សង្គមស៊ីវិល និងអ្នកច្បាប់ រិះគន់ចំណាត់ការ អាជ្ញាធរ ដុតកម្ទេច លំនៅដ្ឋានប្រជាជន
ដោយ៖ ជន ស្រីណុច / វីអូឌី | ថ្ងៃអង្គារ ទី18 ខែកុម្ភៈ ឆ្នាំ2014
សង្គមស៊ីវិល និងអ្នកច្បាប់ រិះគន់ ចំពោះចំណាត់ការ របស់ អាជ្ញាធរកម្ពុជា ករណីថ្មីៗនេះ នៅពេលចុះដោះស្រាយ បញ្ហា ជម្លោះដីធ្លី នៅតាមខេត្ត មិនបានធ្វើឡើង ស្របតាមច្បាប់ នោះទេ ដោយដុតកម្ទេចលំនៅដ្ឋាន និងទ្រព្យសម្បត្តិ របស់ប្រជាពលរដ្ឋ ចោលតែម្ដង។
ថ្មីៗនេះ អាជ្ញាធរបានដុតកម្ទេចផ្ទះរបស់ប្រជាពលរដ្ឋចោល នៅពេលដែលមានករណីទាក់ទងនឹងដីធ្លី ជាក់ស្តែងដូចនៅខេត្តពោធិ៍សាត់ កម្លាំងសមត្ថកិច្ចចម្រុះ ដឹកនាំដោយព្រះរាជអាជ្ញារងខេត្ត លោក ប៉ង់ ចាន់សុយុទ្ធារ៉ា ចុះទៅរុះរើ និងដុតបំផ្លាញផ្ទះរបស់ប្រជាពលរដ្ឋ យ៉ាងហោចណាស់ជាង១០០ខ្នង នៅភូមិអូរធំ ហៅភូមិចម្ការចេក ឃុំក្រពើពីរ ស្រុកវាលវែង ខេត្តពោធិ៍សាត់ ក្រោមហេតុផលថា ជាតំបន់ការពារព្រៃឈើនោះ។
នាយកលេខាធិការដ្ឋាននៃក្រុមការងារពិសេសសិទ្ធិលំនៅដ្ឋាន លោក សៀ ភារម្យ យល់ថា ទង្វើរបស់អាជ្ញាធរកម្ពុជាបច្ចុប្បន្នកាន់តែអាក្រក់ទៅៗហើយ ព្រោះនៅពេលដែលចុះអន្តរាគមន៍ ពីបញ្ហាអ្វីមួយតែងតែប្រើអំពើហិង្សា ដូចជាការដុតលំនៅដ្ឋានរបស់ប្រជាជននេះមិនគួរធ្វើទេ ។ លោកបន្តថា អាជ្ញាធរគួរដោះស្រាយដោយសន្តិវិធី ព្រោះទង្វើបែបនេះនឹងធ្វើឲ្យប្រជាជនក៏ដូចជាសាធារណៈជន កាន់តែស្អប់រដ្ឋាភិបាល «នេះហើយធ្វើឲ្យការទុកចិត្តគ្នារវាង ប្រជាពលរដ្ឋ និងអាជ្ញាធរ គឺថាវាកាន់តែឃ្លាតឆ្ងាយ។ អញ្ចឹងរវាងអ្នកបម្រើហើយនិងម្ចាស់ វាកាន់តែទុកគ្នាជាសត្រូវ កាន់តែខ្លាំងទៅៗ វាមិនមែនជាដំណោះស្រាយ មិនមែនជាអ្នកបម្រើពិតប្រាកដទេ។ អញ្ចឹងធ្វើឲ្យប្រជាពលរដ្ឋ ដកសេចក្តីទុកចិត្ត លែងទុកចិត្តដល់អាជ្ញាធររដ្ឋ»។
មេធាវីនៃសមាគមការពារសិទ្ធិមនុស្សអាដហុក លោក នី ចរិយា យល់ថាការដែលអាជ្ញាធរចុះទៅដុតផ្ទះរបស់ប្រជាជនបែបនេះគឺមិនត្រឹមត្រូវនោះទេ «អ្វីដែលអនុវត្តនេះ គឺជាការអនុវត្តន៍ផ្ទុយច្បាប់ ជាគោលការណ៍ច្បាប់ យើងមិនអាចធ្វើអញ្ចឹងទេ។ ហើយយើងមានការសោកស្តាយដែរ ក្នុងការដឹកនាំទៅអនុវត្តនីតិវិធី ដោះស្រាយបញ្ហាមួយ ហើយមានមន្ត្រីតុលាការ ចូលទៅដែរ ដូចជាព្រះរាជអាជ្ញា ហើយទៅអនុវត្តខុសនីតិវិធី អនុវត្តទៅរំលោភច្បាប់ថែមទៀត នេះជាការសោកស្តាយមែនទែន សម្រាប់ប្រទេសយើង»។
ក្រុមអ្នកច្បាប់មើលឃើញថា នៅដើមឆ្នាំ២០១៤នេះ ការបណ្ដេញប្រជាពលរដ្ឋចេញពីផ្ទះសម្បែង មានលក្ខណៈកាន់តែសាហាវខ្លាំងឡើង ដូចករណីនៅខេត្ត ពោធិ៍សាត់ កោះកុង រតនៈគិរី មណ្ឌលគិរី និងក្រចេះ ដែលអាជ្ញាធរ និងក្រុមហ៊ុនដុតកម្ទេចផ្ទះសម្បែងប្រជាពលរដ្ឋ ទាក់ទងនឹងវិវាទដីធ្លីជាដើម៕
No comments:
Post a Comment