ក្រុមមេធាវី អ្នកជាប់ឃុំ ទាំង២១នាក់ បានដាក់បណ្តឹងសាទុក្ខ ទៅតុលាការកំពូល ហើយ
ដោយ៖ តាំង វីដា / វីអូឌី | ថ្ងៃពុធ ទី12 ខែកុម្ភៈ ឆ្នាំ2014
ក្រុមមេធាវី បានដាក់បណ្តឹងសាទុក្ខទៅតុលាការកំពូលហើយ កាលពីរសៀលថ្ងៃអង្គារម្សិលមិញ ប្រឆាំងនឹងសេចក្តីសម្រេចរបស់សាលាឧទ្ធរណ៍ ដែលបដិសេធបណ្តឹងសុំនៅក្រៅឃុំរបស់ជនជាប់ចោទ២១នាក់នោះ។
កាលពីថ្ងៃអង្គារម្សិលមិញ ប្រធានក្រុមប្រឹក្សាអង្គជំនុំជម្រះសាលាឧទ្ធរណ៍ លោក ឃុន លាងម៉េង បានបដិសេធបណ្តឹងសុំនៅក្រៅឃុំរបស់អ្នកទាំង២១នាក់ ដោយសម្រេចតម្កល់សេចក្តីសម្រេចរបស់សាលាដំបូងរាជធានីភ្នំពេញ ថាទុកជាបានការ។ ប្រធានក្រុមប្រឹក្សាអង្គជំនុំជម្រះសាលាឧទ្ធរណ៍ បានលើកហេតុផលថា ការដោះលែងនៅពេលនេះ អាចនាំឲ្យប៉ះពាល់ដល់សណ្តាប់ធ្នាប់សាធារណៈ ប៉ះពាល់ដំណើរការសវនការ និងដោយសារសំណុំរឿងនេះ កំពុងស្ថិតក្នុងនីតិវិធីស៊ើបអង្កេតនៅឡើយ។
សហមេធាវីការពារក្តីជនទាំង២១នាក់ លោក សំ សុគង់ មេធាវីមជ្ឈមណ្ឌលសិទ្ធិមនុស្សកម្ពុជា ឲ្យដឹងនៅព្រឹកថ្ងៃពុធនេះ ក្រោយការប្រកាសសេចក្តីរបស់សាលាឧទ្ធរណ៍ ក្រុមមេធាវី១០រូបរបស់អង្គការសង្គមស៊ីវិល និងសហជីព បានជួបពិភាក្សា និងសម្រេចដាក់បណ្តឹងសារទុក្ខទៅតុលាការកំពូល នៅម៉ោងជិត៣រសៀលម្សិលមិញនេះ ដោយយល់ឃើញថា ការសម្រេចនោះ មិនមានលក្ខណៈត្រឹមត្រូវទៅតាមមាត្រាច្បាប់ ក្នុងការសំអាងហេតុ។
លោក សំ សុគង់ ពន្យល់ថា មាត្រា ២០៣ និង២០៥ នៃក្រមនីតិវិធីព្រហ្មទណ្ឌ ដែលក្រុមមេធាវី ផ្តល់ជាអំណះអំណាង គឺជាគោលការណ៍ ជនជាប់ចោទ ត្រូវមានសេរីភាពមូលដ្ឋានពេញលេញ ហើយការដាក់ឃុំខ្លួនជនជាប់ចោទ លុះណាតែជាការចាំបាច់បំផុត ដើម្បីការពារសុវត្ថិភាពសង្គម និងដំណើរការស៊ើបអង្កេត។ ប៉ុន្តែ លោកយល់ថា ស្ថានភាពជាក់ស្តែង គឺជនជាប់ចោទទាំង២១នាក់ ភាគច្រើន មានបញ្ហាសុខភាពធ្ងន់ធ្ងរ ដោយមានការធានាត្រឹមត្រូវពីអង្គការសង្គមស៊ីវិលធំៗនៅកម្ពុជា ដែលនេះអាចបញ្ជាក់ពីការប្តេជ្ញាចិត្តរបស់ជនជាប់ចោទ អាចបំពេញតាមតម្រូវការរបស់តុលាការក្នុងការកោះហៅគ្រប់ពេលបាន។
កាលពីថ្ងៃទី០៧ ខែកុម្ភៈ កន្លងទៅនេះ តុលាការសាលាដំបូង បានសម្រេចឲ្យកម្មករពីរនាក់ ឈ្មោះ ប៊ូ សារិទ្ធ អាយុ ២៧ឆ្នាំ និងឈ្មោះ ផុន សុខជា អាយុ១៧ឆ្នាំ នៅក្រៅឃុំបណ្តោះអាសន្ន។ អ្នកទាំង២១នាក់ ដែលនៅសេសសល់នោះ រួមមាន លោកវន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក ថេង សាវឿន មន្ត្រីសម្របសម្រួលបណ្តាញកសិករ លោក ចាន់ ពុទ្ធីស័ក្ក សកម្មជនបឹងកក់នោះ និងកម្មករ១៧នាក់ ត្រូវបានចោទប្រកាន់ពីបទហិង្សាដោយចេតនាមានស្ថានទម្ងន់ទោស និងបំផ្លិចបំផ្លាញទ្រព្យសម្បត្តិអ្នកដទៃ។ ដោយឡែក សម្រាប់កម្មករម្នាក់ទៀត និងពីរនាក់ ដែលត្រូវបានដោះលែងនៅក្រៅឃុំ ករណីនៅផ្លូវវ៉េងស្រេង ត្រូវបានចោទប្រកាន់ថែមពីរករណីទៀត ពីបទប្រមាថមន្ត្រីសាធារណៈ និងបង្កឲ្យខូចសណ្តាប់ធ្នាប់សាធារណៈ។ បច្ចុប្បន្ននេះ ពួកគេ ទាំង២១នាក់ កំពុងជាប់ឃុំខ្លួននៅមណ្ឌលអប់រំកែប្រែម៣ ឬពន្ធនាគារត្រពាំងផ្លុង ក្នុងខេត្តកំពង់ចាម៕
No comments:
Post a Comment