កម្លាំងអាជ្ញាធរ ខេត្តពោធិ៍សាត់ បណ្ដេញ អ្នកតវ៉ារឿងដី ចេញពី មុខតុលាការ
ដោយ ជិន ជេដ្ឋា / អាស៊ីសេរី | ១៨ កុម្ភៈ ២០១៤
កម្លាំងសមត្ថកិច្ចចម្រុះខេត្តពោធិ៍សាត់ ប្រដាប់ដោយដំបងឆក់ បានបណ្ដេញពលរដ្ឋជាង ៤០នាក់ដែលតវ៉ារឿងដីធ្លី និងទាមទារឲ្យមានការដោះលែងស្រ្ដីម្នាក់ ឲ្យចេញពីខាងមុខសាលាដំបូងខេត្តពោធិ៍សាត់ នៅព្រឹកថ្ងៃទី១៨ ខែកុម្ភៈ។ មន្ត្រីអង្គការសិទ្ធិមនុស្ស បានហៅចំណាត់ការរបស់អាជ្ញាធរនាពេលនេះ ថាជាទង្វើរំលោភសិទ្ធិមនុស្សធ្ងន់ធ្ងរ ហើយរូបភាពនៃការបណ្ដេញចេញកាន់តែអាក្រក់ឡើង។
អាជ្ញាធរបានប្រើកម្លាំងកងរាជអាវុធហត្ថ ប៉ូលិស និងទាហានសរុបជិត ១០០នាក់ ដើម្បីបង្ខំឲ្យពលរដ្ឋមានបញ្ហាដីធ្លី និងបាត់បង់ផ្ទះសម្បែងជាង ១០០គ្រួសារ មកពីឃុំក្រពើពីរ ស្រុកវាលវែង ខេត្តពោធិ៍សាត់ បញ្ឈប់សកម្មភាពតវ៉ា និងបណ្ដេញពួកគាត់ចេញទៅក្រៅក្រុង។ សកម្មភាពនេះធ្វើឡើង បន្ទាប់ពីសាលាខេត្តពោធិ៍សាត់ ចេញសេចក្ដីជូនដំណឹងមួយនៅថ្ងៃទី១៧ ខែកុម្ភៈ ឲ្យពលរដ្ឋតវ៉ាទាំងនោះបញ្ឈប់ការទាមទារដីធ្លី ហើយត្រឡប់ទៅស្រុកកំណើតរៀងៗខ្លួនវិញ។
នៅក្នុងសេចក្ដីជូនដំណឹងរបស់សាលាខេត្តពោធិ៍សាត់ បានណែនាំដល់ប្រជាពលរដ្ឋចំនួន ៣ចំណុច គឺទី១ សុំឲ្យប្រជាពលរដ្ឋទាំងអស់វិលត្រឡប់ទៅរស់នៅភូមិ ឃុំដើមរបស់ខ្លួនវិញ។ ទី២ ទីតាំងដែលប្រជាពលរដ្ឋកំពុងទាមទារកាន់កាប់នោះ អាជ្ញាធរមិនអាចប្រគល់ជូនបានឡើយ ពីព្រោះតំបន់នោះគឺជាព្រៃស្រោងដែលច្បាប់ការពារដាច់ខាត និងទី៣ ចំពោះជនល្មើសឈ្មោះ ស៊ិន សៀន ដែលបានឃាត់ខ្លួនពីបទល្មើសកាប់រានដីព្រៃនោះ ត្រូវផ្ដន្ទាទោសតាមមាត្រា ៩៧ ចំណុចទី៦ នៃច្បាប់ព្រៃឈើ។
ច្បាប់ស្ដីពីព្រៃឈើ មាត្រា ៩៧ ចែងថា ជនល្មើសត្រូវផ្ដន្ទាទោសក្រោមបទល្មើសថ្នាក់ទី១ ដែលត្រូវជាប់ពន្ធនាគារចាប់ពី ៥ឆ្នាំ ដល់ ១០ឆ្នាំ និងត្រូវរឹបអូសវត្ថុតាងទាំងអស់មកធ្វើជាសម្បត្តិរដ្ឋ។
វិទ្យុអាស៊ីសេរីមិនអាចទាក់ទងស្នងការនគរបាលខេត្តពោធិ៍សាត់ លោក សារុន ចន្ធី ដើម្បីសុំការអត្ថាធិប្បាយជុំវិញការបណ្ដេញក្រុមអ្នកតវ៉ាចេញពីមុខតុលាការខេត្តនេះបានឡើយ នៅថ្ងៃទី១៨ ខែកុម្ភៈ។
យ៉ាងណាអភិបាលរងខេត្តពោធិ៍សាត់ ទទួលបន្ទុកដោះស្រាយទំនាស់ដីធ្លី លោក សួន រិន្ទឌី បញ្ជាក់ថា ក្រុមប្រជាពលរដ្ឋដែលឡើងមកតវ៉ានេះសុទ្ធតែធ្លាប់ទទួលបានដីលំនៅឋាន និងដីធ្វើកសិកម្មតាមគម្រោងដីសម្បទានសង្គមកិច្ចរបស់រដ្ឋនៅតំបន់ទួលគ្រោះរួចហើយ ក៏ប៉ុន្តែពួកគាត់ចាប់ផ្ដើមចូលមករស់នៅ និងកាប់រានព្រៃស្រោងរបស់រដ្ឋតាមមេខ្យល់នៅក្រោយការបោះឆ្នោតជាតិឆ្នាំ២០១៣៖ «កន្លែងហ្នឹងយើងដេញប៉ុន្មានដងហើយ ដល់ចុងក្រោយមកយើងចែកឲ្យគាត់នៅទួលក្រួស នេះចែកដីចែកអីឲ្យគាត់នៅឲ្យមានលំនៅឋានពិតប្រាកដ។ ចេះតែចោទថាអត់ដីៗ»។
មន្ត្រីសម្របសម្រួលសមាគមអាដហុក (Adhoc) ប្រចាំខេត្តពោធិ៍សាត់ លោក ភួង សុធា ថ្លែងថា បើទោះបីជាការតវ៉ានេះពុំមានការប៉ះទង្គិចគ្នារវាងប្រជាពលរដ្ឋនិងកម្លាំងសមត្ថកិច្ច ក៏ប៉ុន្តែនៅយប់ថ្ងៃទី១៧ ខែកុម្ភៈ មានស្រ្ដីចូលរួមតវ៉ាម្នាក់សម្រាលកូន និងនៅព្រឹកថ្ងៃទី១៨ ខែកុម្ភៈ មានប្រជាពលរដ្ឋចំនួន ៣នាក់សន្លប់ដោយមានអាការហេវហត់ខ្លាំង។
លោកបន្ថែមថា ការប្រើវិធានការរបស់អាជ្ញាធរបែបនេះ គឺមិនមែនជាដំណោះស្រាយល្អឡើយ៖ «រូបភាពដែលសាហាវយើងឃើញថា ប្រជាពលរដ្ឋដែលយើងឃើញថា ប្រជាពលរដ្ឋដែលគាត់កំពុងតែចម្អិនអាហារ សមត្ថកិច្ចមកដល់ គឺទាត់ទីណាត់ទីណែង ហើយចាស់ដែលគាត់ដើរយឺតហ្នឹង ត្រូវសមត្ថកិច្ចបង្ខំដើរឲ្យលឿន។ ការដោះស្រាយដ៏ល្អយើងឃើញថា ពួកគាត់មានលំនៅឋាន ហើយដីសម្រាប់បង្កបង្កើនផលហើយ អ៊ីចឹងអាជ្ញាធរគួរតែរៀបចំហេដ្ឋារចនាសម្ពន្ធសម្ព័ន្ធបន្ថែមទៀតនៅទីនោះតែម្ដង»។
ក្រោយពីកម្លាំងសមត្ថកិច្ចបំបែកក្រុមអ្នកតវ៉ានៅខាងមុខតុលាការ ពួកគាត់បានប្រមូលផ្ដុំគ្នាស្នាក់នៅតាមចិញ្ចើមថ្នល់បណ្ដោះអាសន្នត្រង់ចំណុចផ្លូវបំបែកលាជ ស្ថិតនៅសង្កាត់រលាប ក្រុងពោធិ៍សាត់។ ក្រុមប្រជាពលរដ្ឋទាំងនេះកំពុងតែដង្ហោយរកជំនួយពីអង្គការក្រៅរដ្ឋាភិបាល និងមន្ត្រីរាជរដ្ឋាភិបាលដើម្បីដោះស្រាយបញ្ហានេះ។
ប្រជាពលរដ្ឋជាង ១០០គ្រួសាររស់នៅចំណុចអូរធំ និងចម្ការចេក នៃឃុំក្រពើពីរ បាននាំគ្នាឡើងមកតវ៉ានៅខាងមុខសាលាដំបូងខេត្តពោធិ៍សាត់ ចាប់តាំងពីថ្ងៃទី១៣ ខែកុម្ភៈ ឆ្នាំ២០១៤ ពោលគឺ១ថ្ងៃក្រោយពីកម្លាំងសមត្ថកិច្ចចម្រុះចុះដុតផ្ទះ និងឃាត់ខ្លួនស្ត្រីម្នាក់ឈ្មោះ ស៊ិន សៀន ដែលអាជ្ញាធរអះអាងថា ជាមេខ្លោងក្នុងការនាំអ្នកភូមិចូលទៅកាប់រានដីព្រៃស្រោងរបស់រដ្ឋនៅតំបន់នោះ៕
No comments:
Post a Comment