កូដកម្មរបស់កម្មករទាមទារប្រាក់ខែគោល ១៦០ដុល្លារ នាពេលកន្លងមក (រូបថត៖ តាត ឧត្តម)
បទយកការណ៍៖ បញ្ហាប្រឈមផ្សេងៗ របស់ កម្មករ រោងចក្រ ដែលជំរុញ ឲ្យមាន កូដកម្ម-បាតុកម្ម
ដោយ៖ ណាត សុភាព និង អ៊ឹង ប៊ុនថន / វីអូឌី | ថ្ងៃអង្គារ ទី22 ខែមេសា ឆ្នាំ2014
នៅម៉ោងប្រមាណជា៥កន្លះទៀបភ្លឺ ចាប់ពីថ្ងៃចន្ទដល់ថ្ងៃសៅរិ៍ កម្មការិនី សេរីរ័ត្ន បានរៀបចំបាយ សម្លរ វិចខ្ចប់ដាក់ក្នុងថង់ រួចឡើងជិះរថយន្តឈ្នួលរបស់ក្រុមហ៊ុនអប្សរា ដោយមានកម្មករប្រមាណជាង២០នាក់ បានធ្វើដំណើរដោយប្រជ្រៀតគ្នាពីស្រុកមុខកំពូល ខេត្តកណ្តាល ឆ្ពោះទៅកាន់កន្លែងការងារនៅក្នុងសង្កាត់ចោមចៅ ខណ្ឌដង្កោ រាជធានីភ្នំពេញ។
វ័យ២០ឆ្នាំ ជាកូនទី៥ ក្នុងចំណោមបងប្អូន៥នាក់ កញ្ញា រ៉ុម សេរីរ័ត្ន បានបញ្ចប់ការសិក្សាត្រឹមថ្នាក់ទី៦ នៅសាលាបឋមសិក្សាភូមិពោង ស្រុកមុខកំពូល ខេត្តកណ្តាល។ សេរីរ័ត្ន សម្រេចចិត្តចាកចេញពីស្រុកកំណើត កាលដើមឆ្នាំ២០១១ និងធ្លាប់ធ្វើការនៅក្នុងរោងចក្រចំនួន៤កន្លែងផ្សេងគ្នានៅរាជធានីភ្នំពេញ ប៉ុន្តែការងារជាប់លាប់គឺធ្វើនៅរោងចក្រកាត់ដេរសំលៀកបំពាក់ឈ្មោះ "អប្សរា" ហៅកាត់ជាអក្សរអង់គ្លេសថា(AC) ។
កញ្ញា រ៉ុម សេរីរ័ត្ន ធ្លាប់ដួលសន្លប់ក្នុងចំណោមកម្មការនីសន្លប់ប្រមាណជា៧០នាក់ ផ្សេងទៀត នៅរោងចក្រ អប្សរា (AC) កាលពីដើមខែមេសា ឆ្នាំ២០១៤។ នាងបានរៀបរាប់ទាំងទឹកមុខស្រគត់ស្រគុំ ជុំវិញទិដ្ឋភាពដែលកម្មករដួលសន្លប់កន្លងនេះ។
សេរីរ័ត្ន អះអាងថា កាលពីធ្វើការនៅរោងចក្រ អប្សរា (AC) មានរយៈពេលជិត១ឆ្នាំដំបូង នាងមិនដែលជួបបញ្ហាសុខភាព និងដួលសន្លប់បែបនេះទេ។ ប៉ុន្តែមូលហេតុដែលធ្វើឲ្យនាង និងកម្មករប្រមាណជិត៧០នាក់ ផ្សេងទៀតដួលសន្លប់ ដោយសារពួកគេបរិភោគអាហារមិនមាន អនាម័យ ហើយភាគីរោងចក្របានបើកឧបករណ៍បំពងសំឡេងខ្លាំងៗ ខណៈកម្មករផ្សេងៗទៀតធ្វើកូដកម្ម នៅមុខរោងចក្រទាមទារប្រាក់អត្ថប្រយោជន៍ការងារ។
សហជីពចំនួន១៨ បានចេញសេចក្តីអំពាវនាវមួយដល់កម្មករ និងមន្ត្រីរាជការ កុំចូលធ្វើការបន្ទាប់ពីចូលឆ្នាំថ្មីរួច ពោលត្រូវបន្តឈប់សម្រាកចាប់ពីថ្ងៃទី១៧ ដល់ថ្ងៃទី២២ ខែមេសានេះ ដើម្បីទាមទារលក្ខខណ្ឌ ៧ចំណុច។ ចំណុចទាំងនោះមាន ទាមទារឲ្យលើកលែងបទចោលប្រកាន់លើសកម្មជនសិទ្ធិមនុស្ស និងដីធ្លីចំនួន២៣នាក់ ក្នុងនោះមានលោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) និងសុំឲ្យដំឡើងប្រាក់ឈ្នួលគោល១៦០ដុល្លារ ជាដើម។
កម្មកររោងចក្រ ជីងហួយ ស្ថិតនៅស្រុកបាធាយ ខេត្តកំពង់ចាម កញ្ញា ប៉ាល់ ស្រីណុល មានប្រសាសន៍ថា មូលហេតុដែលកម្មករ កូដកម្មមិនចូលធ្វើការនេះ ដោយសាររោងចក្រមិនផ្តល់ប្រាក់ខែឲ្យបានសមរម្យនៅឡើយ។
អ្នកស្រាវជ្រាវឯករាជ្យលោក កែម ឡី សិក្សាឃើញថា ករណីដែលធ្វើឲ្យកម្មករដួលសន្លប់ ដោយសារតែការបរិភោគអាហារមិនបានគ្រប់គ្រាន់ បរិយាកាសក្នុងរោងចក្រមិនមានផាសុកភាពជាដើម។ លោកបញ្ជាក់ថា ដើម្បីទប់ស្កាត់កុំឲ្យមានបញ្ហានេះកើតឡើង ក្រសួងការងារ និងស្ថាប័នពាក់ព័ន្ធ ត្រូវចាត់អ្នកជំនាញចុះត្រួតពិនិត្យរោងចក្រទាំងអស់ និងចាត់វិធានការចំពោះករណីរោងចក្រណា ដែលមិនបានគោរពតាមលក្ខណ្ឌឲ្យមានប្រសិទ្ធិភាព ដោយមិនប្រព្រឹត្តអំពើពុករលួយ។
ក្រសួងការងារ និងបណ្តុះបណ្តាលវិជ្ជាជីវៈបានចេញរបាយការណ៍ ស្តីពី លទ្ធផលការងារសម្រេចបានឆ្នាំ២០១៣ និងទិសដៅអនុវត្តបន្ត ឲ្យដឹងថា ក្នុងរាជធានីភ្នំពេញមានរោងចក្រចំនួន៣ មានកម្មករសន្លប់ចំនួន១៥៤នាក់ ខេត្តកណ្តាលមាន៥រោងចក្រ អ្នកសន្លប់៤៣២នាក់ ខេត្តកំពង់ស្ពឺ៣រោងចក្រមានអ្នកសន្លប់៦៨នាក់ ខេត្តកោះកុង១រោងចក្រ១៩នាក់ និងខេត្តស្វាយរៀង២រោងចក្រមានអ្នកសន្លប់១២៥នាក់ និងខេត្តកំពង់ចាម មាន១រោងចក្រ អ្នកសន្លប់ចំនួន២៥នាក់។
ទោះជាយ៉ាងណា អគ្គលេខាធិការរងសមាគមរោងចក្រកាត់ដេរកម្ពុជា លោក កាំង ម៉ូនីកា ករណីកម្មករសន្លប់នៅដើមឆ្នាំ២០១៤នេះ មានការថយចុះជាងឆ្នាំកន្លងទៅ។
រីឯគោលនយោបាយ៩ចំណុច របស់គណបក្សប្រជាជនកម្ពុជា សម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត-ក្រុង-ស្រុក-ខណ្ឌ អាណត្តិទី២នេះ អះអាងថា នឹងបង្កើនប្រាក់បៀវត្សរបស់មន្ត្រីរាជការ កងទ័ព នគរបាល ១លានរៀលក្នុង១ខែ និងកម្មករ ១៦០ដុល្លារក្នុង១ខែ នៅឆ្នាំ២០១៨ ស្របតាមកំណើនសេដ្ឋកិច្ចកម្ពុជា។
ប្រធានសហភាពការងារកម្ពុជា លោក អាត់ ធន់ យល់ថា គោលនយោបាយកំណត់ប្រាក់ខែកម្មករ១៦០ដុល្លារក្នុងមួយខែនៅឆ្នាំ២០១៨ខាងមុខ មិនស្របនឹងសេដ្ឋកិច្ចទីផ្សារបច្ចុប្បន្ននោះទេ។ លោកព្រមានថា បើរដ្ឋាភិបាលនៅតែពន្យាពេលផ្តល់ប្រាក់ខែដល់កម្មករបែបនេះ ធ្វើឲ្យកម្មករបន្តកូដកម្ម ហើយសេដ្ឋកិច្ចកម្ពុជានឹងធ្លាក់ចុះទៅវិញ។
នៅឆ្នាំ២០១៤នេះ រដ្ឋាភិបាលបានដំឡើងប្រាក់ឈ្នួលគោលចំនួន១០០ដុល្លារ បន្ទាប់ពីមានការតវ៉ាពីកម្មករស្ទើរទូទាំងប្រទេស។ ប៉ុន្តែបាតុកម្មនេះ ត្រូវបានកម្លាំងប្រដាប់អាវុធរបស់រដ្ឋាភិបាលបាញ់ស្លាប់យ៉ាងតិច ៥នាក់ និងជិត៤០នាក់ទៀតរងរបួស។ មកដល់ពេលនេះមាននៅសកម្មជនសហជីពនិងកម្មរចំនួន២៣ទៀត ត្រូវបានចោទប្រកាន់ និងឃុំខ្លួន ដោយចោទពីបទ ពាក់ព័ន្ធនឹងកម្មករតវ៉ានោះ៕
No comments:
Post a Comment