សមាជិក ក្រុមប្រឹក្សា រាជធានី មកពីបក្ស ប្រឆាំង ដើរចេញ ពីកិច្ចប្រជុំ សាមញ្ញ លើកទី៤
RFA / វិទ្យុ អាស៊ី សេរី | ១១ កញ្ញា ២០១៤
អនុប្រធាន សមាគម ជាតិ ក្រុមប្រឹក្សា រាជធានីខេត្ត
និងជាសមាជិក ក្រុមប្រឹក្សា រាជធានី ភ្នំពេញ មកពីគណបក្ស សង្គ្រោះជាតិ
លោក ម៉ន ផល្លា ក្នុងកិច្ចពិភាក្សា តុមូល របស់ វិទ្យុ អាស៊ី សេរី
កាលពីយប់ថ្ងៃ ទី១០ ខែឧសភា ឆ្នាំ២០១៤។ Photo: RFA
វិធី តែមួយគត់ របស់ គណបក្សប្រឆាំង ដើម្បី សម្ដែងភាព មិនពេញចិត្ត នៅពេល ដែលខ្លួន ទាមទារអ្វីមួយ មិនបាននោះ គឺ ដើរចេញ ពីអង្គប្រជុំ ដោយភាគច្រើន គេ ឃើញ នៅក្នុងកិច្ចប្រជុំ សភា។ ប៉ុន្តែ ថ្នាក់ដឹកនាំ ក្រោមជាតិ របស់ គណបក្ស សង្គ្រោះជាតិ វិញ ក៏បានជ្រើស វិធីនេះ តាមមេដឹកនាំ របស់ ខ្លួនដែរ ដោយនាំគ្នា ដើរចេញ ពីកិច្ចប្រជុំ សាមញ្ញ លើកទីបួន របស់ ក្រុមប្រឹក្សា រាជធានីភ្នំពេញ នៅព្រឹកថ្ងៃ ទី១១ កញ្ញា នៅសាលា រាជធានីភ្នំពេញ លើការបង្កើត គណៈកម្មការ លទ្ធកម្ម របស់ ក្រុមប្រឹក្សា រាជធានីភ្នំពេញ។
បន្ទាប់ពីដើរចេញ ពីកិច្ចប្រជុំ នោះភ្លាម, សមាជិក ក្រុមប្រឹក្សា រាជធានីភ្នំពេញ មកពីគណបក្ស សង្គ្រោះជាតិ បានធ្វើសន្និសីទ សារព័ត៌មានភ្លាម ដោយចោទប្រកាន់ មន្ត្រីថ្នាក់ក្រោម ជាតិ មកពីគណបក្ស ប្រជាជនកម្ពុជា ថា, ធ្វើកិច្ចការ លម្អៀង ទៅរក បក្ខពួក របស់ខ្លួន និងបដិសេធ ការចូលរួម របស់មន្ត្រី គណបក្ស សង្គ្រោះជាតិ នៅក្នុងកិច្ចការ រដ្ឋបាល សាធារណៈ។
តំណាង សមាជិក ក្រុមប្រឹក្សា រាជធានីភ្នំពេញ មកពីគណបក្ស សង្គ្រោះជាតិ លោក ម៉ន ផល្លា ដែលដឹកនាំ សមាជិក របស់ខ្លួន ប្រាំរូប ផ្សេងទៀត ដើរចេញ ពីអង្គប្រជុំនោះ មានប្រសាសន៍ ថា, លោក ចង់ឲ្យគណៈកម្មការ លទ្ធកម្មនេះ មានសមាសភាព មួយរូប មកពីគណបក្ស សង្គ្រោះជាតិ និងចំនួន ពីររូបទៀត មកពីគណបក្ស ប្រជាជនកម្ពុជា ដើម្បី ចូលរួម ធ្វើកិច្ចការនេះ បម្រើផលប្រយោជន៍ ដល់សាធារណជន។ ប៉ុន្តែ ការស្នើសុំនេះ ត្រូវ បានគេ បដិសេធ ដោយសមាជិក ក្រុមប្រឹក្សា មកពីគណបក្ស ប្រជាជន កម្ពុជា។
វិទ្យុ អាស៊ី សេរី បានទាក់ទង លោក ម៉ប់ សារិន ប្រធាន ក្រុមប្រឹក្សា រាជធានីភ្នំពេញ តែ ទូរស័ព្ទ មិនអាច ទាក់ទងបាន នៅថ្ងៃ ទី១១ កញ្ញា។
ប៉ុន្តែ មន្ត្រី អ្នកនាំពាក្យ សាលារាជធានី ភ្នំពេញ លោក ឡុង ឌីម៉ង់ បានឲ្យដឹង ថា, ការបកស្រាយ របស់ សមាជិក ក្រុមប្រឹក្សា មកពីគណបក្ស សង្គ្រោះជាតិ ថា មិនមាន មូលដ្ឋាន និងមិនត្រឹមត្រូវ។ លោក បញ្ជាក់ថា យោងតាមច្បាប់ នៃការបង្កើត គណៈកម្មការនេះ គឺ មិនមាន តំណាង មកពីគណបក្ស សង្គ្រោះជាតិទេ។ ក្នុងនោះ គណៈកម្មការនេះ ត្រូវ មានសមាសភាព បីរូប ច្រើនបំផុត៖ ទីមួយ, មកពីប្រធាន មន្ទីរសេដ្ឋកិច្ច និងហិរញ្ញវត្ថុ; ទីពីរ, មកពីក្រុមប្រឹក្សា រាជធានី; និងទីបី, មកពីអភិបាល រាជធានី។
ទោះជាយ៉ាងណា គោលបំណងនៃការបង្កើតគណៈកម្មការលទ្ធកម្មនេះ គឺជាការខិតខំមួយរបស់រដ្ឋាភិបាល ក្នុងការកែទម្រង់ហិរញ្ញវត្ថុសាធារណៈ និងដើម្បីឲ្យមានតម្លាភាព ក្នុងការដេញថ្លៃសាធារណៈ។ អង្គការសង្គមស៊ីវិល និងម្ចាស់ជំនួយអភិវឌ្ឍន៍មួយចំនួន យល់ឃើញថា ការបង្កើតគណៈកម្មការដោយមានការចូលរួមពីគ្រប់ភាគីទាំងអស់ គឺជាយន្តការមួយប្រកបដោយប្រសិទ្ធភាពបន្ថែមទៀត ដើម្បីត្រួតពិនិត្យប្រសិទ្ធភាពនៃការដេញថ្លៃគម្រោង និងការអនុវត្តគម្រោងជាសាធារណៈ។
នាយកអង្គការតម្លាភាព លោក ព្រាប កុល មានប្រសាសន៍ថា អំពើពុករលួយនៅក្នុងគម្រោង ដែលអនុវត្តនៅប្រទេសកម្ពុជា មានរូបភាពជាច្រើនដែលត្រូវគេលាក់បាំង។ អ្នកប្រព្រឹត្តិអំពើពុករលួយ មានល្បិចកលខ្ពស់បំផុត ឆ្លៀតកេងចំណេញពីនីតិវិធីនីមួយៗដូចជា ការធ្វើលទ្ធកម្ម គាត់មានគ្នីគ្នា ឬមានក្រុមហ៊ុនដែលជាមិត្តភ័ក្ដិដាក់ដេញថ្លៃ ជាដើម។ លោកបញ្ជាក់ថា ប្រសិនបើយើងពិនិត្យមើលនីតិវិធីទាំងនេះនឹងភ្នែក គឺមិនខុសអីទេ ប៉ុន្តែនៅពីក្រោយនៃការអនុវត្ត គឺមានល្បិចផ្សេងៗដែលនាំឲ្យមានការកេងប្រយោជន៍ ដើម្បីចំណេញថវិកាផ្ទាល់ខ្លួន។
បន្ថែមលើនេះ មន្ត្រីថ្នាក់ខ្ពស់ផ្នែកកិច្ចការសង្គមរបស់ធនាគារអភិវឌ្ឍន៍អាស៊ី (ADB) ប្រចាំកម្ពុជា លោក ម៉ារ សុភា បានអះអាងថា ធនាគារអភិវឌ្ឍន៍អាស៊ី ធ្លាប់ដាក់ទណ្ឌកម្មផ្សេងៗដល់អ្នកអនុវត្តន៍គម្រោងមកពីជួរ រដ្ឋាភិបាលកម្ពុជា និងអ្នកជំនាញការដែលជួយក្នុងការអនុវត្តគម្រោង ជាដើម៕
No comments:
Post a Comment