បុគ្គលិក ស្ថានីយ ប្រេងឥន្ធនៈ កាល់តិច ដាក់ញត្តិ ជូនទូតអាមេរិក ជួយអន្តរាគមន៍
ដោយ ឡេង ម៉ាលី / RFA | 15 May 2014
ប្រធានសហជីពបុគ្គលិកកម្មករកាល់តិច (Caltex) លោក យឿន រ៉េត
ផ្ដល់បទសម្ភាសន៍ដល់អ្នកកាសែតនាមុខស្ថានទូតសហរដ្ឋអាមេរិក
រាជធានីភ្នំពេញ នៅថ្ងៃទី១៥ ខែឧសភា ឆ្នាំ២០១៤ RFA/Leng Maly
តំណាងបុគ្គលិកកម្មករក្រុមហ៊ុនប្រេងឥន្ធនៈកាល់តិច នៅរាជធានីភ្នំពេញជាង ២០នាក់ មកប្រមូលផ្ដុំគ្នានៅមុខស្ថានទូតសហរដ្ឋអាមេរិក នៅព្រឹកថ្ងៃទី១៤ ឧសភា ដើម្បីដាក់ញត្តិរកអន្តរាគមន៍ពីស្ថានទូតនេះ។
អនុព័ន្ធសន្តិសុខរងនៃស្ថានទូតសហរដ្ឋអាមេរិក លោក ដេវិដ ខាបឡែន (David Kaplan) ចេញមកទទួលញត្តិរបស់បុគ្គលិកកម្មករកាល់តិច ទាំងនេះ។
ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា លោក ស ម៉ូរ៉ា ថ្លែងបន្ទាប់ការប្រគល់ញត្តិនេះថា លោក ដេវិដ ខាបឡែន មិនបានសន្យាអ្វីចំពោះពួកលោកទេ៖ «គាត់មិនបានប្រាប់ទេ ប៉ុន្តែគាត់យកញត្តិយើងនេះទៅជួបខាងផ្នែកគោលនយោបាយរបស់ពួកគាត់ ដើម្បីជួយអន្តរាគមន៍បែបណា (មួយ)។ ប៉ុន្តែយើងជឿថា រដ្ឋាភិបាលអាមេរិក នឹងមិនព្រងើយកន្តើយទេ ដែលយើងមើលឃើញថា នេះជាលទ្ធភាពដែលក្រុមហ៊ុនអាចមានលទ្ធភាព ព្រោះក្រុមហ៊ុនដៃគូប្រកួតប្រជែងគេអាចឱ្យបាន រឿងអី កាល់តិច ឱ្យមិនបាន? កាល់តិច ជាក្រុមហ៊ុនអាមេរិក ហើយឈានមុខគេក្នុងប្រទេសកម្ពុជា ក្នុងការលក់សាំងនៅក្នុងប្រទេសកម្ពុជា។ អ៊ីចឹងគាត់ប្រាកដណាស់ដែលអាចឱ្យបងប្អូនកម្មករនិយោជិកបាន។»
ក្នុងញត្តិដាក់ជូនស្ថានទូតសហរដ្ឋអាមេរិក នោះ បានសរសេរថា ក្រុមបុគ្គលិកកម្មករដឹងថា សហរដ្ឋអាមេរិក យកចិត្តទុកដាក់ខ្លាំងចំពោះក្រុមហ៊ុនរបស់ខ្លួន ក្នុងការប្រតិបត្តិការនៅបរទេស ជាពិសេសពាក់ព័ន្ធនឹងការគោរពសិទ្ធិមនុស្ស និងអំពើពុករលួយ ជាដើម។ ញត្តិបន្តថា ក្រុមហ៊ុនឈេហ្វរ៉ុនកម្ពុជា មិនបានផ្ដល់ប្រាក់ឈ្នួលដែលធានាការរស់នៅសមរម្យ ស្របតាមច្បាប់កម្ពុជា ទេ។ ខ្លឹមសារញត្តិនេះ ស្នើសុំស្ថានទូតឱ្យជួយធ្វើអន្តរាគមន៍ចំពោះក្រុមហ៊ុនឈេហ្វរ៉ុន កម្ពុជា លើពីរចំណុច គឺទី១ ឱ្យក្រុមហ៊ុនផ្ដល់ប្រាក់រង្វាន់ប្រចាំឆ្នាំ ឬហៅថា ប្រាក់ខែទី១៣ យ៉ាងហោចណាស់ឱ្យស្មើនឹងប្រាក់ឈ្នួលខែចុងក្រោយរបស់កម្មករនិយោជិក ដោយអនុវត្តសម្រាប់ឆ្នាំ២០១៤។ ចំណុចទី២ គឺឱ្យក្រុមហ៊ុនដំឡើងប្រាក់ឈ្នួលគោលដល់កម្មករអនាម័យ ចាក់សាំង និងប្ដូរប្រេងម៉ាស៊ីនចំនួន ១៦០ដុល្លារក្នុងមួយខែ និងបន្ថែមប្រាក់ឈ្នួល ៥០ដុល្លារទៀតដល់បុគ្គលិកផ្នែកបេឡា។ ការដំឡើងនេះ គឺអនុវត្តចាប់ពីខែឧសភា ឆ្នាំ២០១៤ តទៅ។
ប្រធានសហជីពមូលដ្ឋាននៃបុគ្គលិកកម្មករក្រុមហ៊ុនកាល់តិច លោក យឿង រ៉េត បញ្ជាក់ជំហរថា បន្ទាប់ពីដាក់ញត្តិនេះរួច ពួកលោកមិនបញ្ឈប់ការតវ៉ានៅតាមស្ថានីយទេ ប្រសិនបើគ្មានដំណោះស្រាយ។ ប៉ុន្តែ លោកសង្ឃឹមលើស្ថានទូតអាមេរិក៖ «ខ្ញុំ រំពឹងទុកជោគជ័យទៅលើស្ថានទូត ព្រោះក្រុមហ៊ុននេះជាក្រុមហ៊ុនស្តង់ដារ ហើយជាក្រុមហ៊ុនរបស់អាមេរិកាំងទៀត។ អ៊ីចឹងខ្ញុំសង្ឃឹមថា អាមេរិកាំង មិនបណ្ដែតបណ្ដោយឱ្យរឿងហ្នឹងអូសបន្លាយពេលវេលាតទៅទៀតទេ។»
បុគ្គលិកធ្វើកូដកម្មមួយរូប លោក ឈួន សុភ័ណ្ណារ៉ា ត្អូញថា ប្រាក់ឈ្នួលដែលក្រុមហ៊ុនផ្ដល់ឱ្យមានការលំបាកសម្រាប់ការទ្រទ្រង់ ជីវភាពបច្ចុប្បន្ន៖ «សម្រាប់ប្រាក់ខែ ១១០ដុល្លារ តើយើងអាចរស់នៅសមរម្យទេ? ធម្មតាយើងដឹងហើយ យើងនិយាយពីរោងចក្រវិញ គ្រាន់តែរោងចក្រចេញគោលការណ៍ថាឡើងប្រាក់ខែគោល ១០០ គោលការណ៍ហ្នឹងមិនទាំងចេញថាឱ្យ ១០០ផង ថ្លៃឡើងមុនបាត់ទៅហើយ។ យើងគិតតែថ្លៃផ្ទះ ចុះថ្លៃម្ហូបអាហារ អង្ករត្រីសាច់ស្អីៗសុទ្ធតែថ្លៃ សួរថាតើប្រាក់ខែប៉ុណ្ណឹងយើងអាចបែងចែកគ្រប់ទេ។ ហ្នឹងសម្រាប់អ្នកខ្លួនមួយ។ ចុះសម្រាប់មានប្រពន្ធមានកូន? បើសិនជាអ្នកមានប្រពន្ធហ្នឹងមានការងារដែរ នោះមិនអីទេ។ ចុះសម្រាប់ដែលអត់ការងារធ្វើ ហើយបើសិនគ្នាមានបន្ទុកនៅក្នុងគ្រួសារ មានកូន ឬមានម្ដាយចាស់ជរា មានឈឺទៀត សួរតើស្ថានភាពរបស់ពួកគេនឹងទៅជាយ៉ាងម៉េច? ឬមួយក៏ឱ្យពួកគេរង់ចាំថ្ងៃស្លាប់?»
លោក ស ម៉ូរ៉ា មានប្រសាសន៍ថា ប្រសិនបើមិនមានដំណោះស្រាយដែលអាចទទួលយកបានទេ ក្រុមបុគ្គលិកកម្មករនឹងបន្តធ្វើកូដកម្ម ដោយមិនបម្រើសេវាដល់អតិថិជន ហើយនឹងតាមដានដំណឹងអំពីញត្តិដែលបានដាក់ទៅស្ថានទូតនេះ។ ក្រុមបុគ្គលិកកម្មករ ក៏នឹងស្វែងរកការគាំទ្រជាសកម្មភាពសាមគ្គីភាពពីសមាជិក និងសហព័ន្ធសហជីពអន្តរជាតិ ដើម្បីដាក់សម្ពាធលើក្រុមហ៊ុនឈេហ្វរ៉ុន នៅកម្ពុជា ដែរ៕
No comments:
Post a Comment