បក្សសង្គ្រោះជាតិ អះអាងថា, មានរូបមន្ត ថ្មី ទាក់ទង នឹងការជ្រើសរើស សមាសភាព គ.ជ.ប.
វិទ្យុ អាស៊ី សេរី | ១៣ កក្កដា ២០១៤
លោក កឹម សុខា ប្រធានស្ដីទីគណបក្សសង្គ្រោះជាតិ
ថ្លែងទៅកាន់អ្នកកាសែតនៅមុខព្រះបរមរាជវាំង
នៅថ្ងៃព្រះរាជពិធីដង្ហែ និងតម្កល់ព្រះបរមអដ្ឋិ នាថ្ងៃទី ១១
ខែកក្កដា ឆ្នាំ២០១៤។
RFA/Yeang Socheametta
គណបក្ស សង្គ្រោះជាតិ មានរូបមន្ត ថ្មី ទាក់ទង នឹងការជ្រើសរើស សមាសភាព គណៈកម្មាធិការ ជាតិ រៀបចំ ការបោះឆ្នោត (គ.ជ.ប.) ក្រៅពីរូបមន្ត ២ ភាគ៣។ មន្ត្រីជាន់ខ្ពស់ គណបក្សប្រឆាំង បញ្ជាក់ថា, រូបមន្ត ថ្មីនោះ បានបញ្ជូន ទៅដល់ដៃ គណបក្ស ប្រជាជន កម្ពុជា តាំងពីថ្ងៃ ដង្ហែព្រះអដ្ឋិ ព្រះបរម រតនកោដ្ឋមក ម្ល៉េះ។
មន្ត្រីជាន់ខ្ពស់ គណបក្ស សង្គ្រោះជាតិ លោក យឹម សុវណ្ណ ប្រាប់វិទ្យុ អាស៊ី សេរី នៅរសៀលថ្ងៃ ទី១៣ ខែកក្កដា ថា គណបក្សប្រឆាំង បានបង្ហាញឆន្ទៈ ក្នុងការចរចា ជាមួយ បក្សប្រជាជន ដោយបានបញ្ជូន រូបមន្តថ្មី ទៅបក្ស កាន់អំណាច រួចហើយ។ ប៉ុន្តែ លោក បដិសេធ មិនអត្ថាធិប្បាយ ពីរូបមន្តថ្មី នេះទេ។
ចំណែក ឯប្រធាន ស្តីទី បក្សប្រឆាំង លោក កឹម សុខា វិញ បែរជាបដិសេធ ថា, គណបក្ស សង្គ្រោះជាតិ មិនទាន់ បានបញ្ជូន រូបមន្តថ្មីនេះ ទៅបក្សកាន់អំណាច នោះទេ។ លោក បន្តថា រូបមន្តនោះ ជារូបមន្ត ដែលអាច ដោះស្រាយ ទំនាស់ នយោបាយ នាពេលនេះបាន, ហើយ បក្សទាំងពីរ ក៏នឹងទទួលយក។ ហើយ រូបមន្តនោះ នឹងបង្ហាញ នៅថ្ងៃណា ដែលបក្ស ទាំងពីរ ចរចាគ្នា តែម្តង៖ «យើង ពិសោធមើល កាលណា យើង បញ្ចេញទៅ មុនចឹង, យើង អត់យល់គ្នា។ យើង រិះគន់គ្នាហ្នឹង អត់ចេញទេ។ ពួកគាត់ ចង់ឲ្យ បក្សសង្គ្រោះជាតិ ចូលទៅ ដើម្បី គ្រប់គ្រង ឬចង់កែទម្រង់ ការបោះឆ្នោតហ្នឹង ពិតប្រាកដ។ បើ ចូលទៅ ដើម្បី ឲ្យគេ គ្រប់គ្រង ដដែល, មិនចូលទេ។»
ឆ្លើយតបនឹងបញ្ហានេះ អ្នកតំណាងរាស្ត្រគណបក្សប្រជាជនកម្ពុជា លោក ឈាង វុន មានប្រសាសន៍ថា លោកមិនទាន់បានទទួលដំណឹងពីរូបមន្តរបស់គណបក្សប្រឆាំងនៅឡើយ។ តែបើរូបមន្តនោះមានប្រយោជន៍សម្រាប់ជាតិ នោះបក្សកាន់អំណាចនឹងមិនជំទាស់ទេ៖ «ខ្ញុំ អត់ទាន់ដឹង ថា, គេ ចង់បានអីទេ។ ហើយ បើ គេ ចង់បានស្នើ មែនហើយ, គោរព គោលការណ៍ច្បាប់ ស្រែកជយោ, ព្រោះថា វា មានប្រយោជន៍ សម្រាប់រាស្ត្រខ្មែរ។»
កាលពីថ្ងៃទី១១ ខែកក្កដា មន្ត្រីជាន់ខ្ពស់គណបក្សសង្គ្រោះជាតិ ជាច្រើននាក់បានចូលរួមដង្ហែព្រះបរមអដ្ឋិព្រះករុណា ព្រះបាទសម្ដេចព្រះបរមរតនកោដ្ឋ។ នៅក្នុងពិធីនោះ អ្នកនយោបាយគណបក្សទាំងពីរបានសួរសុខទុក្ខ និងរាក់ទាក់គ្នាធម្មតា ប៉ុន្តែមិនមានប្រភពណាទម្លាយឲ្យដឹងនោះទេ ថាបក្សទាំងពីរព្រមព្រៀងគ្នាចរចាដោះស្រាយបញ្ហានយោបាយនៅថ្ងៃណា មួយនៅឡើយ។
គណបក្សជាប់ឆ្នោតទាំងពីរចរចាគ្នាជាច្រើនដងច្រើនសាមកហើយ ដើម្បីស្វែងរកដំណោះស្រាយនយោបាយ ប៉ុន្តែចំណុចដែលខ្វែងគំនិតគ្នានោះ នៅត្រង់វិធីនៃការជ្រើសរើសសមាសភាពគណៈកម្មាធិការជាតិរៀបចំការបោះ ឆ្នោត។ បក្សកាន់អំណាចដែលមានអំណាចក្តោបស្ថាប័នជាតិស្ទើរតែទាំងអស់ហើយ នោះ ក៏ចង់បន្តក្តោបស្ថាប័នរៀបចំការបោះឆ្នោតទៀត តាមរយៈរូបមន្ត ៥០ភាគរយបូក១ និងរូបមន្តពុះច្រៀកស្ថាប័នរៀបចំការបោះឆ្នោតចែកគ្នាជាមួយបក្ស ប្រឆាំង៕
No comments:
Post a Comment