ពលរដ្ឋ និងព្រះសង្ឃស្រុកថ្មបាំង បន្តបិទផ្លូវ រារាំងក្រុមហ៊ុនចិន ធ្វើទំនប់វារីអគ្គិសនី ឆាយអារ៉ែង ដើម្បីជំរុញ រដ្ឋាភិបាល លុបចោល គម្រោងអភិវឌ្ឍនេះ
ដោយ៖ ម៉ៅ ចរិយា / វីអូឌី | ថ្ងៃចន្ទ ទី24 ខែមិនា ឆ្នាំ2014
ប្រជាពលរដ្ឋនិងព្រះសង្ឃប្រមាណ ១០០នាក់ និងអង្គ នៅព្រឹកថ្ងៃចន្ទនេះ បន្តបិទផ្លូវ ដើម្បីរារាំងការចូលធ្វើការរបស់កម្មករចិននៅទំនប់វារីអគ្គិសនី ឆាយអារ៉ែង ឃុំថ្មបាំង ស្រុកថ្មបាំង ខេត្ដកោះកុង ដោយសារគម្រោងអភិវឌ្ឍនេះប៉ះពាល់ធ្ងន់ធ្ងរដល់បរិស្ថានធម្មជាតិ និងបានផលចំណេញតិចតួច។
មន្ត្រីសម្របសម្រួលជម្លោះដីធ្លីអង្គការលីកាដូប្រចាំខេត្តកោះកុង លោក អ៊ិន គង់ជិត ប្រាប់ VOD នៅព្រឹកនេះថា ប្រជាពលរដ្ឋ និងព្រះសង្ឃឯករាជ្យប្រមាណ ១០០នាក់ និងអង្គ កំពុងបិទផ្លូវដើម្បីរារាំងការចូលធ្វើការរបស់កម្មករចិន នៅទំនប់ ឆាយអារ៉ែង ដើម្បីទាមទារឲ្យអាជ្ញាធរ និងរាជរដ្ឋាភិបាលលុបចោលការសាងសង់ទំនប់វារីអគ្គិសនីនេះ។
លិខិតចំហរបស់វេទិកានៃអង្គការមិនមែនរដ្ឋាភិបាលស្តីពីកម្ពុជា កាលពីថ្ងៃទី១៧ ខែធ្នូ ដាក់ជូនលោក ហ៊ុន សែន បានរកឃើញថា ប្រសិនបើសាងសង់ទំនប់វារីអគ្គិសនីនេះ នោះប្រជាជនប្រមាណ ៣៨៩ គ្រួសារ (១.៦៤២ នាក់) និងព្រៃឈើប្រហែលជា ២០.០០០ ហិចតា នឹងរងផលប៉ះពាល់។
ទំនប់វារីអគ្គិសនី ឆាយអារ៉ែង ទទួលបានការវិនិយោគពីក្រុមហ៊ុន ឆាយណា ហ្គូដៀន ខូផឺរេសិន (China Guodian Corporation) ដែលត្រូវបានចុះអនុស្សរណៈយោគយល់ជាមួយរាជរដ្ឋាភិបាលកម្ពុជានៅខែវិច្ឆិកា ឆ្នាំ ២០១០ បន្ទាប់ពីការដកខ្លួនចេញរបស់ក្រុមហ៊ុន ឆាយណា សាវដិន ផាវឺគ្រីត ដោយសារតែគម្រោងអាចនឹងបង្កឲ្យមានផលប៉ះពាល់បរិស្ថានខ្លាំង។
ទំនប់នេះជាគម្រោង សាងសង់ ប្រតិបត្តិ និង ផ្ទេរ (BOT) ដែលនឹងត្រូវការពេល បួនឆ្នាំកន្លះដើម្បីសាងសង់ និងមានកម្រិតសមត្ថភាព ១០៨ មេហ្កាវ៉ាត់ ដោយចំណាយទឹកប្រាក់សរុប ៣២៧ លាន ដុល្លារសហរដ្ឋអាមេរិក។
សង្គមស៊ីវិល ព្រួយបារម្ភយ៉ាងខ្លាំងចំពោះការបាត់បង់នូវទំនៀមទម្លាប់ ប្រពៃណី និងការប្រតិបត្តិប្រចាំថ្ងៃរបស់បងប្អូនជនជាតិដើម "ជង" ដូចជា ចំការវិលជុំ ព្រៃអារក្ស ផ្នូរបុព្វបុរស លំនៅដ្ឋាន និងព្រៃឈើដែលជាកន្លែងទទួលអនុផលប្រចាំថ្ងៃរបស់ពួកគាត់។
តំបន់ដែលគ្រោងនឹងសាងសង់ទំនប់ គឺជាតំបន់ដែលមានសក្តានុពលផ្នែកធម្មជាតិកម្រមួយ បន្ទាប់ពីព្រៃអាម៉ាហ្សូន Amazon ដែលមិនអាចរកបាននៅតាមបណ្តាប្រទេសនានាក្នុងអាស៊ីភាគ អាគ្នេយ៍។
តាមសង្គមស៊ីវិល គឺស្នើសុំឲ្យលោក នាយករដ្ឋមន្ត្រី ពិចារណាក្នុងការដាក់តំបន់នេះជាតំបន់ទេសចរណ៍ធម្មជាតិ ដើម្បីឲ្យប្រជាពលរដ្ឋខ្មែរ ក៏ដូចជាជនជាតិដើមភាគតិចបានរស់នៅពឹងលើសម្បត្តិធម្មជាតិនេះ និងសម្រាប់បន្តដល់កូនចៅជំនាន់ក្រោយរបស់ពួកគាត់៕
No comments:
Post a Comment