ប្រជាពលរដ្ឋនាំគ្នាមកតវ៉ាឲ្យដោះលែងស្រ្តីម្នាក់នៅមុខតុលាការពោធិ៍សាត់
ពលរដ្ឋ តវ៉ា មុខតុលាការពោធិ៍សាត់ ឲ្យដោះលែង ស្ត្រីម្នាក់ ដែលចាប់ខ្លួន នៅពេលសមត្ថកិច្ច ដុតផ្ទះ
ដោយ៖ កាន់ វិច្ឆិកា / វីអូឌី | ថ្ងៃព្រហស្បតិ៍ ទី13 ខែកុម្ភៈ ឆ្នាំ2014
ប្រជាពលរដ្ឋរងគ្រោះដោយសារការដុតលំនៅឋានពីកម្លាំងចម្រុះខេត្តពោធិ៍សាត់ នៅថ្ងៃព្រហស្បតិ៍នេះ នាំគ្នាតវ៉ាមុខសាលាដំបូងខេត្ត ទាមទារឲ្យដោះលែងស្ត្រីម្នាក់ ដែលត្រូវបានចាប់ខ្លួន ដោយសមត្ថកិច្ចចោទថាបានប្តឹងឲ្យមានអន្តរាគមន៍ និងផ្តល់ព័ត៌មានទៅអ្នកសារព័ត៌មាន។
កាលពីថ្ងៃពុធ ផ្ទះរបស់ប្រជាពលរដ្ឋយ៉ាងហោចណាស់៦០ខ្នង នៅភូមិអូរធំ ហៅភូមិចម្ការចេក ឃុំក្រពើពីរ ស្រុកវាលវែង ខេត្តពោធិ៍សាត់ ត្រូវបានកម្លាំងចម្រុះ ដែលដឹកនាំដោយព្រះរាជអាជ្ញារងខេត្ត លោក ប៉ង់ ចាន់យុសុទ្ធារ៉ា ត្រូវបានដុតបំផ្លាញ ក្រោមហេតុសំអាងថា ជាតំបន់ការពារព្រៃឈើ។
អ្នកស្រី ខេន ច្រិប ប្រជាពលរដ្ឋដែលរងគ្រោះ និងបានតវ៉ានៅមុខសាលាដំបូងខេត្ត ប្រាប់ VOD នៅរសៀលថ្ងៃព្រហស្បតិ៍នេះថា ពលរដ្ឋជិត៣០នាក់ ដែលរងគ្រោះពីការដុតផ្ទះសម្បែងនៅខេត្តពោធិ៍សាត់ បានតវ៉ានៅមុខសាលាដំបូងខេត្ត ទាមទាររកយុត្តិធម៌ពីការដុតលំនៅឋាន បណ្តេញចេញដោយបង្ខំ ព្រមទាំងឲ្យដោះលែងស្ត្រីម្នាក់ ឈ្មោះ ស៊ិន ស៊ាន ដែលត្រូវបានចាប់ខ្លួន «គេដុតផ្ទះគាត់ហើយគាត់ចេះតែតេឲ្យកូន កូនគាត់ប្រុសៗ ចេះតែទៅមើលគេ គាត់ចេះតែតេតាម ខ្លាចកូនគាត់ហ្នឹង វាទៅប្រើហិង្សាអីដាក់គេអញ្ចឹង ដល់ពេលហើយ គេស្មានតែគាត់តេប្តឹង គេរករឿងគាត់ចាប់ខ្លួនគាត់មក»។
ប្រជាពលរដ្ឋរងគ្រោះម្នាក់ទៀត លោក ស៊ិម វណ្ណី ប្រាប់ថា នៅថ្ងៃនេះ អាជ្ញាធរ កំពុងតែបន្តដុតទៀត ដោយមិនដឹងថាអស់ប៉ុន្មានខ្នងនៅឡើយទេ។ លោកបន្តថា ពលរដ្ឋទាំងអស់ នឹងតវ៉ា ទាមទារឲ្យស្វែងរកយុត្តិធម៌ រហូតដល់មានដំណោះស្រាយសមស្របទើបពួកគាត់បញ្ឈប់ការតវ៉ានេះ «ខ្ញុំនឹងធ្វើដល់ទីបញ្ចប់ បើសាលាក្រុងនេះ មិនដោះស្រាយឲ្យប្រជាពលរដ្ឋខ្ញុំ ខ្ញុំនឹងទៅដល់សាលាក្រុងភ្នំពេញ ហើយបន្តទៀត អត់បញ្ឈប់ត្រឹមថ្ងៃនេះទេ ទាល់តែរកដំណោះស្រាយជូនប្រជាពលរដ្ឋខ្ញុំ ឲ្យមានសិទ្ធិសេរីភាព រស់នៅកន្លែងដើមវិញ ហើយដោះលែងលោកស្រី ស៊ិន ស៊ាន នោះឡើងវិញ បានខ្ញុំឈប់បន្ត»។
អភិបាលខេត្តពោធិ៍សាត់ លោក ខូយ សុខា មានប្រសាសន៍ថា ការចុះអនុវត្តនេះ គឺធ្វើទៅតាមវិធានការចម្រុះរបស់រដ្ឋាភិបាល ហើយលោកក៏បានរុញសំណួរលម្អិតទៅកាន់អភិបាលស្រុកវាលវែងបន្ត «ក្នុងករណីនេះ វាជាផែនការរួមរបស់រដ្ឋាភិបាលយើង ដែលទាក់ទងនឹងបញ្ហា ការគ្រប់គ្រងដីនៃរដ្ឋ ក្នុងការទប់ស្កាត់ពីការទន្ទ្រាន ការកាន់កាប់ ការដុតបំផ្លាញព្រៃឈើ»។
VOD មិនអាចទាក់ទងអភិបាលស្រុកវាលវែង ព្រះរាជអាជ្ញារងខេត្តពោធិ៍សាត់ លោក ប៉ង់ ចាន់យុសុទ្ធារ៉ា រួមនឹងមន្ត្រីដែលមានសមត្ថកិច្ចពាក់ព័ន្ធ ដើម្បីអត្ថាធិប្បាយលើបញ្ហានេះបាននៅឡើយទេ។
មន្ត្រីឃ្លាំមើលការរំលោភសិទ្ធិមនុស្សរបស់អង្គការលីកាដូ ប្រចាំខេត្តពោធិ៍សាត់ កញ្ញា មិត សាមួន មានប្រសាសន៍ថា កាលពីម្សិលមិញ ពេលដែលក្រុមការងាររបស់កញ្ញាចុះទៅ សមត្ថកិច្ចបានបណ្តេញក្រុមកញ្ញាចេញ ព្រមទាំងលុបរូបភាពពីការបង្ក្រាបដែលកញ្ញាថតបានចេញពីកាមេរ៉ាទាំងអស់៕
No comments:
Post a Comment