ពលរដ្ឋ បារម្ភខ្លាច ឆ្លងជំងឺ H5N1 ខណៈឃើញ សត្វទាងាប់ នៅកំពង់ធំ
ដោយ៖ បូ សាវី | ថ្ងៃអង្គារ ទី4 ខែកុម្ភៈ ឆ្នាំ2014
ប្រជាពលរដ្ឋនៅស្រុកបារាយណ៍ ខេត្ដកំពង់ធំ សម្ដែងការព្រួយបារម្ភខ្លាចឆ្លងជំងឺគ្រុនផ្ដាសាយបក្សី បន្ទាប់ពីសត្វទារាប់ម៉ឺនក្បាល ដែលពួកគេចិញ្ចឹម បានឈឺងាប់ជាបន្ដបន្ទាប់ ខណៈពេទ្យជំនាញរកឃើញជំងឺនោះជាជំងឺអាសន្នរោគទា។
ពលរដ្ឋនៅភូមិវាលអំពិល ឃុំទ្រាល ស្រុកបារាយណ៍ លោក ហ៊ិន សេង ប្រាប់VODនៅថ្ងៃអង្គារនេះថា សត្វទារបស់លោករាប់រយក្បាល បានឈឺងាប់ជាបន្ដបន្ទាប់ ចាប់តាំងពីខែធ្នូឆ្នាំ២០១៣កន្លងមក ដោយពេទ្យសត្វព្យាបាលមិនទាន់ជាស្បើយឡើយ។ លោកបន្ដថា ពលរដ្ឋ ក៏ដូចក្រុមគ្រួសារលោកមានការបារម្ភ ដោយខ្លាចឆ្លងជំងឺគ្រុនផ្ដាសាយបក្សី បើទោះបីពេទ្យសត្វអះអាងថា មិនមានជំងឺ H5N1 ក៏ដោយ «ងាប់[ទា]ជួនកាល២០ ជួនកាល១៥ ជួនកាល១២ វាមិនទៀង រាប់ពី១០លើស ២០ចុះមួយយប់ៗ។ ដាក់ថ្នាំពេទ្យដល់ទៅ៣ ពេទ្យសត្វយើងនៅឃុំក៏មាន ពេទ្យស្រុកយើងក៏មាន ពេទ្យនៅភ្នំពេញក៏មាន។ ខ្ញុំកំពុងពិបាក មិនដឹងជាគិតរបៀបម៉េច ខ្លះងាប់មិនស្នើគ្នាទេ មានអ្នកខ្លះងាប់[ទា] ដល់ថ្នាក់ម្ចាស់យំ ជំពាក់គេនោះក៏មាន»។
ពលរដ្ឋមួយរូបទៀត នៅភូមិព្រៃវែង លោក ឡូត លេខ ឲ្យដឹងថា សត្វទាលោកជាង១ពាន់ក្បាល បានឆ្លងជំងឺពីទ្រុងមួយទៅទ្រុងមួយ ប៉ុន្ដែសត្វទារបស់លោកងាប់មិនច្រើនដូចអ្នកចិញ្ចឹមផ្សេងឡើយ ហើយលោកក៏បារម្ភឆ្លងជំងឺផ្ដាសាយបក្សីដែរ។ លោកបន្ថែមថា សត្វទាដែលងាប់នោះ លោកមិនបានយកទៅទទួលទាន និងលក់ឲ្យអ្នកផ្សេងឡើយ គឺកប់ចោល ហើយមកដល់ពេលនេះ សត្វទាក៏មិនសូវងាប់ដូចពីចុងឆ្នាំ២០១៣ និងដើមឆ្នាំ២០១៤នេះដែរ «គ្រាន់តែផុតពីទ្រុងមួយ វាចូលទ្រុងមួយ។ ទ្រុងមួយព្យាបាលជា វាទៅទ្រុងមួយទៀត ដូចឆ្លងគ្នាយ៉ាងម៉េចទេ បើមើលសព្វៗទៅ។ ឲ្យតែថារៀងខ្យល់វ៉ុលបន្តិចទៅ វាចេះតែឆ្លងនេះមួយ នោះមួយ ទ្រុងក៏ត្រូវតែជ្រលក់ជើងដែរ ដើរទៅនេះទៅនោះក្នុងភូមិ បកមកវិញ ខ្ញុំជ្រលក់បន្តិចទើបចូលទ្រុង»។
VOD មិនទាន់អាចទាក់ទងមន្ដ្រីសុខាភិបាល និងមន្ទីរកសិកម្ម ខេត្ដកំពង់ធំ បាននៅឡើយទេ។ ប៉ុន្ដែពេទ្យសត្វឯកជន នៅតាំងគោក ស្រុកបារាយណ៍ ដែលចុះព្យាបាលសត្វនៅកន្លែងផ្ទាល់ លោក ចាន់ វុត្ថា មានប្រសាសន៍ថា ចាប់ចុងឆ្នាំ២០១៣ រហូតដល់ពេលនេះ សត្វទាងាប់ប្រហែល៥ម៉ឺនក្បាល ទៅជាង៦ម៉ឺនក្បាល ដែលលោកអះអាងថា ជាជំងឺអាសន្នរោគទា។ លោកបន្ដថា តាមការយកសត្វទាទៅពិនិត្យ គឺមិនមានមានកើតជំងឺគ្រុនផ្ដាសាយបក្សីនោះឡើយ «ពីកន្លងប៉ុន្មានឆ្នាំមុនមក ជំងឺប្រភេទនេះ វាអាចបុកងាប់ច្រើនទ្រុង។ តែឥឡូវនេះវាមិនអីទេ ក្នុងមួយទ្រុង វាងាប់៥០-៦០ ទាអីទេ ១០-២០ទា តាមទ្រុង តាមប្រភេទជំងឺស្រាលធ្ងន់។ អត់ទេ ព្រោះអីយកឲ្យគេមើលហើយ វាមិនមានពាក់ព័ន្ធផ្តាសាយបក្សីនៅទេ វាជាប្រភេទជំងឺធម្មតាទេ»។
កាលពីខែតុលា ឆ្នាំ២០១៣ កុមារីអាយុ៨ឆ្នាំម្នាក់ នៅឃុំពង្រ ស្រុកបារាយណ៍ ខេត្ដកំពង់ធំ ត្រូវបានកើតជំងឺគ្រុនផ្ដាសាយបក្សីH5N1 ដែលក្រសួងសុខាភិបាលប្រកាសថា កុមារីម្នាក់នោះអាចមកពីប៉ះមាន់ទា ឬសត្វដែលងាប់។ ប៉ុន្ដែមិនបណ្ដាលឲ្យបាត់បង់ជីវិតឡើយ ដោយសារក្រុមគ្រួសារបញ្ជូនទៅសង្គ្រោះបន្ទាន់ នៅមន្ទីរពេទ្យគន្ធបុប្ផា ខេត្ដសៀមរាប។
គួរបញ្ជាក់ថា ជំងឺផ្ដាសាយបក្សី បានកើតឡើង២៦ករណី នៅក្នុងឆ្នាំ២០១៣ ដែលក្នុងនោះ ១៣នាក់បានស្លាប់ និង១២នាក់បានជាសះស្បើយ ប៉ុន្ដែនៅឆ្នាំ២០១៤នេះ មិនទាន់មាននៅឡើយទេ៕
No comments:
Post a Comment