ប្រជាពលរដ្ឋ ជាង១០០នាក់ ពុល នំបញ្ចុក នៅស្រុកកណ្តាលស្ទឹង នៅថ្ងៃអាទិត្យនេះ
ដោយ៖ ជន ស្រីណុច / វីអូឌី | ថ្ងៃអាទិត្យ ទី29 មិថុនា 2014
ប្រជាពលរដ្ឋ ជាង១០០នាក់ ក្នុងឃុំ ចំនួន៤ នៃស្រុកកណ្តាលស្ទឹង ខេត្តកណ្តាល ពុល នំបញ្ចុក ដែលគេធ្វើលក់ នៅក្នុងភូមិ ជាបន្តបន្ទាប់ នៅថ្ងៃអាទិត្យនេះ។
ពលរដ្ឋម្នាក់ លោក ម៉ៅ ឆន ប្រាប់ VOD នៅរសៀលថ្ងៃទី២៩ ខែមិថុនា នេះថា នៅម៉ោងប្រមាណ១១ថ្ងៃត្រង់ ប្រជាពលរដ្ឋ ជាង១០០នាក់ ពុល នំបញ្ចុក រាគក្អូត ធ្ងន់ធ្ងរ។ លោក បញ្ជាក់ថា ការរាគក្អួត របស់ ប្រជាពលរដ្ឋនេះ បន្ទាប់ពី ស្ត្រីម្នាក់ រស់នៅឃុំអំពៅព្រៃ ស្រុកកណ្តាលស្ទឹង ធ្វើ និងរែកលក់តាមភូមិ។
នាយរង សេនាធិការ នៃអធិការដ្ឋាននគរបាល ស្រុកកណ្តាលស្ទឹង លោក យ៉ាង សារ៉េត ឲ្យដឹងថាពិតជាមានករណី ពុល នំបញ្ចុក កើតឡើងមែន ដោយក្នុងនោះ មានប្រជាពលរដ្ឋ រស់នៅក្នុងឃុំចំនួន៤ពុល រួមមាន ឃុំអំពៅព្រៃ ឃុំកណ្តោក ឃុំព្រែកថ្លែង និងឃុំសៀមរាប។ តែ លោក មិនបានបញ្ជាក់ ពីចំនួនមនុស្ស ទេ ហើយថា ពេលនេះ សមត្ថកិច្ច បានចុះជួយសង្គ្រោះ ដោយបញ្ជួនអ្នកពុលទាំងនោះ ទៅមន្ទីពេទ្យហើយ ។
លោក យ៉ាង សារ៉េត ឲ្យដឹងទៀតថា អាជ្ញាធរ កំពុងធ្វើការសាកសួរ ស្ត្រី ដែលជាអ្នកធ្វើនំបញ្ចុកលក់នោះ អំពីមូលហេតុ ដែលនាំឲ្យពុល៕
No comments:
Post a Comment