កម្លាំងសមត្ថកិច្ច ដាក់របាំងដែក មិនឲ្យអ្នកតវ៉ាចូលទីលានប្រជាធិបតេយ្យ(រូបថតដោយតាំង វីដា)
អ្នកមានជម្លោះដីធ្លី ដង្ហែក្បួនពីតំបន់បឹងកក់ ឆ្ពោះទៅក្រសួងកិច្ចការនារី នាព្រឹកនេះ (រូបថត៖ ញឹម សុខន)
សមត្ថកិច្ច រាប់សិបនាក់ បិទផ្លូវចេញចូល ទីលានប្រជាធិបតេយ្យ មិនឲ្យសហជីព ធ្វើវេទិកាសាធារណៈ
ដោយ៖ ពេជ្រ សុធារី / វីអូឌី | ថ្ងៃសៅរ៍ ទី8 ខែមិនា ឆ្នាំ2014
សមត្ថកិច្ចចម្រុះជាច្រើនរយនាក់ ត្រូវបានដាក់ពង្រាយ និងដាក់របាំងបិទផ្លូវ ជុំវិញទីលានប្រជាធិបតេយ្យ នៅព្រឹកថ្ងៃសៅរ៍នេះ ខណៈសហព័ន្ធសហជីព និងសមាគមទាំង១៨ គ្រោងធ្វើវេទិកាសាធារណៈទាក់ទងនឹងសិទ្ធិការងារ និងទាមទារដោះលែងអ្នកជាប់ឃុំ២១នាក់។
នៅព្រលឹមស្រាងៗថ្ងៃសៅរ៍នេះ គេសង្កេតឃើញសមត្ថកិច្ចចម្រុះជាច្រើនរយនាក់ មានប៉ូលិសចរាចរណ៍ ក្រុមបង្ក្រាបបាតុកម្ម និងក្រុមសន្តិសុខសាលាខណ្ឌដូនពេញ បានឈរត្រៀបត្រា និងដាក់រនាំងដែកពីរជាន់ បិទផ្លូវនៅជុំវិញទីលានប្រជាធិបតេយ្យ ក្នុងសង្កាត់វត្តភ្នំ ដោយមិនអនុញ្ញាតឲ្យនណាម្នាក់ចូលទៅកាន់ទីនោះទេ។
ការបិទផ្លូវ និងពង្រឹងសន្តិសុខ នៅទីលានប្រជាធិបតេយ្យនេះ ធ្វើឡើងខណៈដែលសហព័ន្ធសហជីព និងអង្គការសមាគមចំនួន១៨ ធ្វើការជាមួយកម្មករគ្រប់វិស័យ នៅព្រឹកនេះ គ្រោងធ្វើវេទិកាសាធារណៈ ក្នុងគោលបំណងទាមទារឲ្យរដ្ឋាភិបាល និងនិយោជកដោះស្រាយបញ្ហាចំនួន៧ចំណុច ក្នុងនោះមាន ១,សុំឲ្យដោះលែងជនជាប់ចោទទាំង២១នាក់ និងទម្លាក់ចោលរាល់ការចោទប្រកាន់ទាំងអស់លើអ្នកទាំង២៣នាក់ ២,សុំឲ្យមានការចរចាឡើងវិញលើប្រាក់ឈ្នួលគោល១៦០ដុល្លារក្នុងមួយខែ ៣,ត្រូវដាក់ទោសដល់ជនល្មើសដែលបានប្រើហិង្សានិងសម្លាប់កម្មករ ព្រមទាំងផ្តល់សំណងជំងឺចិត្តដល់ជនរងគ្រោះ ដែលបានបាត់បង់ជីវិត រងរបួស និងជាប់ឃុំឃាំង ៤,រដ្ឋាភិបាលត្រូវដកបម្រាមនៃការជួបជុំជាសាធារណៈរបស់ប្រជាពលរដ្ឋ ចេញ វិញ និងលុបចោលការព្យួរការចុះបញ្ជីការអង្គការវិជ្ជាជីវៈពីក្រសួងការងារ ៥,តំណាងក្រុមហ៊ុនទាំងអស់ត្រូវដកបណ្តឹងដែលប្រឆាំងសហជីព និងកម្មករនិយោជិត ៦,សុំទទួលយកកម្មករដែលត្រូវបញ្ឈប់ពីការងារឲ្យចូលធ្វើការវិញ ព្រមទាំងផ្តល់ប្រាក់រម្លឹក និងអត្ថប្រយោជន៍ផ្សេងៗ និងចំនុចទី៧ ត្រូវទូទាត់ប្រាក់ឈ្នួល និងប្រាក់រង្វាន់ទៀងទាត់ជូនដល់កម្មករ ដែលនិយោជកបានកាត់ ក្នុងអំឡុងពេលធ្វើកូដកម្ម។
កាលពីថ្ងៃទី០៦ខែមីនា សាលារាជធានីភ្នំពេញ បានចេញលិខិតមិនអនុញ្ញាតឲ្យសហព័ន្ធសហជីពចំនួន១៨ ធ្វើវេទិកាសាធារណៈទាក់ទងនឹងសិទ្ធិការងារ នៅទីលានប្រជាធិបតេយ្យ ឬនៅទីសាធារណៈណាមួយទេ នៅថ្ងៃទី០៨ ខែមិនានេះ ដោយតម្រូវឲ្យធ្វើនៅស្នាក់ការរៀងៗខ្លួន។
ក្នុងលិខិតបានលើកហេតុផលថា ការមិនអនុញ្ញាតឲ្យរៀបចំវេទិកាសាធារណៈនោះ ដោយសារវេទិកានេះ មានចរិតលាយឡំនឹងនយោបាយ ក្នុងពេលដែលគណបក្សប្រជាជនកម្ពុជា និងគណបក្សសង្គ្រោះជាតិបាន និងកំពុងពិភាក្សាគ្នាអំពីការកែទម្រង់ការបោះឆ្នោត និងដើម្បីទុកពេលវេលាឲ្យគណបក្សទាំងពីរ បន្តធ្វើការពិភាក្សាក្នុងបរិយាកាសល្អប្រសើរ ជាពិសេសចៀសវាងប៉ះពាល់ដល់សន្តិសុខ សុវត្ថិភាព និងសណ្តាប់ធ្នាប់សាធារណៈ ក្នុងការធានាភាពស្ងប់ស្ងាត់សម្រាប់ជីវភាពរស់នៅប្រចាំថ្ងៃ ជាប្រក្រតីរបស់ប្រជាពលរដ្ឋ។
ក្រុមមេដឹកនាំសហជីព ធ្លាប់បានព្រមានថា បើវេទិកានៅថ្ងៃទី៨ខែមិនា នៅតែមិនទាន់មានដំណោះស្រាយ តាមការទាមទារប្រាក់ឈ្នួល១៦០ដុល្លារ និងដោះលែងអ្នកជាប់ចោទទាំង២៣នាក់ទេនោះ កម្មករនៅគ្រប់វិស័យ នឹងធ្វើកូដកម្មទ្រង់ទ្រាយធំ នៅទូទាំងប្រទេស ចាប់ពីថ្ងៃទី១២ ដល់ថ្ងៃទី១៥ ខែមិនា ហើយមន្ត្រីរាជការ មិនទៅធ្វើការឡើយ៕
No comments:
Post a Comment