មន្ត្រី រដ្ឋាភិបាល
និងអ្នកជំនួញ ក្នុងកិច្ចពិភាក្សា រវាង [unconstitutional] រដ្ឋាភិបាល និងវិស័យ ឯកជន
លើកទី១៧ ដើម្បី ដោះស្រាយបញ្ហា ក្នុងការធ្វើជំនួញ នៅប្រទេស កម្ពុជា
នាវិមានសន្តិភាព នៅថ្ងៃទី៤ ខែមីនា ឆ្នាំ២០១៤។ RFA/An Sithav
កិច្ចពិភាក្សា រវាង [unconstitutional] រដ្ឋាភិបាល និងវិស័យ ឯកជន លើបញ្ហា ធ្វើជំនួញ នៅកម្ពុជា
RFA | 4 March 2014
លោក
លោក
វេទិកាពិភាក្សារវាងវិស័យឯកជន និងរដ្ឋាភិបាលលើកទី១៧ ពិភាក្សានៅឆ្នាំ២០១៤ នេះ បានលើកយកប្រធានបទថ្មី ដើម្បីលើកកម្ពស់ស្ថានភាពអាជីវកម្ម ស្របពេលដែលសមាគមប្រជាជាតិអាស៊ីអាគ្នេយ៍ នឹងធ្វើសមាហរណកម្មសេដ្ឋកិច្ចនៅឆ្នាំ២០១៥។
លោកនាយករដ្ឋមន្ត្រី ហ៊ុន សែន មានប្រសាសន៍នៅព្រឹកថ្ងៃទី៤ មីនា ក្នុងវេទិកានោះថា នេះជាលើកទីមួយហើយដែលមានការជួបជុំគ្នារវាងវិស័យឯកជន និងរដ្ឋាភិបាល ក្រោយពេលដែលរាជរដ្ឋាភិបាលថ្មីអាណត្តិទីប្រាំ ដែលកើតឡើងពីការបោះឆ្នោតដោយសេរី និងត្រឹមត្រូវ។ វេទិកានេះនឹងស្វែងរកឧបសគ្គ ឬបញ្ហាប្រឈមទាំងឡាយ និងបំពេញឲ្យគ្នាទៅវិញទៅមករវាងផ្នែកឯកជន និងរដ្ឋាភិបាល ដើម្បីបង្កើនសមត្ថភាពចូលក្នុងទីផ្សារអាស៊ាន និងការធ្វើសមាហរណកម្មតំបន់កាន់តែទូលំទូលាយ។
ទោះជាយ៉ាងណាក៏ដោយ វេទិកានោះមានការចូលរួមពីក្រុមការងារពីវិស័យឯកជនចំនួន១០ ដោយពួកគេបានលើកយកបញ្ហារៀងៗខ្លួន ស្នើឲ្យរដ្ឋាភិបាល និងអ្នកពាក់ព័ន្ធ ចូលរួមដោះស្រាយ។ បញ្ហារបស់វិស័យឯកជនទាំងនោះ បានលើកយកចំណុចសំខាន់ៗចំនួន៥ រួមមាន ទីមួយ ការសម្រួលការធ្វើពាណិជ្ជកម្មឆ្លងកាត់ទំនិញ ភ្ញៀវទេសចរនៅតាមព្រំដែន។ ទីពីរ ការបង្កើតច្រកតែមួយសម្រាប់ការចុះបញ្ជីរបស់សហគ្រាសខ្នាតតូច និងមធ្យម។ ទីបី កម្មវិធីកាត់បន្ថយពន្ធដើម្បីលើកកម្ពស់ការនាំចេញអង្ករមួយលានតោន នៅឆ្នាំ២០១៥។ ទីបួន ថ្លៃអគ្គិសនី និងទីប្រាំបញ្ហាទំនាក់ទំនងវិជ្ជាជីវៈ។
តំណាងក្រុមការងារវិស័យឯកជនមួយ គឺសហប្រធានក្រុមការងារផ្នែកកម្មន្តសាល និងសហគ្រាសខ្នាតតូច និងមធ្យម លោកឧកញ៉ា តែ តាំងប៉ បានលើកយកបញ្ហាលើលទ្ធភាពបង្កើនភាពប្រកួតប្រជែង នៅពេលដែលសហគមន៍សេដ្ឋកិច្ចអាស៊ានបើកចំហនោះ។ លោកបញ្ជាក់សមត្ថភាពសហគ្រាសធុនតូច មានការជួយជ្រោមជ្រែងពីរាជរដ្ឋាភិបាលនៅកម្រិតទាបនៅឡើយ បើធៀបនឹងសហគ្រាសខ្នាតធំ។ សំណើរបស់សហគ្រាសធុនតូចចង់បាននោះ គឺការលើកលែងពន្ធ។
«សំឡេង»
ឆ្លើយតបទៅនឹងការលើកឡើងបញ្ហានេះ រាជរដ្ឋាភិបាលស្នើឲ្យអាជីវករ និងអ្នកធុរកិច្ចទាំងអស់ ត្រូវតែបង្ហាញភាពស្មោះត្រង់ និងការទទួលខុសត្រូវលើមុខរបររបស់ខ្លួន លើការបង់ពន្ធជូនរដ្ឋាភិបាល។
លោកនាយករដ្ឋមន្ត្រី ហ៊ុន សែន បានបញ្ជាក់ថា រដ្ឋាភិបាលមានវិធានការលើកលែងពន្ធមួយរយៈ ដល់ការធ្វើអាជីវកម្ម ប៉ុន្តែរដ្ឋាភិបាលមិនមានសមត្ថភាពលើការឧបត្ថម្ភធនឡើយ។ រាជរដ្ឋាភិបាលបានដាក់ចេញនូវគោលនយោបាយ និងផ្ដល់ការអនុគ្រោះជាច្រើន ដើម្បីទាក់ទាញការវិនិយោគ និងបង្កើតឱកាសការងារជូនប្រជាពលរដ្ឋ។ បន្ថែមលើនេះ ស្របពេលដែលរដ្ឋាភិបាលកំពុងជួយកម្មករ និងប្រជាពលរដ្ឋ ពីភាពរីកចម្រើននៃវិស័យកាត់ដេរ ប៉ុន្តែគណបក្សប្រឆាំងបានធ្វើឲ្យខូចប្រយោជន៍ទៅវិញ។
លោក ហ៊ុន សែន៖ «នេះជាសមិទ្ធផលដ៏ធំធេងដែលរដ្ឋាភិបាលសម្រេចបាន ប៉ុន្តែគណបក្សប្រឆាំង និងសហជីពរបស់គេ បានប្រើប្រាស់នយោបាយប្រជាភិថុតិ យកកម្មករនិយោជិតធ្វើជាឈ្នាន់នយោបាយ ដោយញុះញង់ឲ្យធ្វើកូដកម្មបាតុកម្មខុសច្បាប់ បំផ្លាញផលប្រយោជន៍កម្មករ និងផលប្រយោជន៍ឱកាសការងាររបស់យុវជន។»
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា ការអភិវឌ្ឍមិនត្រូវមើលត្រឹមតែតួលេខនោះទេ តែត្រូវធានាអំពីសុខុមាលភាពសង្គម។ ជាក់ស្ដែង ការធ្វើបាតុកម្មទាមទារដំឡើងប្រាក់ខែកន្លងមក ដោយសារតែជីវភាពរស់នៅមិនគ្រប់គ្រាន់៖ «អ្វីដែលជាការរីកចម្រើន មិនមែនមើលអំពីបរិមាណ តួលេខនៃការនាំចេញទេ។ យើងត្រូវមើលទៅដល់សុខុមាលភាព និងយុត្តិធម៌សង្គមរបស់កម្មករដែរ។ បើសិនជាកម្មកររស់នៅមានប្រាក់ខែមិនគ្រប់គ្រាន់ យើងក៏មិនសប្បាយចិត្តនឹងទុនលុយរាប់រយរាប់ពាន់លាន បែរជាកម្មកររាប់លានរាប់សែននាក់ រស់នៅភាពក្រីក្រ។ អ៊ីចឹងហើយ ការតស៊ូរបស់គាត់ គឺតស៊ូដោយខ្លួនឯង អត់មានអ្នកណាទៅញុះញង់គាត់ទេ។»
លោក យឹម សុវណ្ណ បញ្ជាក់ថា វេទិកាពិភាក្សារវាងផ្នែកឯកជន និងរដ្ឋាភិបាល ដែលធ្វើឡើងរៀងរាល់ឆ្នាំ ហាក់ជួយលើកស្ទួយដល់ភាពប្រកួតប្រជែងដល់វិស័យឯកជនតិចតួច ដោយសារអំពើពុករលួយ និងរបបការិយាធិបតេយ្យ៕
No comments:
Post a Comment