លោក ទៀ វិញ/រូបថតពី(http://www.navy.mil.kh)
ប្អូនប្រុស លោក ទៀ បាញ់ គឺលោក ទៀ វិញ ត្រូវតែងតាំងជា ឧត្តមសេនីយ៍ផ្កាយ៤
ដោយ៖ ស៊ុន ណារិន / វីអូឌី | ថ្ងៃព្រហស្បតិ៍ ទី13 ខែកុម្ភៈ ឆ្នាំ2014
ព្រះមហាក្សត្រ ព្រះបាទ នរោត្តម សីហមុនី ចេញផ្សាយព្រះរាជក្រឹត្យ តែងតាំង ឧត្តមសេនីយ៍ឯក ចំនួន២៩រូប ទៅជានាយឧត្តមសេនីយ៍(ផ្កាយ៤) ដែលក្នុងនោះ មាន ឧត្តមនាវីឯក មួយរូប ដែលជាប្អូនប្រុសលោក ទៀ បាញ់ គឺលោក ទៀ វិញ ផងដែរ។
ការតែងតាំងនេះ ធ្វើឡើងតាមការស្នើសុំរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី២៤ខែកញ្ញា ឆ្នាំ២០១៣។
លិខិត ចុះកាលបរិច្ឆេតកាលពីថ្ងៃទី០៥ខែកុម្ភៈ ឲ្យដឹងថា ព្រះមហាក្សត្រ បានដំឡើងឋានន្តរសក្តិនាយឧត្តមសេនីយ៍ ដល់នាយទាហានថ្នាក់ឧត្តមសេនីយ៍នៃកងយោធពលខេមរភូមិន្ទ២៩រូប។អ្នកដែលត្រូវបានតែងតាំងនោះ មានប្អូនប្រុសលោក ទៀ បាញ់ គឺលោកទៀ វិញ និង លោក ឈុំ សុជាតិ ដែលជាអ្នកនាំពាក្យក្រសួងការពារជាតិ។ នាយឧត្តមសេនីយ៍ និងជាឧបនាយករដ្ឋមន្ត្រីក្រសួងការពារជាតិ លោក ទៀ បាញ់ បានបំពាក់ឋានន្តរសក្តិដល់ឧត្តមសេនីយ៍ឯកចំនួន២៩រូបនេះ នៅព្រឹកថ្ងៃព្រហស្បតិ៍ទី១៣ខែកុម្ភៈនេះ។
ឧត្តមនាវីឯក លោក ទៀ វិញ ត្រូវបានតែងតាំងជាមេបញ្ជាការកងទ័ពជើងទឹក កាលពីខែមករា ឆ្នាំ២០០៩។
កាលពីថ្ងៃទី២២ ខែមករា ឆ្នាំ២០១៤ ព្រះមហាក្សត្រ បានដំឡើងឋានន្តរសក្ដិឧត្ដមសេនីយ៍ឯកចំនួន ៦រូបនៃក្របខណ្ឌនគរបាលជាតិ អោយទៅជានាយឧត្ដមសេនីយ៍។មន្ត្រីទាំង ៦រូបនោះរួមមាន លោក អ៊ុក គឹមលេខ លោក ខៀវ សុភ័គ លោក ម៉ៅ ប៊ុនណារិន លោក ម៉ៅ ច័ន្ទតារា លោក សុខ ផល និងលោក ចាន់ អ៊ាន៕
No comments:
Post a Comment