ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ លោក ទៀ បាញ់ (រូបកណ្ដាល)
RFA / Sok Serey
លោក ទៀ បាញ់ ចោទ បក្សប្រឆាំង ចង់អូសទាញ ការគាំទ្រ ពី កងទ័ព ជួររដ្ឋាភិបាល
ដោយ វណ្ណ វិចារ / អាស៊ីសេរី | ១៣ កុម្ភៈ ២០១៤
ប្រមុខដឹកនាំក្រសួងការពារជាតិ ចោទថា បក្សប្រឆាំងចង់អូសទាញការគាំទ្រពីកងទ័ព ដើម្បីដូររដ្ឋាភិបាល។ ការថ្លែងបែបនេះ ធ្វើឡើងក្នុងពិធីបំពាក់ឋានន្តរស័ក្តិនាយឧត្តមសេនីយ៍ផ្កាយបួន ចំនួន ២៩នាក់បន្ថែមទៀត លើចំនួនផ្កាយបួនដែលមានស្រាប់ នៅព្រឹកថ្ងៃទី១៣ ខែកុម្ភៈ នៅក្រសួងការពារជាតិ។
ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ លោក ទៀ បាញ់ ប្រកាសពង្រឹងគោលជំហរកងទ័ព ដើម្បីឲ្យបន្តគាំទ្ររដ្ឋាភិបាលដែលដឹកនាំដោយបក្សប្រជាជនកម្ពុជា។ លោកបានស្នើឲ្យកងទ័ពក្រឡេកមើលការអភិវឌ្ឍនៅក្នុងប្រទេស ហើយកុំងាករេតាមការញុះញង់ណាមួយនោះ។ លោកក៏មានប្រសាសន៍រិះគន់ជាថ្មីទៅលើក្រុមមួយ ដែលទំនងជាសំដៅទៅបក្សប្រឆាំងថា ក្រុមនេះធ្លាប់បានកៀរគរពីកងទ័ព តាមរយៈការបង្កើតពាក្យស្លោកដូរៗ ការរៀបចំយុវជនជូនផ្កាឲ្យកងទ័ព និងការសន្យាដំឡើងប្រាក់ខែឲ្យកងទ័ពជាដើម។
«សំឡេង»
ទោះជាបែបណាក្តី មន្ត្រីអ្នកនាំពាក្យគណបក្សប្រឆាំង លោក យឹម សុវណ្ណ បានតបវិញថា បក្សប្រឆាំងតែងតែយកចិត្តទុកដាក់ចំពោះជីវភាពរស់នៅរបស់កងទ័ព។ លោកបន្តថា ការថ្លែងរបស់ លោក ទៀ បាញ់ គ្រាន់តែជាការភ័យខ្លាចនឹងប្រជាប្រិយភាពរបស់បក្សសង្គ្រោះជាតិ ប៉ុណ្ណោះ។
«សំឡេង»
លិខិតរបស់ក្រសួងការពារជាតិ ដែលចុះហត្ថលេខាដោយ លោក ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នៅថ្ងៃទី៣០ មករា បានស្នើសុំដំឡើងស័ក្តិនាយទាហានចំនួន ២៩រូប ដែលមាននាយទាហានថ្នាក់អនុរដ្ឋលេខាធិការចំនួន ១០រូប មាននាយទាហានថ្នាក់អគ្គមេបញ្ជាការរងចំនួន ៧រូប និងមានមេបញ្ជាការកងទ័ពជើងទឹក និងជើងអាកាសមួយចំនួនទៀត។
មួយថ្ងៃបន្ទាប់ លោកនាយករដ្ឋមន្ត្រី ហ៊ុន សែន បានយល់ព្រមលើសំណើនេះ និងបញ្ជូនថ្វាយព្រះមហាក្សត្រដើម្បីឡាយព្រះហស្តលេខារាជានុញ្ញាត។
ក្នុងការតែងតាំងនាយឧត្តមសេនីយ៍លើកនេះ ប្អូនប្រុស លោក ទៀ បាញ់ គឺឧត្ដមនាវីឯក ទៀ វិញ ក៏ត្រូវបានតែងតាំងជានាយឧត្តមសេនីយ៍ផ្កាយបួន ឲ្យត្រួតត្រាដែនសមុទ្រកម្ពុជា ដែរ។ នៅក្នុងជួរកងទ័ព រដ្ឋមន្ត្រីក្រសួងការពារជាតិ លោក ទៀ បាញ់ និងអគ្គបញ្ជាការកងទ័ព លោក ប៉ុល សារឿន សុទ្ធតែកាន់តំណែងជាសមាជិកអចិន្ត្រៃយ៍របស់គណបក្សប្រជាជនកម្ពុជា៕
No comments:
Post a Comment