ប្រជាសហគមន៍ ដីធ្លី ប្រតិកម្ម នឹងសម្តីមន្ត្រី រដ្ឋាភិបាល ដែលថា ពួកគេ បំប៉ោងទិន្នន័យ ចំនួនគ្រួសារ
ដោយ៖ ញឹម សុខន / វីអូឌី | ថ្ងៃចន្ទ ទី3 ខែកុម្ភៈ ឆ្នាំ2014
ប្រជាសហគមន៍ដែលរងគ្រោះដោយសារដីធ្លីនៅរាជធានីភ្នំពេញប្រមាណ ១០០នាក់ នៅព្រឹកថ្ងៃចន្ទនេះ ប្រតិកម្មទៅនឹងសម្តីមន្ត្រីសិទ្ធិមនុស្សរបស់រដ្ឋាភិបាល ដែលបានលើកឡើងថា ពលរដ្ឋដែលរស់នៅតំបន់វិវាទ បានបំប៉ោងទិន្នន័យចំនួនគ្រួសារ ធ្វើឲ្យរដ្ឋាភិបាលពិបាកក្នុងការដោះស្រាយបញ្ហាដីធ្លី។
ការប្រតិកម្មនេះ ធ្វើឡើងនៅក្នុងសន្និសីទសារព័ត៌មានមួយ នៅតំបន់បឹងកក់ រាជធានីភ្នំពេញ នៅព្រឹកថ្ងៃទី០៣ខែកុម្ភៈនេះ ដោយមានការចូលរួមពីប្រជាសហគមន៍ប្រមាណ១០០នាក់ មកពី បុរីកីឡា ថ្មគោល បឹងកក់ និងសហគមន៍ដីធ្លីមួយចំនួនទៀត។
ពលរដ្ឋដែលរងគ្រោះដោយសារបញ្ហាដីធ្លី បានលើកឡើងប្រហាក់ប្រហែលគ្នាថា កាលពីចុងខែមករាកន្លងទៅនេះ លោកម៉ក់ សម្បតិ្ត អនុប្រធានគណៈកម្មាធិការសិទ្ធិមនុស្សកម្ពុជា បានប្រាប់ទៅអង្គការសហប្រជាជាតិ នៅទីក្រុងហ្សឹណែវ ប្រទេសស្វីស ថា រាជរដ្ឋាភិបាលកម្ពុជា បាននឹងកំពុងដោះស្រាយបញ្ហាដីធ្លីយ៉ាងសកម្ម ប៉ុន្តែអ្វីដែលជាការលំបាករបស់រាជរដ្ឋាភិបាលនោះ ដោយសារមានការបំប៉ោងទិន្នន័យពីចំនួនគ្រួសារ ពីសំណាក់ប្រជាពលរដ្ឋដែលរស់នៅលើដីជម្លោះនោះ។ ពួកគេបន្តថា ប្រជាពលរដ្ឋពុំចេះបំប៉ោងទិន្នន័យ ដូចការលើកឡើងរបស់លោក ម៉ក់ សម្បត្តិ នេះទេ ហើយថា ការកើនឡើងទិន្នន័យណាមួយនោះ ជារឿងអសមត្ថភាពរបស់អាជ្ញាធរដែលទទួលខុសត្រូវក្នុងការដោះស្រាយបញ្ហាដីធ្លីជូនប្រជាពលរដ្ឋ។
តែទោះជាយ៉ាងណា វីអូឌី នៅពុំទាន់អាចសុំការអត្ថាធិប្បាយពី លោក ម៉ក់ សម្បត្តិ អនុប្រធានគណៈកម្មាធិការសិទ្ធិមនុស្សកម្ពុជា បាននៅឡើយទេ។
កាលពីថ្ងៃទី២៨ ខែមករា កន្លងទៅនេះ សម្ព័ន្ធក្រុមអង្គការសិទ្ធិមនុស្សនៃអង្គការសហប្រជាជាតិ បានធ្វើការវាយតម្លៃទៅលើបញ្ហាសិទ្ធិមនុស្សនៅកម្ពុជា ស្របទៅនឹងដំណើរការ យូភីអ នៅទីក្រុងហ្សឺណែវ ប្រទេសស្វីស ដែលកាលណោះ មានសកម្មជនសិទ្ធិដីធ្លី អ្នកស្រី ទេព វន្នី ជាវាគ្មិនកិត្តិយស។ សម្រាប់រដ្ឋាភិបាលកម្ពុជា លោក ម៉ក់ សម្បត្តិ អនុប្រធានគណៈកម្មាធិការសិទ្ធិមនុស្សកម្ពុជា បានអញ្ជើញទៅចូលរួមក្នុងកិច្ចប្រជុំនោះ តំណាងឲ្យលោកឱម យិនទៀង ដែលជាប្រធាន៕
No comments:
Post a Comment