បក្សទាំងពីរ បញ្ជូន សេចក្ដីព្រាង វិសោធនកម្ម រដ្ឋធម្មនុញ្ញ ទៅលោក ហេង សំរិន
RFA | ៧ សីហា ២០១៤
លោក ហេង សំរិន ប្រធានរដ្ឋសភា
និងជាប្រធាន កិត្តិយស នៃគណបក្ស ប្រជាជនកម្ពុជា
ក្នុងកិច្ចពិភាក្សា ស្ដីពី សេចក្ដីព្រាងច្បាប់ សាងសង់ ទំនប់
វារីអគ្គិសនី សេសានក្រោម២ នារដ្ឋសភា កាលពីថ្ងៃទី១៥ ខែកុម្ភៈ
ឆ្នាំ២០១៣។ Photo: RFA
តំណាងរាស្ត្រគ ណបក្ស ប្រជាជនកម្ពុជា និងគណបក្ស សង្គ្រោះជាតិ បញ្ជូនសេចក្ដីព្រាង ស្ដីពី ការធ្វើវិសោធនកម្ម រដ្ឋធម្មនុញ្ញ ទៅ លោក ហេង សំរិន ប្រធាន រដ្ឋសភាហើយ នៅថ្ងៃ ទី៧ សីហា ដើម្បី ឲ្យប្រធាន រដ្ឋសភា ពិនិត្យ មុន នឹងដាក់ ឲ្យសភា អនុម័ត នៅពេលខាងមុខ។ ការបញ្ជូន សេចក្ដីព្រាង វិសោធនកម្ម រដ្ឋធម្មនុញ្ញ ទៅប្រធាន សភានេះ នៅមុនពេល សភា នឹងបើក សម័យប្រជុំ នៅថ្ងៃសុក្រ ទី៨ សីហា។
មន្ត្រីជាន់ខ្ពស់ គណបក្ស សង្គ្រោះជាតិ ឲ្យដឹង នៅថ្ងៃ ទី៧ សីហា ថា, សេចក្ដីព្រាង រដ្ឋធម្មនុញ្ញ មាត្រា៧៦ និងបង្កើត ជំពូក ទី១៥ថ្មី ស្ដីពី ការរៀបចំ ស្ថាប័ន បោះឆ្នោត នៅពេល ឆាប់ៗ បន្ទាប់ ពីព្រះមហាក្សត្រ ត្រួតពិនិត្យរួច។
លោក អេង ឆៃអ៊ាង មានប្រសាសន៍ ថា, តំណាងរាស្ត្រ ចំនួន ៨៥រូប ក្នុងនោះតំណាងរាស្ត្រគណបក្សប្រជាជនកម្ពុជា ៤៣រូប និងតំណាងរាស្ត្រគណបក្សសង្គ្រោះជាតិ ចំនួន ៤២រូប បានចុះហត្ថលេខារួមគ្នាលើសេចក្ដីព្រាងរដ្ឋធម្មនុញ្ញ និងបង្កើតជំពូកទី១៥ថ្មី ស្ដីពីការកែទម្រង់ស្ថាប័នបោះឆ្នោតថ្មី បញ្ជូនទៅប្រធានរដ្ឋសភានៅព្រឹកថ្ងៃទី៧ សីហា នេះ ដើម្បីឲ្យប្រធានសភាផ្ញើថ្វាយទៅព្រះមហាក្សត្រ និងក្រុមប្រឹក្សាធម្មនុញ្ញពិនិត្យ មុននឹងបញ្ជូនមកឲ្យសភាអនុម័តសេចក្ដីព្រាងច្បាប់នោះវិញ។
វិសោធនកម្មរដ្ឋធម្មនុញ្ញ ដែលក្រុមការងារគណបក្សទាំងពីរបានឯកភាពគ្នា កាលពីថ្ងៃទី១ សីហា នោះ មានបីមាត្រា ក្នុងនោះមានមាត្រា៧៦ថ្មី មាត្រា១៥០ថ្មី និងមាត្រា១៥១ថ្មី។ ខ្លឹមសារនៅក្នុងមាត្រាទាំងនេះ បានកំណត់គណៈកម្មាធិការជាតិរៀបចំការបោះឆ្នោត គឺជាអង្គការដែលមានសមត្ថកិច្ចរៀបចំ ចាត់ចែង និងគ្រប់គ្រងការបោះឆ្នោតជ្រើសតាំងសមាជិកព្រឹទ្ធសភា និងការបោះឆ្នោតជ្រើសតាំងតំណាងរាស្ត្រ និងការបោះឆ្នោតផ្សេងៗទៀត តាមការកំណត់នៃច្បាប់។
គណៈកម្មាធិការជាតិរៀបចំការបោះឆ្នោត មានសមាសភាព ៩រូប ដែលមានអាណត្តិ៥ឆ្នាំ។ សមាសភាព ៤រូប ជ្រើសរើសដោយគណបក្សដឹកនាំរដ្ឋាភិបាល ៤រូបជ្រើសដោយគណបក្សសង្គ្រោះជាតិ និង ១រូបទៀត ជ្រើសរើសដោយការព្រមព្រៀងនៃគណបក្សទាំងពីរ និងករណីផ្សេងៗទៀត។ ក៏ប៉ុន្តែ អ្វីដែលកត់សម្គាល់នោះ គឺគណបក្សសង្គ្រោះជាតិ ចង់ឲ្យចែងនៅក្នុងរដ្ឋធម្មនុញ្ញអំពីសមាជិកជាន់ខ្ពស់ គ.ជ.ប. នេះ មានអភ័យឯកសិទ្ធិដូចនឹងតំណាងរាស្ត្រដែរ តែខាងគណបក្សប្រជាជនកម្ពុជា មិនព្រម។
ការផ្ញើសេចក្ដីព្រាងរដ្ឋធម្មនុញ្ញទៅប្រធានសភានេះ នៅស្របពេលដែលសភានឹងបើកកិច្ចប្រជុំនៅថ្ងៃទី៨ សីហា។ សេចក្ដីប្រកាសព័ត៌មានរបស់អគ្គលេខាធិការដ្ឋានរដ្ឋសភា ឲ្យដឹងថា សភានឹងបន្តសម័យប្រជុំវិសាមញ្ញនីតិកាលទី៥ នៅថ្ងៃទី៨ សីហា វេលាម៉ោង ៨ព្រឹក ដើម្បីពិនិត្យ និងអនុម័តសេចក្ដីស្នើវិសោធនកម្មប្រការ៦ថ្មី នៃបទបញ្ជាផ្ទៃក្នុងនៃរដ្ឋសភា។
មន្ត្រីនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា គណបក្សសង្គ្រោះជាតិ កំពុងតែពិភាក្សាអំពីរបៀបវារៈប្រជុំសភានេះឲ្យបានច្បាស់លាស់សិន មុននឹងតំណាងរាស្ត្រគណបក្សសង្គ្រោះជាតិ ចូលប្រជុំ។
ប្រធានគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា លោកបណ្ឌិត ហង្ស ពុទ្ធា មានប្រសាសន៍ថា ប្រជាពលរដ្ឋនឹងរង់ចាំមើលថា តើគណបក្សប្រឆាំងនឹងអាចកែរដ្ឋាភិបាលបានអ្វីខ្លះ បន្ទាប់ពីបានចូលប្រជុំសភាតទៅ។ ចំពោះការធ្វើវិសោធនកម្មរដ្ឋធម្មនុញ្ញមាត្រា៧៦ថ្មី និងការធ្វើកំណែទម្រង់ស្ថាប័នរៀបចំការបោះឆ្នោតថ្មីនេះ គ្រាន់តែជារូបភាពនយោបាយប៉ុណ្ណោះ មិនធានាថា ការបោះឆ្នោតពេលខាងមុខត្រឹមត្រូវ និងយុត្តិធម៌នោះទេ។
តំណាងរាស្ត្រគណបក្សសង្គ្រោះជាតិ បានចូលទៅធ្វើសច្ចាប្រណិធាននៅព្រះបរមរាជវាំង កាលពីថ្ងៃទី៥ សីហា ដើម្បីបញ្ចប់ជម្លោះនយោបាយជិត ១ឆ្នាំកន្លងមកនេះ។ យ៉ាងនេះក្ដី តំណាងរាស្ត្រគណបក្សសង្គ្រោះជាតិ ៨រូបមានទាំង លោក កឹម សុខា និងសកម្មជនមួយរូបទៀត កំពុងជាប់បណ្ដឹងនៅតុលាការនៅឡើយ ទាក់ទងនឹងការដឹកនាំធ្វើបាតុកម្មកាលពីថ្ងៃទី១៥ កក្កដា នៅទីលានប្រជាធិបតេយ្យ។ ក្រៅពីនេះទៀត សកម្មជនគណបក្សសង្គ្រោះជាតិ ចំនួន ៣រូបទៀត ដែលជាយុវជន កំពុងជាប់ឃុំនៅពន្ធនាគារព្រៃស នៅឡើយ៕
No comments:
Post a Comment