រដ្ឋមន្ត្រី ថ្មី ក្រសួងអប់រំ ចាប់ផ្តើម រឹតបន្តឹង ការប្រឡង បាក់ឌុប កុំឲ្យមាន ការរិះគន់
ដោយ៖ ស៊ុន ណារិន និងម៉ៅ ចរិយា / វីអូឌី | ថ្ងៃព្រហស្បតិ៍ ទី27 ខែកុម្ភៈ ឆ្នាំ2014
រដ្ឋមន្ត្រីថ្មីក្រសួងអប់រំ យុវជន និងកីឡា ចាប់ផ្តើមរឹតបន្តឹងការប្រឡងសញ្ញាបត្រមធ្យមសិក្សាទុតិយភូមិ(ថ្នាក់ទី១២) ក្នុងគោលបំណងធានាគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបានក្នុងការប្រឡង។
ក្រសួងអប់រំ បានចេញសេចក្តីប្រកាសមួយស្តីពីការរៀបចំ និងការប្រព្រឹត្តទៅនៃការប្រឡងសញ្ញាបត្រមធ្យមសិក្សាទុតិយភូមិ ដែលចុះហត្ថលេខាដោយរដ្ឋមន្ត្រីក្រសួងអប់រំ លោក ហង់ ជួនណារ៉ុន នៅថ្ងៃទី៣១ខែមករា។
ប្រកាសនេះ ធ្វើឡើងជាការចូលរួមចំណែកកំណែទម្រង់ប្រព័ន្ធអប់រំនៅកម្ពុជា។ប្រកាសនេះ មាន២៥ប្រការ ដែលនិយាយពីការរៀបចំសំណុំលិខិតចុះឈ្មោះប្រឡង និងបេក្ខភាព ការកំណត់ថ្ងៃប្រឡង និងមណ្ឌលប្រឡង ការដាក់ពិន្ទុ និងការរៀបចំគណៈមេប្រយោគមណ្ឌលសំណេរជាដើម។ តាមរយៈប្រកាសនេះ រដ្ឋមន្ត្រីថ្មីក្រសួងអប់រំ នឹងធ្វើការដោយផ្ទាល់លើបញ្ហាមួយចំនួននៃការប្រឡងបាក់ឌុបនេះ។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ រិះគន់សេចក្តីប្រកាសរបស់ក្រសួងអប់រំ ដោយលើកឡើងថា ជាសេចក្តីប្រកាសដដែលៗ។ លោកស្នើឲ្យមានការស៊ើបអង្កេតចាប់មន្ត្រីពុករលួយ ដែលពាក់ព័ន្ធនឹងការប្រឡងបាក់ឌុប។
ការប្រឡងបាក់ឌុប ដែលធ្វើឡើងក្នុងអំឡុងខែសីហា ជារៀងរាល់ឆ្នាំ រងការរិះគន់ថា មានភាពមិនប្រក្រតីកើតឡើង ដូចជាការយកលុយពីសិស្ស និងការបែកធ្លាយវិញ្ញាសាជាដើម។
ក្រុមអ្នកជំនាញស្រាវជ្រាវលើដំណើរការប្រឡង បាក់ឌុប ធ្លាប់រកឃើញថា កូនសិស្ស៩២% ឆ្លើយថា ពួកគេបានផ្តួចផ្តើមប្រមូលប្រាក់ដោយខ្លួនឯង ដើម្បីយកទៅឲ្យលោកគ្រូអ្នកគ្រូ។ កូនសិស្ស លើកឡើងថាការប្រមូលប្រាក់កាសជូនលោកគ្រូអ្នកគ្រូនៅពេលប្រឡងបានក្លាយទៅជាវប្បធម៌ទៅហើយ។
ការប្រឡងទុតិយភូមិឆ្នាំ ២០១៣ កន្លងទៅ បេក្ខជនប្រឡង មានចំនួនសរុបជិត១១ម៉ឺននាក់ ដែលមានមណ្ឌលប្រឡងចំនួន ២៣៤ មណ្ឌល។ ក្នុងរាជធានីភ្នំពេញ បេក្ខជនចូលរួមប្រឡងសរុប មានចំនួន ១ ៩០៧៩ នាក់ និងចែកចេញជា ៣៧ មណ្ឌល៕
No comments:
Post a Comment