លោក ហោ ណាំហុង រដ្ឋមន្ត្រីការបរទេសកម្ពុជា និងលោកស្រី ជូលី ប៊ីស្សប (Julie Bishop) រដ្ឋមន្ត្រីការបរទេសអូស្ត្រាលី ក្នុងសន្និសីទសារព័ត៌មានរួម ថ្ងៃទី២២ ខែកុម្ភៈ ឆ្នាំ២០១៤។
© Shiv Channa
បញ្ហានយោបាយ ជារបៀបវារៈ សំខាន់មួយ នៃទស្សនកិច្ច រដ្ឋមន្ត្រី ការបរទេសអូស្ត្រាលី នៅកម្ពុជា
ក្នុងដំណើរទស្សនកិច្ច របស់ លោកស្រី ជូលី ប៊ីស្សប (Julie Bishop) រដ្ឋមន្ត្រី ការបរទេស អូស្ត្រាលី នៅកម្ពុជា នៅពេលនេះ បញ្ហានយោបាយ ត្រូវបាន ភាគីទាំងពីរ លើកមកពិភាក្សា។ ប្រមុខការទូតអូស្ត្រាលី បានសាទរ ចំពោះលទ្ធផល នៃការចរចា រវាង គណបក្ស ប្រជាជនកម្ពុជា និងគណបក្ស សង្គ្រោះជាតិ ស្តីពី កំណែទម្រង់បោះឆ្នោត។ លោកស្រី ក៏អះអាងដែរ ថា អូស្ត្រាលីគាំទ្រ ប្រជាធិបតេយ្យ នៅកម្ពុជា។ យ៉ាងណាក៏ដោយ ភាគីជម្លោះនៅកម្ពុជា នៅតែតឹងសរសៃក ដាក់គ្នា នៅឡើយ ទោះបីជា ការចរចា កំពុងប្រព្រឹត្ត ទៅក៏ដោយ។
រដ្ឋមន្ត្រីការបរទេសអូស្ត្រាលី លោកស្រី ជូលី ប៊ីស្សប (Julie Bishop) ដែលកំពុងបំពេញទស្សនកិច្ចនៅកម្ពុជាពេលនេះបានថ្លែងសាទរដល់លទ្ធផលនៃកិច្ចចរចារវាងគណបក្សប្រជាជនកម្ពុជានិងគណបក្សសង្គ្រោះជាតិស្តីពីកំណែទម្រង់បោះឆ្នោតកាលពីថ្ងៃទី ១៨ កុម្ភៈ។ លទ្ធផលដែលគណបក្សទាំងពីរស្រុះស្រួលគ្នាបង្កើតគណៈកម្មការចម្រុះដើម្បីជជែកអំពីកំណែទម្រងការបោះឆ្នោតនៅកម្ពុជា។
លោកស្រី ជូលី ប៊ីស្សប បានថ្លែងដូច្នេះនៅក្នុងសន្និសីទកាសែតរួមគ្នាមួយក្រោយពីជំនួបជាមួយលោក ហោ ណាំហុងនៅឯក្រសួងការបរទេសកម្ពុជានៅព្រឹកថ្ងៃសៅរ៍ទី ២២កុម្ភៈនេះ។ ប្រមុខការទូតអូស្ត្រាលីក៏បានបញ្ជាក់ថា អូស្ត្រាលីគាំទ្រលទ្ធិប្រជាធិបតេយ្យនៅកម្ពុជា។ យ៉ាងណាក៏ដោយ ភាគីជម្លោះនៅកម្ពុជាហាក់នៅតែតឹងសរសៃកដាក់គ្នានៅឡើយ។លោក ហោ ណាំហុង រដ្ឋមន្ត្រីការបរទេសកម្ពុជាបានថ្លែងថា វិបត្តិនយោបាយនេះត្រូវបានគណបក្សប្រឆាំងរៀបចំជាមុនតាំងពីមុនពេលបោះឆ្នោត។ យ៉ាងណាក៏ដោយលោកអះអាងថា បើគណបក្សប្រឆាំងចង់ឲ្យមានការបោះឆ្នោតមុនអាណត្តិគណបក្សនេះត្រូវចូលទៅជជែកគ្នាក្នុងរដ្ឋសភា គឺមិនមែនជជែកនៅតាមចិញ្ចើមផ្លូវទេ។
ប៉ុន្តែ ការចូលអង្គុយក្នុងសភាមិនមែនជាលក្ខខណ្ឌងាយទេសម្រាប់គណបក្សសង្គ្រោះជាតិ។ លោក កឹម សុខា អនុប្រធានគណបក្សសង្គ្រោះជាតិដែលចាត់ទុកសភានិងរដ្ឋាភិបាលរបស់គណបក្សប្រជាជនកម្ពុជាថា មិនស្របច្បាប់នោះ អះអាងថា នឹងមិនចូលទៅអង្គុយក្នុងសភាដើម្បីផ្តល់ភាពស្របច្បាប់ដល់សភានិងរដ្ឋាភិបាលបក្សកាន់អំណាចនោះឡើយ។
បើតាមលោក កឹម សុខា កិច្ចចរចាស្តីពីកំណែទម្រង់បោះឆ្នោតនេះមិនមែនជាដំណោះស្រាយនយោបាយទេប្រសិនបើគណបក្សប្រជាជនកម្ពុជាមិនព្រមបោះឆ្នោតមុនអាណត្តិទេនោះ។ យ៉ាងណាក៏ដោយ ក្នុងជំនួបពិភាក្សានៅព្រឹកថ្ងៃសៅរ៍នេះដែរ លោកនាយករដ្ឋមន្ត្រី ហ៊ុន សែន បានសុំឲ្យប្រទេសអូស្ត្រាលីជួយកម្ពុជាអំពីកំណែទម្រង់បោះឆ្នោត។ សំណើនេះត្រូវបានប្រមុខការទូតអូស្ត្រាលីទទួលយក៕
No comments:
Post a Comment