យោធិនពិការ នៅបាត់ដំបង ត្អូញ ពី ការបើកប្រាក់សោធននិវត្តន៍ មិនទៀងទាត់
ដោយ អ៊ុក សាវបូរី / អាស៊ីសេរី | ១៣ កុម្ភៈ ២០១៤
យោធិនពិការជាច្រើននាក់នៅក្នុងខេត្តបាត់ដំបង ដែលរស់នៅពឹងអាស្រ័យលើប្រាក់ឧបត្ថម្ភពីរដ្ឋាភិបាលត្អូញត្អែរថា ប្រាក់សោធននិវត្តន៍របស់ពួកគាត់ ពុំត្រូវក្រុមមន្ត្រីសង្គមកិច្ចបើកអោយបានទៀងទាត់ឡើយ។ លើសពីនេះ ការពន្យារពេលបើកប្រាក់ញឹកញាប់ បានធ្វើអោយបាត់ប្រាក់ខែដែលជាទូទៅក្នុង ១ឆ្នាំ ត្រូវបាត់ប្រាក់ខែមួយខែ។
យោធាពិការនៅស្រុករុក្ខគិរី ខេត្តបាត់ដំបង អំពាវនាវឲ្យរដ្ឋាភិបាលឆាប់បញ្ចូលលុយចូលនិវត្តន៍របស់ពួកគាត់ឲ្យទៅធនាគារអេស៊ីលីដា ឲ្យបានទៀងទាត់។
អតីតអនុវរសេនីយ៍ឯកយោធាកងពលលេខ ១៦ បានពិការដោយសារការបាក់ឆ្អឹងក៣កំណាត់ កាលពីឆ្នាំ២០០០ ថ្លែងថា កាលគាត់បើកលុយនៅក្នុងកងពល ធ្លាប់បាត់លុយចំនួន ១ខែរៀងរាល់ឆ្នាំ ដោយសារតែថ្ងៃបើកលុយខែទី១ ទៅបើកដល់ដាច់ខែទី២ ហើយពន្យារថ្ងៃបើកលុយតខែគ្នា។ រហូតដល់ខែចុងឆ្នាំ គេបំបាត់លុយខែទី១២ តែម្ដង គឺលុយបើកសម្រាប់ ១ឆ្នាំ ដែលមាន ១២ខែ គឺលុយបើកបានពិតប្រាកដតែ ១១ខែ៖ «បើចេះតែពន្យារពេលយូរៗទៅ ចេះតែខើចខែរបស់ពួកខ្ញុំ ហើយខ្ញុំសង្ស័យចូលគន្លងចាស់ បានខ្ញុំខ្លាចបាត់លុយ១ខែ»។
យោធាពិការដទៃទៀតនៅស្រុករុក្ខគិរី អំពាវនាវសុំឲ្យក្រសួងការពារជាតិ ក្រសួងសង្គមកិច្ច ក្រសួងសេដ្ឋកិច្ចហិរញ្ញវត្ថុ ពន្លឿនបញ្ចូលលុយទៅក្នុងគណនេយ្យរបស់ពួកគាត់នៅធនាគារអេស៊ីលីដា ផង ព្រោះពួកគាត់រំពឹងប្រាក់ខែនោះណាស់៖ «ប្រាក់ខែនៅវាបាត់ ដល់ចូលធនាគារអេស៊ីលីដា វាអត់បាត់ តែបានយឺតយ៉ាវក្នុងការបើក»។
មន្ត្រីធនាគារអេស៊ីលីដា លោក ណយ សោភា ឲ្យដឹងថា ធនាគារនេះបម្រើសេវាបើកនិងទទួលប្រាក់ពីរដ្ឋាភិបាលនិងពីអតិថិជន។ ប៉ុន្តែបើក្រសួងមន្ទីររបស់រដ្ឋាភិបាលមិនបង់ប្រាក់ចូលមកធនាគារនេះទេ គឺធនាគារមិនមានប្រាក់បើកជូនអ្នកចូលនិវត្តន៍ទាំងនោះឡើយ៖ «ខាងខ្ញុំចាំតែទទួលឯកសារពីខាងក្រសួង ឬមន្ទីរដែលដាក់ឲ្យគាត់ទេ ពេលដែលគាត់មានឯកសារភ្លាម គឺពួកខ្ញុំបញ្ចូលក្នុងគណនេយ្យគាត់ភ្លាម ខាងខ្ញុំមិនបានពន្យារទេ។ អ៊ីចឹងឲ្យគាត់ទាក់ទងទៅខាងមន្ទីរ ឬក៏ក្រសួងវិញបានដឹង»។
វិទ្យុអាស៊ីសេរី មិនអាចទាក់ទងមន្ត្រីសង្គមកិច្ច និងមន្ត្រីក្រសួងសេដ្ឋកិច្ចហិរញ្ញវត្ថុ ជម្រាបសួរប្រាក់ដែលរដ្ឋផ្ទេរទៅអោយធនាគារប្រចាំខែ ដើម្បីបើកជូនអ្នកចូលនិវត្តន៍បានទេ នៅថ្ងៃទី១៣ ខែកុម្ភៈ។ ប៉ុន្តែអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានពន្យល់ថា មន្ត្រីទាំងនោះអាចទៅសាកសួរនៅមន្ទីរសង្គមកិច្ចដែលធ្លាប់បើក។ លោកថា រដ្ឋាភិបាលអាណត្តទី៥ កែទម្រង់ការបើកប្រាក់ខែពីបើកផ្ទាល់ដោយមន្ត្រីតាមស្ថាប័ន ទៅបើកនៅធនាគារវិញ។ ការធ្វើបែបនេះ គឺការពារការបាត់បង់ប្រាក់មួយចំនួននៅពាក់កណ្ដាលផ្លូវផង និងបញ្ហាផ្សេងៗទៀតផង៕
No comments:
Post a Comment