CNRP រៀបចំ ពិធីថ្លែងអំណរគុណ ក្រុមអ្នកស្ម័គ្រចិត្ត ជួយការងារខ្លួន នៅសៀលនេះ
ដោយ៖ តាំង វីដា / វីអូឌី | ថ្ងៃសៅរ៍ ទី22 ខែកុម្ភៈ ឆ្នាំ2014
គណបក្សសង្គ្រោះជាតិ នៅរសៀលថ្ងៃសៅរ៍នេះ នឹងរៀបចំពិធីជួបជុំនៅទីស្នាក់ការកណ្តាលរបស់គណបក្ស ដើម្បីថ្លែងអំណរគុណដល់អ្នកស្ម័គ្រចិត្តជួយការងារ និងក្រុមអ្នកជួយសម្របសម្រួល មហាបាតុកម្មអហិង្សាកន្លងមករបស់គណបក្សនេះ។
មន្ត្រីជាន់ខ្ពស់គណបក្សសង្គ្រោះជាតិ លោកស្រី មូរ សុខហួរ ប្រាប់VOD ឲ្យដឹងថា ពិធីជួបជុំនេះ ចាប់ផ្តើមពីម៉ោង២ រសៀល រហូតដល់ម៉ោង ៦ល្ងាច ដោយមានការចូលរួមពីថ្នាក់ដឹកនាំកំពូលគណបក្សនេះ គឺលោក សម រង្ស៊ី និងលោក កឹម សុខា និងអ្នកចូលរួមប្រមាណ៥០០នាក់ រួមនឹងព្រះសង្ឃ ជាង១០អង្គ នឹងធ្វើពិធីសូត្រមន្ត។ លោកស្រីបន្តថា ពិធីថ្លែងអំណរគុណនេះ ធ្វើឡើងក្នុងគោលបំណងសំខាន់ គឺគូសបញ្ជាក់ពីការលះបង់ពេលវេលា ការខិតខំប្រឹងប្រែងរបស់ក្រុមការងារ ក៏ដូចជាអ្នកស្ម័គ្រចិត្ត ដែលបានចូលរួមការងារយ៉ាងសកម្ម ក្នុងការដំណើរការ មហាបាតុកម្មអហិង្សារបស់គណបក្សនេះ ទាមទារឲ្យស៊ើបអង្កេតភាពមិនប្រក្រតីនៃការបោះឆ្នោត និងការទាមទារបោះឆ្នោតឡើងវិញមុនអាណត្តិ នាពេលកន្លងមក។
លោកស្រី មូរ សុខហួរ ឲ្យដឹងទៀតថា ក្រុមការងារអ្នកស្ម័គ្រចិត្តនេះ ត្រូវបានបែងចែកជា ១០ក្រុម ភាគច្រើនជាយុវជន និងយុវតី ដែលបានជួយផ្តល់សេវាថ្នាំពេទ្យ សេវាប្រមូលនីធិទ្រទ្រង់មហាបាតុកម្ម និងសេវាសម្របសម្រួលដំណើរការបាតុកម្មទាំងមូលផងដែរ។
តាមការអះអាងរបស់អ្នកឃ្លាំមើលព្រឹត្តិការណ៍សង្គម ឲ្យដឹងថា អំឡុងយុទ្ធនាការបោះឆ្នោត និងក្រោយការបោះឆ្នោត យុវជន មានការចាប់អារម្មណ៍ទៅលើការតាមដានព្រឹត្តិការណ៍សង្គម និងការវិវឌ្ឍន៍ស្ថានភាពនយោបាយនៅកម្ពុជា ដែលកត្តានេះ ធ្វើឲ្យអ្នកនយោបាយភាគច្រើន បង្កើនការប្រុងប្រយ័ត្ន យកចិត្តទុកដាក់ខ្លាំង ដើម្បីឆ្លើយតបតម្រូវការរបស់យុវជន៕
No comments:
Post a Comment