គណបក្ស សង្គ្រោះជាតិ ធ្វើសន្និបាត បង្ហាញជំហរ មុនពេល ចូលប្រជុំ សភា
វិទ្យុ អាស៊ី សេរី | ២៥ កក្កដា ២០១៤
លោក កឹម សុខា អនុប្រធាន គណបក្ស សង្គ្រោះជាតិ នៅមុខ សាលាដំបូង រាជធានីភ្នំពេញ កាលពីថ្ងៃទី ២៥ ខែកក្កដា ឆ្នាំ ២០១៤។ RFA/Tin Zakariya
គណបក្ស សង្គ្រោះជាតិ នឹងធ្វើសន្និបាត ក្រុមប្រឹក្សាជាតិ នៅថ្ងៃ ទី២៧ កក្កដា។ មេដឹកនាំ ជាន់ខ្ពស់ គណបក្ស សង្គ្រោះជាតិ លើកឡើង ថា, នៅក្នុងសន្និបាត ក្រុមប្រឹក្សា ជាតិនេះ គណបក្ស សង្គ្រោះជាតិ នឹងដាក់ ទិសដៅ របស់ខ្លួន ដើម្បី ឲ្យប្រជាពលរដ្ឋ យល់ដឹង កាន់តែច្បាស់ អំពី ទិសដៅ គណបក្ស សង្គ្រោះជាតិ ដើម្បី ផលប្រយោជន៍ ប្រជាពលរដ្ឋ។
លោក ក៏បញ្ជាក់ប្រាប់ វិទ្យុ អាស៊ី សេរី នារសៀលថ្ងៃ ទី២៥ កក្កដា នេះ ថា, ប្រការ ដែលលោក នៅមិនទាន់ បកស្រាយ អំពី កិច្ចព្រមព្រៀង ជាមួយ គណបក្ស ប្រជាជនកម្ពុជា ក៏ព្រោះតែ លោក នៅរង់ចាំ ឆ្លងយោបល់ ពីសមាជិក នៃសន្និបាត ជាមុនសិន។
មន្ត្រីជាន់ខ្ពស់ គណបក្ស សង្គ្រោះជាតិ ប្ដេជ្ញាចិត្ត ថា, នៅពេល បេក្ខជន តំណាងរាស្ត្រ ជាប់ឆ្នោត គណបក្ស សង្គ្រោះជាតិ ចូលប្រជុំ សភា, តំណាងរាស្ត្រ គណបក្សនេះ នឹងធ្វើ ការកែទម្រង់ គណៈកម្មាធិការ ជាតិ រៀបចំ ការបោះឆ្នោត ឲ្យបានមុនគេ ដើម្បី បញ្ចប់បញ្ហា ជម្លោះ នៅក្រោយពេល បោះឆ្នោត។
អនុប្រធាន គណបក្ស សង្គ្រោះជាតិ លោក កឹម សុខា ឲ្យដឹង នៅថ្ងៃ ទី២៥ កក្កដា ថា, ទោះបី ជាគណបក្ស សង្គ្រោះជាតិ យល់ព្រម ចូលប្រជុំសភា ហើយក្ដី, តែ គណបក្ស សង្គ្រោះជាតិ នៅតែ ធ្វើប្រជាមតិ ប្រជាពលរដ្ឋ នៅពេល ធ្វើសន្និបាត ក្រុមប្រឹក្សាជាតិ នៅថ្ងៃ ទី២៧ កក្កដា។ បើសិនជា ប្រជាពលរដ្ឋ ទាមទារ ឲ្យគណបក្ស សង្គ្រោះជាតិ ទាមទារ អ្វីបន្ថែមទៀត ទៅលើអ្វី ដែលមានស្រាប់ នៅក្នុងលទ្ធផល នៃការចរចា ជាមួយ គណបក្ស ប្រជាជនកម្ពុជា នេះ, គណបក្ស សង្គ្រោះជាតិ នឹងបន្ថែម ចំណុច ដែលប្រជាពលរដ្ឋ ចង់បាន ដើម្បី ស្នើឡើងទៀត ដាក់នៅក្នុង កិច្ចព្រមព្រៀង នោះទៀត៖ «សន្និបាត គណបក្ស សង្គ្រោះជាតិ ខាងមុខ, ខ្ញុំ នឹងដាក់ ទិសដៅ របស់ខ្លួន, ព្រោះ ឥឡូវនេះ ប្រជាពលរដ្ឋ ហាក់ដូច ជាស្រពិចស្រពិល លើគណបក្ស សង្គ្រោះជាតិ។»
លោក កឹម សុខា បញ្ជាក់ថា ការចូលស្បថ កាន់តំណែង សភា ក៏អាស្រ័យ ទៅលើ ការសម្រេច របស់ ក្រុមប្រឹក្សាជាតិ ជាមុនសិនដែរ។ ទោះជាយ៉ាងណា ក៏ដោយ, លោក មានប្រសាសន៍ ថា, គណបក្ស ទាំងពីរ បានព្រមព្រៀងគ្នា បង្កើតក្រុមការងារ ៣ទៀត ដើម្បី ពិភាក្សា ទៅលើ ចំណុចគោល ធំៗ ទាំង៧ ដែលគណបក្ស ទាំងពីរ បានឯកភាព ក្នុងការចរចា កាលពីថ្ងៃ ទី២២ កក្កដា នោះ។
លោក កឹម សុខា បញ្ជាក់ថា គណៈកម្មការ ៣នោះ រួមមាន៖ ក្រុមការងារ ធ្វើវិសោធនកម្ម រដ្ឋធម្មនុញ្ញ ជំពូក ទី១៥ ដើម្បី បញ្ចូល គ.ជ.ប. ជាស្ថាប័នធម្មនុញ្ញ; ទី២, ក្រុមការងារ វិសោធនកម្ម បទបញ្ជាផ្ទៃក្នុង រដ្ឋសភា ដើម្បី ឲ្យសភា ទទួលស្គាល់ សិទ្ធិអំណាចគ ណបក្សប្រឆាំង; ក្រុមការងារ រៀបចំ វិសោធនកម្មច្បាប់ បោះឆ្នោត។ លោក បញ្ជាក់ថា, ក្រុមការងារ ទាំង៣ ចាប់ផ្ដើម ធ្វើការងារ ជាមួយគ្នា។ ចាប់ពីថ្ងៃនេះ តទៅ នៅពេល ក្រុមការងារ ទាំងបីនេះ ធ្វើបញ្ចប់ ទើប បេក្ខជន តំណាងរាស្ត្រ ជាប់ឆ្នោត គណបក្ស សង្គ្រោះជាតិ នឹងចូលប្រជុំ សភា។
ការថ្លែង ឲ្យដឹង របស់ អនុប្រធាន គណបក្ស សង្គ្រោះជាតិ លោក កឹម សុខា បែបនេះ នៅបន្ទាប់ ពីលោក បានចេញ ពីបន្ទប់សាកសួរ របស់ ចៅក្រម សាលាដំបូង រាជធានីភ្នំពេញ នៅព្រឹក ថ្ងៃ ទី២៥ កក្កដា ទាក់ទង នឹងការទទួល ខុសត្រូវ របស់ គណបក្ស សង្គ្រោះជាតិ។ លោក កឹម សុខា ថ្លែងប្រាប់ អ្នកសារព័ត៌មាន នៅខាងក្រៅ តុលាការ ថា, ក្រោយពីសាកសួរ, តុលាការ មិនបាន ចោទប្រកាន់ លោកទេ, ហើយ តុលាការ ក៏បញ្ចប់ សំណុំរឿង របស់លោក នៅថ្ងៃ ទី២៥ កក្កដា នេះដែរ។
ចៅក្រម សាលាដំបូង រាជធានីភ្នំពេញ សាកសួរ លោក កឹម សុខា នៅព្រឹកថ្ងៃ ទី២៥ កក្កដា នេះ មានរយៈពេល ខ្លីបំផុត ខុសពីសព្វដង, គឺ មានរយៈពេល ប្រមាណ ១៥នាទីទេ។ បញ្ហានេះ ក្រុមអ្នកច្បាប់លើកឡើងថា តុលាការបានអនុវត្តនីតិវិធីលើសំណុំរឿងរបស់ លោក កឹម សុខា នេះ គ្រាន់តែជារូបភាពបម្រើឲ្យគណបក្សនយោបាយទេ។ អ្នកច្បាប់ពន្យល់ថា បើសិនជាករណីគណបក្សប្រជាជនកម្ពុជា និងគណបក្សសង្គ្រោះជាតិ មិនត្រូវរ៉ូវគ្នាលើរឿងនយោបាយទេ លោក កឹម សុខា គេចមិនផុតពីការចោទប្រកាន់ ឬអាចឈានទៅដល់ការចាប់ខ្លួនពីតុលាការទៀតនោះឡើយ។
អ្នកជំនាញផ្នែកវិទ្យាសាស្ត្រនយោបាយ លោកបណ្ឌិត សុខ ទូច មានប្រសាសន៍ថា គណបក្សជាប់ឆ្នោតទាំងពីរក្រោយពេលឯកភាពគ្នាលើបញ្ហាជម្លោះនយោបាយ នេះ គណបក្សទាំងពីរត្រូវកសាងទំនុកចិត្តពីសហគមន៍ជាតិ និងអន្តរជាតិ ដើម្បីទាក់ទាញអ្នកវិនិយោគ កែទម្រង់ប្រព័ន្ធយុត្តិធម៌ ដើម្បីឲ្យប្រជាពលរដ្ឋទាំងអស់រស់នៅក្នុងក្របខ័ណ្ឌនៃច្បាប់ កុំឲ្យច្បាប់កើតចេញពីឆន្ទៈអ្នកនយោបាយ និងរៀបចំឡើងវិញចំពោះការផ្ដល់ដីសម្បទានសេដ្ឋកិច្ចនោះ៖ «អ៊ីចឹង ខ្ញុំ ជឿជាក់ថា, បើហ្នឹង ជាបញ្ហាគោល, បើសិនជា អាណត្តិ ទី៥នេះ ដើរបាន ជោគជ័យ ទាំងបី ចំណុចនេះ, ខ្ញុំ ជឿជាក់ថា, គណបក្ស ទាំងពីរ នឹងមាន ការគាំទ្រ បន្តទៀត។»
ចំពោះប្រាក់បៀវត្សបេក្ខជនជាប់ឆ្នោតគណបក្សសង្គ្រោះជាតិ វិញ លោក កឹម សុខា បានឆ្លើយតបទៅ លោកបណ្ឌិត ជាម យៀប មន្ត្រីជាន់ខ្ពស់គណបក្សប្រជាជនកម្ពុជា ថាការប្រកាសមិនផ្ដល់ប្រាក់ខែជូនសមាជិកសភាគណបក្សសង្គ្រោះជាតិ ឬមិនផ្ដល់នោះ មិនមែនគណបក្សជាអ្នកកំណត់នោះទេ គឺច្បាប់ជាអ្នកកំណត់។ តែយ៉ាងនេះក្ដី លោក កឹម សុខា បញ្ជាក់ថា បញ្ហាសំខាន់នោះមិនមែនរឿងប្រាក់ខែនោះទេ គឺថា ធ្វើយ៉ាងណាតំណាងរាស្ត្រគណបក្សសង្គ្រោះជាតិ មានលទ្ធភាពធ្វើការជូនប្រជាពលរដ្ឋ និងបម្រើជាតិ។
អ្នកជំនាញផ្នែកវិទ្យាសាស្ត្រនយោបាយ លោកបណ្ឌិត សុខ ទូច មានប្រសាសន៍ថា តាមច្បាប់សភា ត្រូវបើកប្រាក់ខែឲ្យគណបក្សសង្គ្រោះជាតិ តាំងពីសភាប្រកាសបើកអង្គប្រជុំដំបូងមក ពីព្រោះប្រាក់ខែទាំងនោះ ជាថវិការបស់ជាតិ ឬរបស់ប្រជាពលរដ្ឋ៕
No comments:
Post a Comment