គេហទំព័ររបស់ក្រសួងអប់រំ យុវជន និង កីឡា ដែលមានអាស័យដ្ឋាន www.moeys.com.kh
រដ្ឋមន្ត្រី ថ្មី ចាប់ផ្តើម យកចិត្តទុកដាក់ លើគេហទំព័រ ក្រសួងអប់រំ
ដោយ៖ ស៊ុន ណារិន / វីអូឌី | ថ្ងៃអង្គារ ទី18 ខែកុម្ភៈ ឆ្នាំ2014
ក្រសួងអប់រំ យុវជន និង កីឡា បានសម្រេចបង្កើតក្រុមការងារដឹកនាំធ្វើបច្ចុប្បន្នភាពព័ត៌មានលើគេហទំព័រក្រសួង ដើម្បីជាការផ្តល់ព័ត៌មាន និងរបាយការណ៍ផ្សេងដល់សាធារណជន។
សេចក្តីសម្រេចមួយ ចុះហត្ថលេខាដោយរដ្ឋមន្ត្រីក្រសួងអប់រំ លោក ហង់ ជួនណារ៉ុន ចេញផ្សាយនៅថ្ងៃទី១៧ខែកុម្ភៈ ឲ្យដឹងថា ក្រុមការងារនោះ ស្ថិតនៅក្រោមអនុគណៈកម្មការប្រមូលព័ត៌មាននៃសេចក្តីសម្រេចរបស់ក្រសួងកាលពីថ្ងៃទី០៣ខែមករា ស្តីពីការបង្កើតគណៈកម្មការតាមដាន ប្រមូលព័ត៌មាន និងដោះស្រាយបញ្ហាអសកម្មក្នុងវិស័យអប់រំ។ក្រុមការងារដឹកនាំធ្វើបច្ចុប្បន្នភាពព័ត៌មាន មានសមាជិក១៤រូប ដែលដឹកនាំរដ្ឋលេខាធិការក្រសួងអប់រំ លោកស្រី កឹម សេដ្ឋានី។
គួរបញ្ជាក់ថា កន្លងទៅ អ្នកសារព័ត៌មាន បានរិះគន់ក្រសួងអប់រំថា មិនបានផ្សព្វផ្សាយព័ត៌មានលើគេហទំព័ររបស់ខ្លួន ឲ្យបានជាប់លាប់នោះទេ ហើយថ្នាក់ដឹកនាំក្រសួង ត្រូវបានរិះគន់ថា មិនបានផ្តល់ព័ត៌មាន ឬការឆ្លើយតបណាមួយទៅកាន់អ្នកសារព័ត៌មាន។ ក្នុងអាណត្តិទី៥នេះ រដ្ឋមន្ត្រីក្រសួងអប់រំចាស់ លោក អ៊ឹម សិទ្ធី ត្រូវបានប្តូរចេញ ដោយដាក់ជំនួសដោយ លោក ហង់ ជួនណារ៉ុន អតីតរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។ក្រោយការផ្លាស់ប្តូរនេះ រដ្ឋមន្ត្រីថ្មី ចាប់ផ្តើមផ្តល់បទសម្ភាសន៍ទៅកាន់សារព័ត៌មានផ្សេងៗ៕
No comments:
Post a Comment