លោកនាយក រដ្ឋមន្រ្តី ហ៊ុន សែន កាលពីកន្លងទៅ
ហ៊ុន សែន ព្រមានចាប់ខ្លួន ថ្នាក់ដឹកនាំ គណបក្ស សង្គ្រោះជាតិ បើអស់ការអត់ធ្មត់
ដោយ៖ ស៊ុន ណារិន / វីអូឌី | ថ្ងៃអង្គារ ទី10 មិថុនា 2014
លោកនាយក រដ្ឋមន្ត្រី ហ៊ុន សែន នៅថ្ងៃអង្គារនេះ ព្រមានចាប់ខ្លួន ថ្នាក់ដឹកនាំ គណបក្ស សង្គ្រោះជាតិ ក្នុងករណីចាំបាច់ណាមួយ ប្រសិនបើ លោក អស់ការអត់ធ្មត់ នឹងគណបក្សប្រឆាំង ដែលតែងតែ បំផ្លើសការពិត និងដើរតវ៉ា ជាបន្តបន្ទាប់។
លោកនាយករដ្ឋមន្ត្រីលើកឡើងបែបនេះជាការព្រមានចាត់វិធាននឹងអ្នកដែលបញ្ចេញពាក្យចចាមអារ៉ាមដែលលោកសំដៅទៅរកគណបក្សសង្គ្រោះជាតិថា លោកដាច់សរសៃឈាមខួរក្បាលស្លាប់។ លោកប្រតិកម្មខ្លាំងៗថាជានេះការនិយាយបំផ្លើសការពិត និងព្រហើនជាមួយនាយករដ្ឋមន្ត្រី។
លោកនាយករដ្ឋមន្ត្រីបញ្ជាក់ថា ក្នុងករណីលោកដាច់សរសៃឈាម អ្នកបន់ឲ្យលោកស្លាប់ គួរតែវេចបង្វេចឲ្យស្រួល ព្រោះការបញ្ជាកម្លាំងរួម គឺចេញពីលោកតែមួយគត់។
លោកនាយករដ្ឋមន្ត្រីថ្លែងបន្តសំដៅទៅរកគណបក្សប្រឆាំងថា«....ផ្លូវច្បាប់មិនទាន់រួចខ្លួនទេ នេះមិនមែនគំរាមទេ អត់អភ័យឯកសិទ្ធិផង.... ពេលមានការចាំបាច់ ដីកាតុលាការចាប់ខ្លួនតែម្តង»។
លោកនាយករដ្ឋមន្ត្រី មិនបានបញ្ជាក់ថាតើការចាប់ខ្លួននោះដោយសារមូលហេតុអ្វីនោះទេ តែលោកថា ផ្លូវច្បាប់មិនទាន់រួចខ្លួនទេចំពោះការញុះញង់ឲ្យខូចទ្រព្យសម្បត្តិ និងស្លាប់មនុស្សកាលពីកន្លងទៅ។
លោកនាយករដ្ឋមន្ត្រី នៅថ្ងៃនេះ ក៏បានបញ្ជាក់ថាលោកឯកភាពនឹងការធ្វើវិសោធនកម្មរដ្ឋធម្មនុញ្ញ ដោយដាក់គជបក្នុងជំពូក១៥នៃរដ្ឋធម្មនុញ្ញ ដើម្បីចែងពីតួនាទី ភារកិច្ច និងការជ្រើសរើស។ លោកហ៊ុន សែន បន្តថា លោកអនុញ្ញាតឲ្យបង្កើតជាទូរទស្សន៍ក្នុងការសហការជាមួយក្រុមហ៊ុនឯកជន តែមិនឲ្យបោះឆ្នោតឡើងវិញជាដាច់ខាត គឺបោះឆ្នោតនៅក្នុងឆ្នាំ២០១៨។
VOD មិនទាន់អាចទាក់ទងលោក សម រង្ស៊ី ប្រធានគណបក្សសង្គ្រោះជាតិ និងមន្ត្រីផ្សេងៗទៀត ដើម្បីអត្ថាធិប្បាយលើបញ្ហានេះបាននៅឡើយទេ។
បេក្ខជនតំណាងរាស្ត្រជាប់ឆ្នោតរបស់គណបក្សសង្គ្រោះជាតិ លោក សុន ឆ័យ មានប្រសាសន៍ថា ការព្រមានរបស់លោក ហ៊ុន សែន គឺជាសិទ្ធិរបស់លោក តែថាក្នុងនាមជាអ្នកនយោបាយមិនគួរធ្វើអ្វីតាមតែកំហឹងរបស់ខ្លួននោះទេ ត្រូវគិតពីប្រយោជន៍ជាតិជាធំ។ លោកបន្តថា ក្នុងបញ្ហានយោបាយមិនត្រូវយកអំណាចមកគំរាមកំហែងអ្នកណាមួយនោះទេ ព្រោះការរិះគន់ខ្លះក៏ជួយឆ្លុះបញ្ចាំងដល់ខ្លួនផងដែរ៕
No comments:
Post a Comment