អ្នកវិភាគ ៖ វប្បធម៌ហៃអើ របស់ មន្ត្រី បក្សកាន់អំណាច ថ្កោលទោស លោក សម រង្ស៊ី គ្មានប្រសិទ្ធភាព
ដោយ៖ ណាត សុភាព / វីអូឌី | ថ្ងៃពុធ ទី9 ខែមេសា ឆ្នាំ2014
អ្នកវិភាគ និងមន្ត្រី សង្គមស៊ីវិល នៅថ្ងៃពុធនេះ បានហៅ វប្បធម៌ហៃអើ របស់ មន្ត្រី គណបក្សកាន់អំណាច មួយចំនួន ថា មិនមានប្រសិទ្ធិភាពទេ ចំពោះការចេញសេចក្តីថ្លែងការណ៍ ថ្កោលទោសលោក សម រង្ស៊ី ដោយចោទថា ធ្វើឲ្យ ប៉ះពាល់ ដល់ អង្គព្រះមហាក្សត្រ នោះ។
លោក សម រង្ស៊ី កាលពីថ្ងៃទី០២ ខែមេសា បានទូលថ្វាយព្រះមហាក្សត្រ ថា រដ្ឋសភាបច្ចុប្បន្ន គឺជាសភាឯកបក្ស ដែលតំណាងមកពីគណបក្សប្រជាជនកម្ពុជាតែប៉ុណ្ណោះ មិនមែនតំណាងឲ្យពលរដ្ឋខ្មែរទាំងមូលឡើយ។ បន្ទាប់មក មានសេចក្តីថ្លែងការណ៍ថ្កោលទោសជាបន្តបន្ទាប់ ទៅលើលោក សម រង្ស៊ី ដោយពួកគេចោទថា លិខិតនោះជាការប្រមាថព្រះមហាក្សត្រ។ ស្ថាប័នដែលថ្កោលទោសលោក សម រង្ស៊ី រួមមាន ព្រឹទ្ធសភា សាលារាជធានីភ្នំពេញ សាលាខេត្តកណ្តាល ក្រសួងការពារជាតិ ក្រសួងយុត្តិធម៌ សាកលវិទ្យាល័យជាតិគ្រប់គ្រង វិទ្យាស្ថានពលរដ្ឋវិទ្យា របស់លោក ឈឹម ផលវរុណ ជាដើម គឺបានប្រកាសគាំទ្រ លោក ហ៊ុន សែន និងប្រឆាំងលោក សម រង្ស៊ី។ ប៉ុន្តែមន្ត្រីជាន់ខ្ពស់ព្រះបរមរាជវាំង លោក អ៊ុំ ដារ៉ាវុធ បានចេញលិខិតបំភ្លឺថា អ្វីដែលលោក សម រង្ស៊ី លើកឡើង មិនប៉ះពាល់ធ្ងន់ធ្ងរដល់ព្រះកិត្តិនាមព្រះមហាក្សត្រទេ។
អ្នកវិភាគឯករាជ្យ លោក កែម ឡី កត់សម្គាល់ថា យុទ្ធសាស្ត្រដដែលៗ របស់គណបក្សប្រជាជកម្ពុជា ដោយប្រើមន្ត្រី ហៃអើ ឲ្យគាំទ្រសម្តីនាយករដ្ឋមន្ត្រីនេះ មិនអាចធ្វើឲ្យប្រជាប្រិយភាពគណបក្សប្រឆាំងធ្លាក់ចុះទេ «ប្រសិនជារដ្ឋាភិបាលដោះស្រាយបញ្ហាដីធ្លី បញ្ហាជនអន្តោរប្រវេសន៍បាន នោះបានវាប៉ះពាល់ដល់ប្រជាប្រិយភាពគណបក្សសង្គ្រោះជាតិ។ ប៉ុន្តែប្រជាពលរដ្ឋនៅតែឈឺចាប់ដដែល ទោះបីធ្វើស្អីក៏វាមិនប៉ះពាល់»។
ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោក នី ចរិយា មានប្រសាសន៍ថា មិនមានអ្វីចំលែកទេ ចំពោះវប្បធម៌ហៃអើនៅកម្ពុជា ដែលមន្ត្រីគណបក្សកាន់អំណាច ដែលគាំទ្រថ្នាក់ដឹកនាំរបស់ខ្លួន ដោយមិនបានពិចារណាឲ្យគ្រប់ជ្រុងជ្រោយនោះ។ លោកយល់ថា អ្វីដែលមន្ត្រីគណបក្សប្រជាជនកម្ពុជាខំគាំទ្រ លោក ហ៊ុន សែន ទំនងជាពួកគេធ្វើឡើងដើម្បីចង់តែបានឋានៈ ឬបុណ្យស័ក្តិ ឬលាភសក្ការៈតែប៉ុណ្ណោះ «[ការចេញលិខិតថ្កោលទោសលោក សម រង្ស៊ី]ជាវប្បធម៌មួយថែរក្សាបុណ្យសក្តិរបស់ខ្លួន ឬក៏យកចិត្តអ្នកកាន់អំនាចក្នុងបក្ស មានអំណាចក្នុងការឲ្យដំណែងនេះឯង ហើយខ្ញុំគិតថានេះមិនមែន ជារឿងថ្មី ហើយទី២ ក៏គ្មានឥទ្ធិពលអ្វីដែរ គឺថារបៀបនេះគឺជា របៀបចាស់ ដូចក្នុងសម័យកុម្មុយនីស្ត ទេដែលគេប្រើ»។
ប្រធានខុទ្ទកាល័យក្រសួងយុត្តិធម៌ជាស្ថាប័នរដ្ឋមួយ ដែលថ្កោលទោស មេបក្សប្រឆាំងដែរនោះ លោក សំ ប្រជាមានិត មានប្រសាសន៍ថា មូលហេតុដែលចេញសេចក្តីថ្លែងការណ៍នេះ ដោយសារស្ថាប័នមួយនេះ ជាស្ថាប័នរដ្ឋ ដូចនេះ ក្រសួងត្រូវគាំទ្រថ្នាក់ដឹកនាំរបស់ខ្លួន «បើយើងនិយាយថា ក្រសួងគាំទ្ររដ្ឋាភិបាលវាត្រឹមត្រូវហើយ ក្រសួងទាំងអស់ស្ថិតនៅក្រោមរាជរដ្ឋាភិបាល ដូច្នេះត្រូវតែគាំទ្រដាច់ខាតជាមួយរដ្ឋាភិបាល។ រាជរដ្ឋាភិបាល គាត់ធ្វើអី យើងត្រូវគាំទ្រ ព្រោះនេះជាការត្រឹមត្រូវមួយហើយ របស់ក្រសួងស្ថាប័នរដ្ឋ»។
ដោយឡែក ក្រសួងអប់រំ និងក្រសួងការបរទេសជាដើម ដែលជាក្រសួងរបស់រដ្ឋាភិបាលដែរ មិនទាន់បានឃើញចេញសេក្តីថ្លែងការណ៍គាំទ្រ លោក ហ៊ុន សែន នោះទេ ហើយ VOD មិនអាចសុំការបំភ្លឺពីមន្ត្រីទាំងនោះមាននៅឡើយ នាព្រឹកថ្ងៃពុធនេះ។
វប្បធម៌ហៃអើនេះ ត្រូវបានមន្ត្រីក្រោមអំណាចរបស់លោកនាយករដ្ឋមន្ត្រី អនុវត្តព្រមៗគ្នា ធ្វើបាតុកម្ម កាលពីមុនបោះឆ្នោតជាតិ ដើម្បីប្រឆាំងលោក កឹម សុខា ដោយចោទថា អនុប្រធានគណបក្សសង្គ្រោះជាតិ មិនទទួលស្គាល់គុកទួលស្លែង៕
អត្ថបទទាក់ទង
- មន្ត្រីវាំងបញ្ជាក់ថា លិខិតលោក សម រង្ស៊ី មិនប៉ះពាល់ព្រះមហាក្សត្រទេ
- សាកលវិទ្យាល័យជាតិគ្រប់គ្រង តំណាងបុគ្គលិក គ្រូ និស្សិត ចេញញត្តិគាំទ្រការថ្កោលទោសលោក សម រង្ស៊ី
- គណៈអភិបាលខេត្តកំពង់ស្ពឺ ចេញញត្តិតំណាងឲ្យពលរដ្ឋទូទាំងខេត្ត គាំទ្រវិធានការរដ្ឋាភិបាលលើលោក សម រង្ស៊ី
- ក្រសួងការងារ៖ លិខិតលោក សម រង្ស៊ី ជំរុញឲ្យព្រះមហាក្សត្រអនុវត្តផ្ទុយពីរដ្ឋធម្មនុញ្ញ
- លោក សម រង្ស៊ី ផ្ញើលិខិតថ្វាយព្រះមហាក្សត្រ រឿងសភាកម្ពុជា មិនឆ្លុះបញ្ចាំងឆន្ទៈពលរដ្ឋទាំងមូល
No comments:
Post a Comment