ព្រះអង្គ លួន សុវាត ជូនអំណោយសប្បុរសធម៌ដល់គ្រួសារជនរងគ្រោះ ដោយការបង្ក្រាបរបស់សមត្ថកិច្ច (រូបថត៖ ញឹម សុខន)
ព្រះសង្ឃ មួយអង្គ ជំរុញឲ្យ រដ្ឋាភិបាល គោរព រដ្ឋធម្មនុញ្ញ
ដោយ៖ ញឹម សុខន / វីអូឌី | ថ្ងៃអាទិត្យ ទី23 ខែកុម្ភៈ ឆ្នាំ2014
ព្រះសង្ឃ មួយអង្គ ដែលធ្លាប់បង្ហាញ ព្រះភក្ត្រញឹកញាប់ ជាមួយ ក្រុមអ្នកតស៊ូមតិ រឿងដីធ្លី និងយុត្តិធម៌សង្គម នៅថ្ងៃអាទិត្យនេះ អំពាវនាវ ឲ្យរដ្ឋាភិបាល គោរព រដ្ឋធម្មនុញ្ញ នៃព្រះរាជាណាចក្រកម្ពុជា។
ការអំពាវនាវនេះ ធ្វើឡើងស្របពេលដែលនៅដើមឆ្នាំ២០១៤នេះ មានមនុស្សយ៉ាងតិច៧នាក់ត្រូវបានគេបាញ់សម្លាប់ ជាង៤០នាក់ផ្សេងទៀតត្រូវគេបាញ់ឲ្យរងរបួស ពេលសមត្ថកិច្ចចុះបង្ក្រាបបាតុកម្ម។
ព្រឹត្តិការណ៍បាញ់សម្លាប់នោះ មានបុរសម្នាក់ត្រូវគេបាញ់សម្លាប់ នៅគល់ស្ពានក្បាលថ្នល់ ស្ត្រីលក់បាយម្នាក់ត្រូវគេបាញ់សម្លាប់នៅគល់ស្ពានស្ទឹងមានជ័យ កម្មករ៥នាក់ទៀតត្រូវគេបាញ់សម្លាប់នៅផ្លូវវ៉េងស្រេង រាជធានីភ្នំពេញ។
ព្រះអង្គ លួន សុវាត ដែលអាជ្ញាធរធ្លាប់ឃាត់ព្រះកាយញឹមញាប់ ដោយសារព្រះអង្គតាមឃ្លាំមើល អ្នករងគ្រោះរឿងដីធ្លី និងព្រឹត្តិការណ៍តវ៉ាផ្សេងៗទៀត មានសង្ឃដីការ ក្នុងពិធីផ្តល់ជំនួយសប្បុរសធម៌ដល់អ្នករងគ្រោះជិត៦០នាក់ នៅតំបន់បឹងកក់នាថ្ងៃទី២៣ ខែកុម្ភៈនេះថា អាជ្ញាធរ ក៏ដូចជាសមត្ថកិច្ចរបស់រដ្ឋាភិបាល មិនគួរយកអាវុធទៅបាញ់សម្លាប់ពលរដ្ឋខ្លួនឯង ដែលតវ៉ាមានតែដៃទទេនោះទេ។
ព្រះអង្គបន្តថា ការសម្លាប់មនុស្ស ហើយជនដៃដល់ មិនត្រូវបានចាប់យកមកផ្តន្ទាទោសជាទង្វើមួយ បង្ហាញថា រដ្ឋធម្មនុញ្ញដែលធានាសិទ្ធិពលរដ្ឋ មិនត្រូវរដ្ឋាភិបាលយកមកអនុវត្តទេ។
កាលពីថ្ងៃទី២ និងទី៣ ខែមករា ឆ្នាំ២០១៤ កម្មករយ៉ាងតិច៥នាក់ត្រូវសមត្ថកិច្ច របស់រដ្ឋាភិបាលបាញ់សម្លាប់ និងជាង៤០នាក់ទៀតរងរបួស ខណៈពួកគេតវ៉ាទាមទារប្រាក់ឈ្នួល១៦០ដុល្លារ ដើម្បីរស់នៅបានសមរម្យ។
ព្រះអង្គ លួន សុវាត បង្ហាញការសោកស្តាយថា បើរដ្ឋាភិបាល ខកខានចាប់ ជនដៃដល់ មកផ្តន្ទាទោស ហាក់បង្ហាញថា ជីវិតកម្មករម្នាក់មិនស្មើនឹងតម្លៃទឹកប្រាក់១៦០ដុល្លារ ដែលជនដៃដល់ ហ៊ានដកអាវុធបាញ់សម្លាប់។
ទោះជាយ៉ាងណាលោកនាយរដ្ឋមន្ត្រី ហ៊ុន សែន ធ្លាប់អំពាវនាវឲ្យកម្លាំងប្រដាប់អាវុធ ការពាររដ្ឋធម្មនុញ្ញ បន្ទាប់ពីមានការរិះគន់ថា លោកកំពុងដឹកនាំរដ្ឋាភិបាលក្រោយការបោះឆ្នោត ជារដ្ឋាភិបាលឯកបក្ស មិនស្របរដ្ឋធម្មនុញ្ញ។
យ៉ាងណាក៏ដោយ ក្រោយព្រឹត្តិការណ៍បាញ់ប្រហារ រដ្ឋាភិបាល បានបង្កើតគណៈកម្មការចម្រុះមួយ ដើម្បីស៊ើបអង្កេតករណីនេះ។ ប៉ុន្តែអ្នកតាមដានព្រឹត្តិការណ៍សង្គមហាក់មានជំនឿតិចតួចលើវិធានការនេះ៕
No comments:
Post a Comment