CNRP ខកចិត្ត ចំពោះ ការមិនដាក់ សមាសភាព របស់ខ្លួន ក្នុងគណៈកម្មការ កែទម្រង់ ការបោះឆ្នោត
ដោយ៖ ឡាយ សាមាន / វីអូឌី | ថ្ងៃពុធ ទី12 ខែកុម្ភៈ ឆ្នាំ2014
គណបក្សសង្គ្រោះជាតិ នៅថ្ងៃពុធនេះ សោកស្តាយចំពោះសេចក្តីសម្រេចរបស់រាជរដ្ឋាភិបាល ដឹកនាំដោយគណបក្សប្រជាជនកម្ពុជា ដែលបង្កើតគណៈកម្មការសិក្សាស្រាវជ្រាវ កែទម្រង់លើការបោះឆ្នោត ដោយមិនបានដាក់បញ្ចូលសមាសភាព មកពីគណបក្សសង្គ្រោះជាតិ។
សេចក្តីថ្លែងការណ៍របស់គណបក្សសង្គ្រោះជាតិ ចេញផ្សាយនៅថ្ងៃទី១២ ខែកុម្ភៈនេះ បានហៅសេចក្តីសម្រេចបង្កើតគណៈកម្មការ កែទម្រង់បោះឆ្នោត ដោយមិនមានការប្រឹក្សាយោបល់ ឬការព្រមព្រៀងជាមុនពីគណបក្សសង្គ្រោះជាតិនេះ គឺផ្ទុយទាំងស្រុងនឹងស្មារតីនៃសេចក្តីប្រកាសរួម ថ្ងៃទី១៦ ខែកញ្ញា ឆ្នាំ២០១៣។ សេចក្តីថ្លែងការណ៍ ក៏ស្នើសុំឲ្យបង្កើតគណៈកម្មការរួមមួយ ដែលមានសមាសភាពស្មើគ្នាមកពីគណបក្សសង្គ្រោះជាតិ និងគណបក្សប្រជាជនកម្ពុជា ស្របតាមស្មារតីនៃសេចក្តីប្រកាសរួមនៃជំនួបកំពូល កាលពីថ្ងៃទី ១៦ ខែកញ្ញា ឆ្នាំ២០១៣ ដើម្បីសិក្សាស្រាវជ្រាវ លើការកែទម្រង់ការបោះឆ្នោត។
គួរបញ្ជាក់ថា សេចក្តីសម្រេចរួមនៃជំនួបកំពូលរវាងគណបក្សសង្គ្រោះជាតិ និងគណបក្សប្រជាជនកម្ពុជា កាលពីថ្ងៃទី១៦ ខែកញ្ញា ឆ្នាំ២០១៣ ត្រង់ចំណុចទី២ បានចែងថា ភាគីទាំងពីរ បានព្រមព្រៀងគ្នានឹងបង្កើតយន្តការមួយ ដើម្បីកែទម្រង់ការបោះឆ្នោតនាពេលខាងមុខនេះ។
ជាមួយគ្នានេះដែរ គណបក្សសង្គ្រោះជាតិ អំពាវនាវឲ្យមានការចូលរួមយ៉ាងទូលំទូលាយ ពីសំណាក់សង្គមស៊ីវិល អង្គការអន្តរជាតិ និងដៃគូរអភិវឌ្ឍន៍នានា ដើម្បីជម្រុញឲ្យយន្តការកែទម្រង់ការបោះឆ្នោត ប្រព្រឹត្តទៅដោយរលូន និងមានដំណើរការលឿនទៅមុខ និងអាចទទួលយកបានពីគ្រប់ភាគីពាក់ព័ន្ធ ក្នុងគោលដៅធានាឲ្យការរៀបចំការបោះឆ្នោតលើកក្រោយទៀត ប្រព្រឹត្តទៅដោយសេរី ត្រឹមត្រូវ និងយុត្តិធម៌ស្របតាមស្តង់ដារអន្តរជាតិ។
កាលពីចុងឆ្នាំ២០១៣ លោក ហ៊ុន សែន បានតែងតាំងលោក ស ខេង ធ្វើជាប្រធានគណៈកម្មការសិក្សាស្រាវជ្រាវ កែទម្រង់លើការបោះឆ្នោត បន្ទាប់ពីការរិះគន់ថា ការបោះឆ្នោតកន្លងមក ធ្វើឡើងដោយ គជប មិនឯករាជ្យ៕
No comments:
Post a Comment