លោក ឱម យិនទៀង ក្នុងសន្និសីទកន្លងទៅ (រូបថត ឡាយ សាមាន)
អង្គភាព ប្រឆាំង អំពើពុករលួយ បង្ហោះលិខិត រិះគន់ លោក ឱម យិនទៀង
ដោយ៖ ញឹម សុខន / វីអូឌី | ថ្ងៃសៅរ៍ ទី22 ខែកុម្ភៈ ឆ្នាំ2014
អង្គភាពប្រឆាំងអំពើពុករលួយ កាលពីថ្ងៃសុក្រម្សិលមិញ ទម្លាយឲ្យដឹងពីអ្នករិះគន់ស្ថាប័នខ្លួនថា ខកខានចាត់វិធានការបង្ក្រាបអំពើពុករលួយ ឲ្យមានប្រសិទ្ធភាពនៅខណ្ឌមានជ័យ រាជធានីភ្នំពេញ កាលពីជិតពីរឆ្នាំមុននោះថា ដោយសារបញ្ហាបក្ខពួកនិយម ។
តាមការចុះផ្សាយនៅលើគេហទំព័ររបស់អង្គភាពប្រឆាំងអំពើពុករលួយ ចុះថ្ងៃទី២១ ខែកុម្ភៈ ឆ្នាំ២០១៤ ឲ្យដឹងថា ប្រធានអង្គភាពប្រឆាំងអំពើពុករលួយ លោក ឱម យិនទៀង បានទទួលហើយនូវលិខិតរិះគន់នោះ ហើយអង្គភាពនេះ ជួយផ្សព្វផ្សាយបន្ត ដើម្បីកុំឲ្យអ្នករិះគន់ពិបាកយកទៅផ្សព្វផ្សាយ អាចនាំឲ្យមានការប្តឹងពីបទបរិហាកេរ្តិ៍។
លិខិតរិះគន់អង្គភាពប្រឆាំងអំពើពុករលួយ សរសេរថា កាលពីថ្ងៃទី២៨ ខែមីនា ឆ្នាំ២០១២ លោកឱម យិនទៀង និងសហការី ជាង២០នាក់ បានចុះបង្ក្រាបអំពើពុករលួយ ហើយចាប់បាន ១៦ឧបសម្ព័ន្ធ របស់ប្រធានពន្ធដារខណ្ឌមានជ័យ លោក សាយ សុផល ដែលប្រព្រឹតអំពើពុករលួយ ៤៦ស្ថានីយប្រេងខណ្ឌមានជ័យ។
លិខិតបន្តថា មកដល់ពេលនេះ លោកឱម យិនទៀង មិនទាន់បានចាត់វិធានការណ៍ទៅលើមន្ត្រីរូបនោះនៅឡើយទេ ។ អ្នករិះគន់សង្ស័យថា ការមិនចាត់វិធានការនេះ ទំនងជាអង្គភាពប្រឆាំងអំពើពុករលួយ ឲ្យដឹងថា លោក សាយ សុផល ជាកូនប្រសាររបស់លោក ទេព ងន។
លិខិតបញ្ជាក់ថា ពួកគេ នឹងបន្តដាក់លិខិតនេះ ទៅប្រអប់សំបុត្រខុទ្ទកាល័យលោកនាយករដ្ឋមន្ត្រីហ៊ុន សែន និងយកទៅផ្សព្វផ្សាយលើកញ្ចក់ទូរទស្សន៍ក្នុងស្រុកមួយទៀតផង ។
VOD មិនទាន់អាចទាក់ទង លោក សាយ សុផល ដើម្បីសុំប្រតិកម្មឆ្លើយតបជុំវិញលិខិតចោទប្រកាន់ ដែលត្រូវបានបង្ហោះនៅលើគេហទំព័ររបស់អង្គភាពប្រឆាំងអំពើពុករលួយនោះបាននៅឡើយទេ។
ទោះជាយ៉ាងណាលិខិតនោះ សរសេរបែបចំអកថា ជួយខ្សឹបប្រាប់លោកឱម យិនទៀង ប្រធានអង្គភាពប្រឆាំងអំពើពុករលួយផង ថាពួកគេឆ្ងល់ ថាវិធានការនោះដល់ណាហើយ៕
No comments:
Post a Comment