សហព័ន្ធ ខ្មែរក្រោម ទទូច ឲ្យតំណាង អ.ស.ប. ជួបពលរដ្ឋ ខ្មែរក្រោម ផ្ទាល់ នៅកម្ពុជាក្រោម
RFA | ១៨ មិថុនា ២០១៤
លោក ថាច់ ង៉ុក ថាច់ (ឆ្វេង) ប្រធានសហព័ន្ធខ្មែរកម្ពុជាក្រោម (KKF) Photo: RFA
សហព័ន្ធ ខ្មែរ កម្ពុជាក្រោម អំពាវនាវ ឲ្យតំណាង អង្គការ សហប្រជាជាតិ (អ.ស.ប.) ទទួលបន្ទុក សិទ្ធិជំនឿ សាសនា ចុះជួបព្រះសង្ឃ និងប្រជាពលរដ្ឋ ខ្មែរក្រោម ដើម្បី ស្វែងយល់ ពីស្ថានភាព សិទ្ធិជំនឿ សាសនា ក្នុងពេល ដែលតំណាង អង្គការ សហប្រជាជាតិ ទៅធ្វើ ទស្សនកិច្ច នៅប្រទេស វៀតណាម នៅខែកក្កដា ឆ្នាំ២០១៤ ខាងមុខនេះ។
ការអំពាវនាវនេះ ធ្វើឡើង នៅពេល ដែលសហព័ន្ធ ខ្មែរ កម្ពុជាក្រោម យល់ឃើញថា, ប្រទេសវៀតណាម មិនទាន់បាន គោរព ឲ្យបានពេញលេញ ចំពោះ សិទ្ធិជំនឿ សាសនា របស់ ខ្មែរក្រោម ដូចដែលវៀតណាម បានសន្យា ចំពោះ អង្គការ សហប្រជាជាតិ និងសហគមន៍ អន្តរជាតិ នៅឡើយ។
សហព័ន្ធខ្មែរកម្ពុជាក្រោម ដែលមានមូលដ្ឋាននៅសហរដ្ឋអាមេរិក ទទូចឲ្យតំណាងអង្គការសហប្រជាជាតិ ទទួលបន្ទុកសិទ្ធិជំនឿសាសនា លើកឡើងអំពីបញ្ហាសិទ្ធិមនុស្សរបស់ខ្មែរក្រោម ជាពិសេសសិទ្ធិជំនឿសាសនាជាមួយអាជ្ញាធររដ្ឋាភិបាលវៀតណាម ក្នុងពេលពួកគេធ្វើទស្សនកិច្ចទៅកាន់ប្រទេសកុម្មុយនីស្តមួយនេះ ចាប់ពីថ្ងៃទី១១ ដល់ថ្ងៃទី២១ ខែកក្កដា។
ប្រធានសហព័ន្ធខ្មែរកម្ពុជាក្រោម លោក ថាច់ ង៉ុក ថាច់ ឲ្យដឹងតាមទូរស័ព្ទពីប្រទេសបារាំង នៅព្រឹកថ្ងៃទី១៨ ខែមិថុនា ថា ក្រុមការងារសហព័ន្ធខ្មែរកម្ពុជាក្រោម កាលពីថ្ងៃទី១៧ ខែមិថុនា បានចូលជួបតំណាងក្រុមការងារអង្គការសហប្រជាជាតិ ទទួលបន្ទុកសិទ្ធិជំនឿសាសនា ក្នុងទីក្រុងហ្សឺណែវ ប្រទេសស្វីស ដើម្បីជម្រាបប្រាប់ពួកគេអំពីស្ថានភាពសិទ្ធិជំនឿសាសនារបស់ពលរដ្ឋ ខ្មែរ នៅដែនដីកម្ពុជាក្រោម និងដើម្បីស្នើសុំឲ្យតំណាងអង្គការសហប្រជាជាតិ ជួយពិនិត្យមើលស្ថានភាពពិតប្រាកដនៅទីនោះ ថាតើអ្វីដែលព្រះសង្ឃ និងពលរដ្ឋខ្មែរក្រោមកំពុងជួបប្រទះ វាដូចទៅនឹងអ្វីដែលរដ្ឋាភិបាលវៀតណាម តែងអះអាងប្រាប់អង្គការសហប្រជាជាតិ ដែរឬទេ?
លោកបន្តថា ការរឹតត្បិត និងការរំលោភបំពានទៅលើសិទ្ធិជំនឿសាសនានៅកម្ពុជាក្រោម នឹងធ្វើឲ្យប៉ះពាល់ធ្ងន់ធ្ងរទៅលើអត្តសញ្ញាណផ្សេងៗទៀតរបស់ខ្មែរ ក្រោមទាំងមូល ដូចជា ប្រពៃណី វប្បធម៌ និងអក្សរសាស្ត្រ ជាដើម។ លោកកត់សម្គាល់ទៀតថា ខុសពីខ្មែរក្រោមសម្រាប់ជនជាតិយួន វិញ បើទោះណាជារដ្ឋាភិបាលវៀតណាម រឹតត្បិតទៅលើជំនឿសាសនារបស់ពួកគេក្តី ក៏ជនជាតិយួន ទាំងអស់នោះនៅតែអាចថែរក្សាភាសា ប្រពៃណី និងទំនៀមទម្លាប់របស់ពួកគេបានដដែល។
លោក ថាច់ ង៉ុក ថាច់៖ «បញ្ហាជំនឿសាសនាវាប៉ះពាល់ច្រើន ដូចជាកាលណាប៉ះពាល់ដល់ជំនឿសាសនារបស់បងប្អូនខ្មែរក្រោម យើងគឺទាក់ទងដល់រឿងភាសាហ្នឹងផង ទំនៀមទម្លាប់ហ្នឹងផង ការសិក្សាជាភាសាខ្មែរហ្នឹងផង ហើយជំរុញឲ្យមនុស្សមានការភ័យខ្លាច។ ដូច្នេះយើងឃើញថា បាត់ទូទៅទាំងអស់ គ្រាន់តែប៉ះរឿងជំនឿសាសនាមួយ។»
កាលពីខែវិច្ឆិកា ឆ្នាំ២០១៣ ក្នុងដំណើរទស្សនកិច្ចទៅកាន់ប្រទេសវៀតណាម របស់បេសកជនពិសេសនៃការិយាល័យឧត្ដមស្នងការសិទ្ធិមនុស្សអង្គការ សហប្រជាជាតិ ទទួលបន្ទុកសិទ្ធិវប្បធម៌ អ្នកស្រី ហ្វារីដា សាហីដ (Farida Shaheed) អង្គការតំណាងប្រជាជាតិគ្មានអ្នកតំណាង ហៅកាត់ថា យូ.អ៊ិន.ភី.អូ (UNPO) ដែលមានខ្មែរក្រោមជាសមាជិកដែរនោះ ក៏បានទទូចឲ្យបេសកជនពិសេសរូបនេះ ចុះជួបសហគមន៍ខ្មែរនៅដែនដីកម្ពុជាក្រោម ដោយអង្គការមួយនេះសិក្សាឃើញថា សិទ្ធិសេរីភាពផ្សេងៗរបស់ពលរដ្ឋខ្មែរក្រោម ដូចជា សិទ្ធិប្រតិបត្តិសាសនា ការសិក្សាអក្សរសាស្ត្រ និងវប្បធម៌ខ្មែរ ត្រូវបានរដ្ឋាភិបាលវៀតណាម រំលោភបំពាន។
មិនខុសពីលើកមុនដែរ ដំណើរទស្សនកិច្ចរបស់តំណាងអង្គការសហប្រជាជាតិ នៅខែក្រោយនេះ ក៏ស្របពេលដែលព្រះសង្ឃខ្មែរក្រោម ២អង្គ និងពលរដ្ឋខ្មែរក្រោម ៦នាក់ផ្សេងទៀត ដែលត្រូវតុលាការប្រជាជនវៀតណាម ខេត្តឃ្លាំង កាត់ទោសកាលពីខែកញ្ញា ឆ្នាំ២០១៣ កំពុងស្ថិតនៅក្នុងពន្ធនាគារនៅឡើយ។ ពួកគេត្រូវបានអាជ្ញាធរវៀតណាម កាត់ទោសឲ្យជាប់ពន្ធនាគារពី ១០ខែទៅ ៦ឆ្នាំ ដោយចោទប្រកាន់ពីបទភៀសខ្លួនទៅក្រៅប្រទេស ដើម្បីប្រឆាំងរដ្ឋាភិបាល ពីបទនាំមនុស្សរត់ចេញទៅក្រៅប្រទេស និងពីបទបង្កអសន្តិសុខសណ្ដាប់ធ្នាប់សាធារណៈ ជាដើម។
លោក ថាច់ ង៉ុក ថាច់ បានអំពាវនាវឲ្យតំណាងអង្គការសហប្រជាជាតិ ចុះជួបដោយផ្ទាល់ជាមួយព្រះសង្ឃ និងពលរដ្ឋខ្មែរក្រោម ពិសេសព្រះសង្ឃ និងពលរដ្ឋនៅវត្តព្រៃជាប់ និងវត្តសិរីតាសេក ក្នុងស្រុកជ្រោយញ ខេត្តឃ្លាំង និងព្រះសង្ឃនៅតាមទីក្រុង និងខេត្តផ្សេងទៀត ដូចជា នៅក្រុងព្រៃនគរ ខេត្តព្រះត្រពាំង និងខេត្តមាត់ជ្រូក ជាដើម៕
No comments:
Post a Comment