនុវត្តឲ្យស្របតាមច្បាប់បោះឆ្នោតដែលបានកំណត់៖ «គណបក្សប្រជាជនកម្ពុជា រស់នៅក្នុងសង្គមកម្ពុជា គឺធ្វើម៉េចអនុវត្តទៅតាមច្បាប់។ ទោះអ្នកណា ឬបក្សគេយល់ម៉េចយល់ទៅ គេចូលរួមបោះឆ្នោតក៏ចូលទៅ បើមិនចូលក៏ហីទៅ មិនដឹងធ្វើម៉េចដែរ អាហ្នឹងរឿងរបស់គេ»។
ច្បាប់ស្ដីពីការបោះឆ្នោតជ្រើសរើសក្រុមប្រឹក្សា ត្រង់មាត្រា២ បានចែងថា ក្រុមប្រឹក្សារាជធានី-ខេត្ត និងក្រុង ស្រុក ខណ្ឌ មានអាណត្តិ ៥ឆ្នាំ។ ហើយថា ក្រុមប្រឹក្សានេះនឹងត្រូវផុតកំណត់នៅពេលក្រុមប្រឹក្សាថ្មីចូលមកកាន់តំណែង។
ការបោះឆ្នោតជ្រើសរើសក្រុមប្រឹក្សារាជធានី-ខេត្ត និងក្រុមប្រឹក្សាក្រុង ស្រុក ខណ្ឌ លើកទី១ បានចាប់ផ្ដើមកាលពីថ្ងៃទី១៧ ខែឧសភា ឆ្នាំ២០០៩៕
No comments:
Post a Comment