គ្រូពេទ្យពិនិត្យភ្នែកកុមារនៅមន្ទីរពេទ្យមិត្តភាពខ្មែរ-សូវៀត កាលពីថ្ងៃទី២០ ខែមិថុនា ឆ្នាំ២០១៣។
(RFA / Uon Chhin)
មន្ទីរពេទ្យ មិត្តភាព ខ្មែរ-សូវៀត ផ្ដល់ ការព្យាបាលភ្នែក ដោយឥតគិតថ្លៃ ចាប់ពីថ្ងៃ៣ កុម្ភៈ
ក្រុមគ្រូពេទ្យ ផ្នែកព្យាបាលជំងឺភ្នែក នៃមន្ទីរពេទ្យ មិត្តភាព ខ្មែរ-សូវៀត បានអំពាវនាវ ដល់ ប្រជាពលរដ្ឋ ទាំងអស់ ដែលមានជំងឺភ្នែក ជាពិសេស ប្រជាពលរដ្ឋក្រីក្រ នៅតាមខេត្ត-ក្រុងនានា ឲ្យអញ្ជើញរួសរាន់ មកទទួល ការវះកាត់ ព្យាបាលភ្នែក នៅមន្ទីរពេទ្យ មិត្តភាព ខ្មែរ-សូវៀត ដោយឥតគិតថ្លៃ។
ដោយ អ៊ួន ឈិន / អាស៊ីសេរី | ៣១ មករា ២០១៤
ការទទួលព្យាបាលមានរយៈពេល ៥ថ្ងៃ ដែលនឹងចាប់ពីថ្ងៃទី៣ ដល់ថ្ងៃទី៧ ខែកុម្ភៈ ឆ្នាំ២០១៤។
ប្រធានអគារផ្នែកជំងឺភ្នែកនៃមន្ទីរពេទ្យមិត្តភាពខ្មែរ-សូវៀត គ្រូពេទ្យ ឱ ធីតា មានប្រសាសន៍នៅថ្ងៃទី៣១ ខែមករា ថា អ្នកមានជំងឺភ្នែកគ្រប់វ័យតាំងពីកុមារដល់មនុស្សចាស់ជរា អាចមកទទួលការព្យាបាលដោយឥតគិតថ្លៃ រួមទាំងថ្លៃបាយ និងថ្លៃបន្ទប់សម្រាកផង។
ដោយឡែក សម្រាប់អ្នកមានជំងឺបាតភ្នែកដែលបណ្ដាលមកពីជំងឺទឹកនោមផ្អែម ពួកគាត់អាចអញ្ជើញមកទទួលការពិនិត្យព្យាបាលនៅសប្ដាហ៍បន្ទាប់ពីយុទ្ធនាការនេះ។
អ្នកស្រី ឱ ធីតា បញ្ជាក់ថា មន្ទីរពេទ្យមិត្តភាពខ្មែរ-សូវៀត សហការជាមួយក្រុមគ្រូពេទ្យនៃមូលនិធិក្រុមគ្រូពេទ្យប្រទេសអូស្ត្រាលី ហៅថា ហ្វ្រេដហាឡូស៍ (Fred Hallows Foundation) និងមានការចូលរួមរបស់ក្រុមគ្រូពេទ្យពីប្រទេសសិង្ហបុរី ផង ក្នុងការយុទ្ធនាការព្យាបាលភ្នែកដោយឥតគិតថ្លៃលើកនេះ៕
stellar data recovery crack
ReplyDelete