ការប្រមូលអ្នកគាំទ្រគណបក្សសង្គ្រោះជាតិ កន្លងទៅ (រូបថត ជន ស្រីណុច)
សង្គមស៊ីវិល ជំរុញឲ្យ រដ្ឋាភិបាល គោរពច្បាប់ រដ្ឋធម្មនុញ្ញ ខណៈមាន សមាជប្រជាជន នៅថ្ងៃស្អែកនេះ
ដោយ៖ ជន ស្រីណុច | ថ្ងៃសៅរ៍ ទី29 ខែមិនា ឆ្នាំ2014
អង្គការ សង្គមស៊ីវិល ដែលធ្វើការលើផ្នែក សិទ្ធិមនុស្ស នៅថ្ងៃសៅរ៍នេះ ជំរុញឲ្យ រដ្ឋាភិបាល គោរពច្បាប់ រដ្ឋធម្មនុញ្ញ ដោយការពារសិទ្ធិ ប្រជាពលរដ្ឋ ក្នុងការជួបជុំ បញ្ចេញមតិ ខណៈគណបក្ស សង្គ្រោះជាតិ គ្រោងធ្វើ សមាជប្រជាជន នៅល្ងាច ថ្ងៃអាទិត្យស្អែកនេះ។
គណបក្សសង្គ្រោះជាតិ (CNRP) នឹងធ្វើសមាជជួបជុំអ្នកគាំទ្របក្សនេះ នៅរសៀលថ្ងៃអាទិត្យស្អែកនេះ ដើម្បីស្វែងយល់ពីអនុសាសន៍របស់ប្រជាជន បើទោះបីជាសាលាក្រុង និងក្រសួងមហាផ្ទៃ បដិសេធក៏ដោយ។
អ្នកតាមដានបញ្ហាសង្គម និងជាប្រធានផ្នែកស៊ើបអង្កេតសមាគម អាដហុក លោក នី ចរិយា មានប្រសាសន៍ថា លោកមានការសោកស្តាយដែលក្រសួងមហាផ្ទៃ និងសាលាក្រុង មិនអនុញ្ញាតឲ្យប្រជាពលរដ្ឋធ្វើសមាជនៅទីលានប្រជាធិបតេយ្យ ដើម្បីបញ្ចេញមតិ ដែលការហាមឃាត់នេះ គឺផ្ទុយនឹងរដ្ឋធម្មនុញ្ញទាំងស្រុង ។ លោកបន្តថា សមាជនៅថ្ងៃស្អែកនេះ រដ្ឋាភិបាលមានកាតព្វការពារប្រជាពលរដ្ឋ មិនត្រូវរារាំងក្នុងសកម្មភាពណាមួយ ដែលឈានដល់កើតមានអំពើហិង្សាឡើយ ។
ប្រធានកម្មវិធីសិទ្ធិការងារនៅមជ្ឈមណ្ឌលអប់រំច្បាប់ សម្រាប់សហគមន៍ លោក មឿន តុលា យល់ថា សមាជនៅថ្ងៃស្អែកមិនមានអំពើហិង្សាកើតឡើងទេ ព្រោះគ្រាន់តែប្រជាពលរដ្ឋជួបជុំគ្នា ក្នុងការបញ្ចេញមតិប៉ុណ្ណោះ ហើយទង្វើនេះគឺត្រឹមត្រូវ និងស្របទៅតាមច្បាប់រដ្ឋធម្មនុញ្ញ ។ លោកបន្តថា កន្លងមកអំពើហិង្សាដែលកើតមាន ភាគច្រើនបង្កឡើងដោយសមត្ថកិច្ចតែប៉ុណ្ណោះ ផ្ទុយទៅវិញបើអាជ្ញាធរមិនធ្វើការរារាំង នោះហិង្សាក៏មិនកើតមានដែរ ។
លោក មឿន តុលា អំពាវឲ្យអាជ្ញាធរ ឬកងកម្លាំងប្រដាប់អាវុធទាំងអស់ ការពារសន្តិសុខសង្គម ជាពិសេសត្រូវគោរពច្បាប់រដ្ឋធម្មនុញ្ញឲ្យបានខ្ជាប់ខ្ជួន ។
ទន្ទឹមនឹងគម្រោងរៀបចំសមាជមហាជននេះ នៅថ្ងៃស្អែកនេះ គណបក្សសង្គ្រោះជាតិ ក៏នឹងរៀបចំពិធីបង្សុកូល ខួបនៃ ព្រឹត្តិការណ៍វាយប្រហារដោយគ្រាប់បែក ៤គ្រាប់ កាលពីថ្ងៃទី ៣០ ខែមីនា ឆ្នាំ១៩៩៧ លើហ្វូងបាតុកម្មដឹកនាំដោយលោកសម រង្ស៊ី នៅមុខរដ្ឋសភាបានបណ្តាលឲ្យមនុស្សស្លាប់ ១៦នាក់ និងជាង១៥០នាក់ផ្សេងទៀតរងរបួស៕
No comments:
Post a Comment