សហជីព ការងារ អន្តរជាតិ ចំនួន៣ ទទូចសុំ មានការសាមគ្គីគ្នា ដើម្បីជំរុញ ដោះលែងសកម្មជន ២៣នាក់
ដោយ៖ នួន បូរិន / វីអូឌី | ថ្ងៃសុក្រ ទី7 ខែកុម្ភៈ ឆ្នាំ2014
សហជីពការងារអន្តរជាតិ ចំនួន៣ ដែលសហការជាមួយ សហភាពសហជីពកម្ពុជា បានទទូចសុំឲ្យមានការសាមគ្គីគ្នា នៅថ្ងៃទី១០ ខែកុម្ភៈ ដើម្បីជំរុញឲ្យមានការដោះលែងសកម្មជនសិទ្ធិមនុស្ស និងកម្មករ ចំនួន២៣ ដែលកំពុងឃុំខ្លួននៅ ពន្ធនាគារត្រពាំងផ្លុង ខេត្តកំពង់ចាម តាំងពីថ្ងៃទី២ និងទី២មករា។
នៅក្នុងលិខិតចំហ ដែលសហភាពសហជីពការងារ របស់លោក រ៉ុង ឈុន បានផ្សព្វផ្សាយបន្តពីលិខិតអំពាវនាវរបស់ សហព័ន្ធសហជីពអន្តរជាតិ (ITUC , IndusrialALL , និងUNI) ដោយបានរៀបរាប់ថា ត្រូវរួមគ្នាធ្វើការអំពាវនាវ ដល់សម្ព័ន្ធអង្គការដៃគូរបស់ខ្លួន ឲ្យចូលរួមនៅថ្ងៃទី១០កុម្ភៈ ដើម្បីរៀបចំសកម្មភាពតវ៉ានៅតាមស្ថានទូតនានានៅកម្ពុជា ដើម្បីឲ្យដោះលែង សកម្មជនសិទ្ធិមនុស្ស និងកម្មករ ទាំង២៣នាក់ ដែលកំពុងត្រូវបានឃុំខ្លួននៅពន្ធនាគារត្រពាំងផ្លុង ខេត្តកំពង់ចាម តាំងពីថ្ងៃទី២ និងទី២មករា។
លិខិតបានបន្តថា សម្ព័ន្ធការងារដែលមានសាខានៅក្នុងប្រទេសកម្ពុជា ត្រូវធ្វើលិខិតសុំណាត់ជួប ឯកអគ្គរដ្ឋទូត ដើម្បីលើកបញ្ហាសុំដោះលែងអ្នកទាំង២៣នេះ។ លិខិតដែលសុំឲ្យមានការសាមគ្គីគ្នា ដើម្បីជំរុញឲ្យមានការដោះលែងសកម្មជនសិទ្ធិមនុស្ស និងកម្មករ ចំនួន២៣នាក់ គឺមានចំណងជើងថា «ដោះលែងកម្មករទាំង២៣នាក់! គោរពសិទ្ធិកម្មករ!»។
សូមជម្រាបថា សកម្មជនសិទ្ធិមនុស្ស និងកម្មករ ទាំង២៣នាក់ ដែលត្រូវបានចាប់ខ្លួន យកទៅឃុំនៅមណ្ឌលអប់រំកែប្រែ ម៣ ឬពន្ធនាគារត្រពាំងផ្លុក ក្នុងខេត្តកំពង់ចាម បានកើតឡើង នៅអំឡុងការប៉ះទង្គិចគ្នា នៅតំបន់សេដ្ឋកិច្ចពិសេសភ្នំពេញ ខាងមុខរោងចក្រយ៉ាក ជីង ថ្ងៃទី២ មករា និងនៅមុខសួនឧស្សាហកម្មកាណាឌីយ៉ា កាលពីថ្ងៃទី៣ ខែមករា ដែលបណ្តាលឲ្យកម្មករ៥នាក់ស្លាប់ ជិត៤០នាក់រងរបួស។ សហគមន៍អន្តរជាតិ សង្គមស៊ីវិល និងគណបក្សប្រឆាំង បានហៅការឃុំខ្លួនលើមនុស្ស ២៣នាក់នេះថា ជាការបំពាន លើសិទ្ធិមនុស្ស យ៉ាងធ្ងន់ធ្ងរ៕
No comments:
Post a Comment