ពិធីបួងសួង ដែលចូលរួមដោយព្រះសង្ឃ និងមន្រ្តីសង្គមស៊ីវិល កាលពីព្រឹកមិញ នៅមុខព្រះអង្គដង្កើ (រូបថត៖ សុភាព)
ក្រុមមន្ត្រីសង្គមស៊ីវិល ចូលរួមក្នុងពិធីបួងសាងកាលពីព្រឹកមិញ (រូបថត៖ សុភាព)
ព្រះសង្ឃ និងមន្ត្រី សង្គមស៊ីវិល ជាង១០០ស្ថាប័ន បួងសួងព្រះអង្គដង្កើ បន្ទន់ចិត្ត តុលាការ ឲ្យដោះលែង អ្នកជាប់ឃុំ ២៣នាក់
ដោយ៖ ណាត សុភាព / វីអូឌី | ថ្ងៃសុក្រ ទី7 ខែកុម្ភៈ ឆ្នាំ2014
ព្រះសង្ឃ២៣អង្គ និងមន្ត្រីសង្គមស៊ីវិលជាង១០០ស្ថាប័ន ប្រមូលផ្តុំគ្នានៅមុខព្រះអង្គដង្កើនៅព្រឹកថ្ងៃសុក្រនេះ ដើម្បីបួងសួងដល់វត្ថុស័កិ្តសិទ្ធក្នុងលោក ឲ្យបន្ទន់ចិត្តមន្ត្រីសាលា ឧទ្ធរណ៍ ឲ្យដោះលែងអ្នកជាប់ឃុំទាំង២៣នាក់ឲ្យមានសេរីភាពវិញ ដោយគ្មានលក្ខខណ្ឌ។
ក្នុងពិធីបួងសួងមាន ប្រលែងចាប បង្ហោះប៉ោងប៉ោង ដោយបិទរូបថតលោក វន់ ពៅ លោក ថេង សាវឿន និងសកម្មជនដីធ្លីបឹងកក់ លោក ចាន់ ពុទ្ធិស័ក្តិ។ ក្នុងនោះក៏មានភ្ជាប់សារមួយចំនួន ទៀតដូចជា «សូម អស់ទេវតា វត្ថុស័ក្តិសិទ្ធក្នុងលោកផ្តល់យុត្តិធម៌ដល់អ្នកទាំង២៣នាក់ និងសូមអស់ទេវតា អារុក្ខអារក្សវត្ថុស័ក្តិសិទ្ធក្នុងលោក បំភ្លឺផ្លូវដល់ប្រធានតុលាការ ឲ្យគាត់ភ្លឺស្វាង ដឹងខុស និងត្រូវ និងផ្តល់ភាពយុត្តិធម៌ដល់ប្រជាពលរដ្ឋខ្មែរ»។
នាយិកាអង្គការសីលការលោកស្រី ធីតា ឃឹះ មានប្រសាសន៍ថា សង្គមស៊ីវិលជាង១០០ស្ថាប័ន ជួបជុំគ្នានៅមុខព្រះអង្គដង្កើ គឺបួងសួងដល់វត្ថុស័ក្តិសិទ្ធិបន្ទន់ចិត្តប្រធានសាលាឧទ្ធរណ៍ ដោះលែងមនុស្ស២៣នាក់ កំពុងជាប់ឃុំនៅពន្ធនាគារ ត្រពាំងផ្លុង ឲ្យមានសេរីភាព និងមានយុត្តិធម៌ពិតប្រាកដសម្រាប់ពួកគេ «ជំនឿថា វត្ថុស័ក្តិសិទ្ធិនៅក្នុងប្រទេសកម្ពុជាយើង និងនៅលើពិភពលោកនេះ នឹងធ្វើយ៉ាងណាសូមឲ្យអ្នកដឹកនាំរបស់យើង ក៏ដូចជាប្រធានតុលាការ អនុវត្តទៅច្បាប់ និងផ្តល់យុត្តិធម៌ ដល់អ្នក២៣នាក់»។
អនុប្រធានអង្កេតសិទ្ធិមនុស្ស និងជំនួយផ្នែកច្បាប់នៅអង្គការអាដហុកលោក ណៃ វ៉ាន់ដា មានប្រសាសន៍ថា តុលាការគួរដោះលែងអ្នកទាំង២៣នាក់ ឲ្យមានសេរីភាព ដោយធ្វើការស៊ើបអង្កេតឲ្យបានច្បាស់លាស់ ព្រោះអ្នកទាំងនោះមិនមានទោសកំហុសអ្វីនោះទេ «យើងបានទទួលព័ត៌មានថា នៅថ្ងៃ១១នេះ នឹងធ្វើការសវនាការ អ៊ីចឹងយើងសំនូមពរឲ្យមន្ត្រីតុលាការ គាត់ពិចារណាក្នុងការដោះលែង នៅថ្ងៃ១១នោះតែម្តង ព្រោះគាត់មិនមានទោសកំហុសអ្វីទេ»។
អ្នកស្រី ប្រាក់ សុវណ្ណារី ភរិយា លោក វន់ ពៅ ឲ្យដឹងថាកាលពីថ្ងៃព្រហស្បតិ៍ម្សិលមិញ អ្នកស្រីបានទៅសួរសុខទុក្ខលោក វន់ ពៅ នៅពន្ធនាគារ ត្រពាំងផ្លុង ខេត្តកំពង់ចាម។ អ្នកស្រីថា ស្វាមីគាត់មានជំងឺធ្ងន់ធ្ងរ ស្លេកស្លាំង ស្គម និងរបួសគ្រាំក្នុងទៀតផង។
អ្នកស្រី ប្រាក់ សុវណ្ណារី ឲ្យដឹងទៀតថា លោក វន់ ពៅ បានផ្តាំផ្ញើតាមអ្នកស្រី ឲ្យអំពាវនាវទៅអង្គការជាតិ និងអន្តរជាតិ ជួយធានាលោក បាននៅក្រៅឃុំ ដើម្បីព្យាបាលជំងឺឲ្យបានទាន់ពេលវេលា បើមិនដូច្នេះទេ លោកនឹងត្រូវបាត់បងជីវិតក្នុង មណ្ឌលអប់រំ ម៣ នោះ «គាត់បាននិយាយថា គាត់មិនចង់ស្លាប់នៅក្នុងពន្ធនាគារទេ គាត់ចង់រស់នៅជិតគ្រួសារ ចង់ជួយមាតុភូមិរបស់គាត់ បន្តទៅទៀត។ គាត់មិនចង់ឲ្យខ្លួនប្រាណគាត់ នៅពេលដែលគាត់ស្លាប់ ស្លាប់នៅក្នុងពន្ធនាគារ ស្លាប់មិនមានអ្នកមើលឃើញគាត់ទេ។ គាត់ចង់ព្យាបាលខ្លួនគាត់ឲ្យបានជាហើយ គាត់ចង់ជួយប្រទេសគាត់តទៅទៀត»។
ទាក់ទងនិងករណីនេះ VOD មិនអាចសុំការបំភ្លឺពីប្រធានសាលាឧទ្ធរណ៍លោក យូ ប៊ុនឡេង បានទេ នៅព្រឹកថ្ងៃសុក្រនេះ។
ប្រធានសមាគម IDEA លោក វន់ ពៅ និងមនុស្ស២២នាក់ទៀត ដែលសមត្ថកិច្ចចាប់ឃុំ ក្នុងយុទ្ធនាការបង្ក្រាបកាលពីថ្ងៃទី២ និង ទី៣ខែមករា ខណៈ កម្មករធ្វើបាតុកម្មអហិង្សា ទាមទារប្រាក់ឈ្នួល១៦០ដុល្លារ។
ការប៉ះទង្គិចដូចគ្នា នៅមុខសួនឧស្សាហកម្មកាណាឌីយ៉ាកាលពីថ្ងៃទី៣ ខែមករា បានបណ្តាលឲ្យកម្មករ៥នាក់ស្លាប់ ជិត៤០នាក់រងរបួស និង២៣នាក់ទៀតត្រូវបានចាប់ខ្លួនទៅឃុំនៅមណ្ឌលអប់រំកែប្រែ ម៣ ក្នុងខេត្តកំពង់ចាម។ ក្រោយពីសាលាដំបូង បានបដិសេធសំណើសុំកូនក្តីឲ្យនៅក្រៅឃុំ ក្រុមមេធាវីការពារក្តី ជនទាំង២៣នេះ ធ្លាប់ឲ្យដឹងថាសាលាឧទ្ធរណ៍ អាចនឹងបើកសវនាការលើសំណុំរឿងសុំក្រៅឃុំ នៅថ្ងៃទី១១ ខែកុម្ភៈ ខាងមុខនេះ៕
No comments:
Post a Comment