សាលាដំបូងរាជធានីភ្នំពេញ ប្រកាសសាលក្រមកំបាំងមុខ លោក សួន សេរីរដ្ឋា នៅព្រឹកថ្ងៃព្រហស្បតិ៍នេះ (រូបថត៖ វីរៈ)
លោក សុក សំអឿន មេធាវីជនជាប់ចោទ (រូបថត៖ តាំង វីដា)
សាលាដំបូង ប្រកាស ប្តូរបទចោទ លើ លោក សួន សេរីរដ្ឋា ទៅជាបទ រួមគំនិតក្បត់
ដោយ៖ តាំង វីដា / វីអូឌី | ថ្ងៃព្រហស្បតិ៍ ទី10 កក្កដា 2014
សាលាដំបូង រាជធានី ភ្នំពេញ នៅថ្ងៃព្រហស្បតិ៍នេះ សម្រេចចោទ លោក សួន សេរីរដ្ឋា ប្រធានចលនា អំណាចពលរដ្ឋខ្មែរ ពីបទរួមគំនិតក្បត់ ដោយបង្វិល សំណុំរឿង ឲ្យស៊ើបអង្កេតជាថ្មី ពាក់ព័ន្ធ នឹងសកម្មភាព ចែកចាយផ្កាកុលាប និងខិត្តប័ណ្ណ ទៅកាន់កងទ័ព ឲ្យប្រឆាំងរដ្ឋាភិបាល កម្ពុជា។
ការប្រកាសសាលក្រមកំបាំងមុខជនជាប់ចោទ នៅថ្ងៃទី១០ ខែកក្កដានេះ ត្រូវបានប្រធានអង្គជំនុំជម្រះលោក តុប ឈុនហេង អះអាងថា ជាការសម្រេចប្តូរបទចោទពីញុះញង់ឲ្យប្រព្រឹត្តបទឧក្រិដ្ឋជាអាទិ៍ មកជាបទរួមគំនិតក្បត់ តាមមាត្រា៤៥៣ នៃក្រមព្រហ្មទណ្ឌ ដែលបានប្រព្រឹត្តិកាលពីថ្ងៃទី១៤ ខែសីហា ឆ្នាំ២០១៣។ លោកថា ការសម្រេចនេះ គឺផ្អែកលើការសន្និដ្ឋាន ចំពោះចម្លើយរបស់សាក្សី អំណះអំណាងរបស់តំណាងអយ្យការ និងការបំភ្លឺរបស់មេធាវី ដែលបានលើកឡើងក្នុងសវនការជំនុំជម្រះ នៅថ្ងៃពុធម្សិលមិញនេះ ខណៈដែលជនជាប់ចោទ អវត្តមាន។
លោក តុប ឈុនហេង បន្តថា ការចោទប្រកាន់ លោក សួន សេរីរដ្ឋា គឺផ្អែកលើខិត្តប័ណ្ណ ដែលគ្រោងនឹងចែកចាយ ដោយសរសេរថា "ផ្កាកុលាបអហិង្សាពណ៌លឿង សម្រាប់ការផ្លាស់ប្ដូរ ជូនមួយទងម្នាក់ ដល់វីរៈកងទ័ពគ្រប់រូបដែលជាកូនចៅពលរដ្ឋខ្មែរ! សូមបែរចុងអាវុធតម្រង់ទៅជនផ្តាច់ការ ហើយយកជីវិតការពារពលរដ្ឋជាឈាមខ្មែរដូចគ្នា គឺជាខ្មែរតែមួយដែលត្រូវការពារគ្នាទៅវិញទៅមក។"
លោក សុក សំអឿន មេធាវីការពារជនជាប់ចោទ យល់ថា ការចោទប្រកាន់ដោយផ្អែកលើចម្លើយសាក្សី ដោយគ្រាន់តែជាការអះអាងលេចឮតគ្នានោះ គឺមិនមានមូលដ្ឋានចោទឡើយ។ លោកថាការចោទប្រកាន់របស់ព្រះរាជអាជ្ញា លោក មាស ចន្ទពិសិដ្ឋ គឺមិនមានភស្តុតាងជាក់លាក់ ក្នុងការចោទ ឬប្តូរបទចោទនោះទេ។ លោកហៅការសម្រេចរបស់តុលាការ គឺបង្ហាញពីចេតនា បំបិទសេរីភាពក្នុងការបញ្ចេញមតិរបស់ពលរដ្ឋ ៖ «ខ្ញុំស្នើម្សិលមិញដែរថា រឿងអំពើថ្ងៃនេះ សម្រេចទៅ បើមានភស្តុតាង ក៏ដាក់ទោសទៅ បើអត់មានភស្តុតាង ក៏លើកលែងការចោទប្រកាន់ទៅ ហើយបើរឿង មានអំពើអ្វីផ្សេងៗទៀត ដែលជាបទឱក្រិដ្ឋ យើងចោទទៀតទៅ ហ្នឹងជារឿងផ្សេងមួយទៀត និយាយរួមទៅ បើយើងគិតមែនទែនទៅ ជាមតិ ជាយោបល់ ការយល់ឃើញរបស់មនុស្ស ហើយដល់អញ្ចឹងទៅ សិទ្ធិបញ្ចេញមតិហ្នឹង អាចចង្អៀត។»
លោក សួន សេរីរដ្ឋា ប្រធានចលនាអំណាចពលរដ្ឋខ្មែរ បច្ចុប្បន្ន កំពុងរស់នៅសហរដ្ឋអាមេរិក។ លោក បានទទួលស្គាល់ តាមរយៈសេចក្តីថ្លែងការណ៍មួយផ្ញើមកកាន់អង្គសវនការ ដោយថា ខ្លឹមសារក្នុងខិត្តប័ណ្ណនោះ គឺលោកពិតជាបានសរសេរមែន ប៉ុន្តែគ្មានចរិតញុះញង់ឲ្យមានបទឧក្រិដ្ឋនោះទេ តែជាការផ្ញើសារអប់រំដល់កងទ័ព និងសមត្ថកិច្ច កុំឲ្យប្រើហិង្សា ហើយយកច្បាប់ជាធំ និងកុំយកកាណុងកាំភ្លើងបាញ់មនុស្សស្លូតត្រង់តែប៉ុណ្ណោះ។
ប្រធានគ្រប់គ្រងបច្ចេកទេសស៊ើបអង្កេតនៃអង្គការសិទ្ធិមនុស្សលីកាដូ លោក អំ សំអាត ដែលតាមដានសវនការនេះ យល់ថា ដំណើរការសនវការនេះ ហាក់មិនមានភស្តុតាងអ្វី ដែលអាចចោទលើជនជាប់ចោទឡើយ។ លោកថា ការសម្រេចពីបទរួមគំនិតក្បត់នេះ គឺជាចេតនា នៃការផ្សារភ្ជាប់រឿងនយោបាយ ដើម្បីស្វែងរកអ្នកជាប់ពាក់ព័ន្ធដទៃទៀត ៖ «អ្វីដែលសំខាន់ គឺខ្ញុំគិតថា ករណីនេះ គឺគេចង់ ភ្ជាប់ទៅនឹងរឿងនយោបាយច្រើនជាង បើសិនជាបទល្មើសនេះ ជាបទល្មើសឱក្រិដ្ឋ អន្តរាយធ្ងន់ធ្ងរទេ គឺបទចូលរួមប្រព្រឹត្តក្នុងអំពើក្បត់ អញ្ចឹងគឺម្នាក់ឯងមិនអាចធ្វើបានទេ វាពាក់ព័ន្ធនឹងមនុស្សច្រើន នេះគឺជាចេតនាមួយ ថាចោទបទហ្នឹង ច្បាស់ជាមានអ្នកពាក់ព័ន្ធច្រើនទៀត អញ្ចឹងបានន័យ វាជាចេតនាមួយពាក់ព័ន្ធនឹងរឿងនយោបាយច្រើនជាង
។
»
កាលពីថ្ងៃទី១៤ ខែសីហា ឆ្នាំ២០១៣ សមត្ថកិច្ចរាជធានីភ្នំពេញ បានចាប់ខ្លួនយុវជន៤នាក់ ដោយចោទពីបទញុះញង់ឲ្យមានអំពើហិង្សាប្រដាប់អាវុធផ្តួលរំលំរាជរដ្ឋាភិបាល និងត្រូវបានបញ្ជូនទៅឃុំខ្លួនបណ្តោះអាសន្ន នៅពន្ធនាគារព្រៃស។ ប៉ុន្តែ ក្រោយការជំនុំជម្រះនៅថ្ងៃទី៩ ខែកញ្ញា ឆ្នាំ២០១៣ សាលាដំបូងបានសម្រេចលើកលែងទោសអ្នកទាំង៤នាក់នោះ។
ក្រោយមក អគ្គស្នងការនគរបាលជាតិ បានចេញសេចក្ដីប្រកាសព័ត៌មានមួយបញ្ជាក់ថា អ្នកទាំង៤នាក់នោះ ធ្វើតាមបញ្ជារបស់លោក សួន សេរីរដ្ឋា ដែលកំពុងគេចខ្លួននៅក្រៅប្រទេស ស្របពេលដែលលោក សួន សេរីរដ្ឋា បានបង្ហោះព័ត៌មានលើបណ្តាញសង្គមហ្វេសប៊ុក ដែលមានខ្លឹមសារ ដូចខិត្តប័ណ្ណដែលសមត្ថកិច្ចរឹបអូសបាននោះ។
បើតាមលោក សុក សំអឿន ការចោទប្រកាន់ថ្មីនេះ លោក សួន សេរីរដ្ឋា នឹងប្រឈមការជាប់ពន្ធនាគារពី៥ ទៅ១០ឆ្នាំ ប្រសិនបើតុលាការរកឃើញថា មានទោសពិតមែន៕
No comments:
Post a Comment