លោក ហ៊ុន សែន ប្រកាស គោលនយោបាយ ជាតិ គាំពារ និងអភិវឌ្ឍ កុមារ
RFA / វិទ្យុ អាស៊ី សេរី | ១ កញ្ញា ២០១៤
លោកនាយករដ្ឋមន្ត្រី ហ៊ុន សែន ថ្លែងក្នុងពិធី សម្ពោធស្ពាន ស្ទឹងមានជ័យ កាលពីថ្ងៃ ទី៣១ ខែកក្កដា ឆ្នាំ២០១៤។ RFA/Uon Chhin
លោកនាយករដ្ឋមន្ត្រី ហ៊ុន សែន ប្រកាស ផ្សព្វផ្សាយ គោលនយោបាយ ជាតិ និងផែនការ ស្ដីពី ការគាំពារ និងអភិវឌ្ឍ កុមារតូច ឆ្នាំ២០១៤-២០១៨ នៅថ្ងៃ ទី១ កញ្ញា នៅវិទ្យាស្ថាន ជាតិ អប់រំ ក្បែរវិមាន ឯករាជ្យ រាជធានី ភ្នំពេញ។
លោកនាយករដ្ឋមន្ត្រី បានថ្លែងថា, រដ្ឋាភិបាលកម្ពុជា ចូលរួម កិច្ចគាំពារ និងអភិវឌ្ឍ កុមារតូច និងលើកតម្កើង សិទ្ធិកុមារ ស្របតាម រដ្ឋធម្មនុញ្ញ ក្នុងច្បាប់ ស្ដីពី ការអប់រំ និងក្នុងអនុសញ្ញា ស្ដីពី សិទ្ធិកុមារ និងកំណត់ ត្រង់មុំ ទី៤ នៃយុទ្ធសាស្ត្រ ចតុកោណ របស់ រាជរដ្ឋាភិបាល ដោយផ្ដោតលើការបន្តលើកកម្ពស់សុខុមាលភាព សិទ្ធិរស់រានមានជីវិត ការអភិវឌ្ឍ ការការពារ និងការចូលរួមរបស់កុមារ ហើយគាំទ្រការបង្កើតភូមិកុមារ អេស អូ អេស (SOS) ភូមិកុមារអរុណរះ និងមជ្ឈមណ្ឌលកុមារនានាគ្រប់រាជធានីខេត្ត ព្រមទាំងដាក់ឲ្យអនុវត្តយុទ្ធសាស្ត្រជាតិ ស្ដីពីសន្តិសុខស្បៀង និងអាហារូបត្ថម្ភ ២០១៤-២០១៨។
លោក ហ៊ុន សែន បន្តទៀតថា រដ្ឋាភិបាលយកចិត្តទុកដាក់កន្លងមក ដោយផ្ដល់អាហារូបត្ថម្ភ ការបំបៅកូនដោយទឹកដោះម្ដាយ ផ្ដល់វីតាមីនអា(Vitamin A) បន្ថែមដល់កុមារ ចាប់ពីអាយុ ៦ខែ ដល់ ៥៩ខែ ការថែទាំសុខភាព ដែលបានកាត់បន្ថយការស្លាប់របស់មាតា និងទារក ព្រមទាំងពង្រីកការអប់រំកុមារ ការការពារ កាត់បន្ថយ ជំងឺទារក និងកុមារ ជំងឺរាករូស រលាកផ្លូវដង្ហើម ជំងឺស្លេកស្លាំង ខ្វះជាតិដែក កង្វះជាតិអ៊ីយ៉ូដ ជីវជាតិសេ អាហារូបត្ថម្ភ ការពារមេរោគហ៊ីវ ជំងឺអេដស៍ជាដើម ក្នុងនោះជំងឺគ្រុនស្វិតដៃជើង ត្រូវបានលុបបំបាត់នៅត្រឹមឆ្នាំ១៩៩៨៖ «ខ្លួនខ្ញុំផ្ទាល់ក៏បានប្ដេជ្ញា ចិត្ត កិច្ចខិតខំប្រឹងប្រែងបន្ថែមទៀត ក្នុងបុព្វហេតុកុមារគ្រប់ស្រទាបទាំងអស់ ដោយក្ដីស្រឡាញ់ ដ៏ជ្រាលជ្រៅមិនអាចវាស់បាន ដូចដែរខ្ញុំនិងភរិយា ព្រមទាំងក្រុមគ្រួសារ តែងបានរួមចំណែកកន្លងមកនេះ។»
ទោះជាយ៉ាងក៏ដោយយោងតាមរបាយការណ៍របស់ អង្គការយូនីសេហ្វ (UNICEF) ស្ដីពីការការពារកុមារ (Child Protection) កុមារស្ថិតក្នុងគ្រួសារក្រីក្រ នៅតែប្រឈមនឹងភាពងាយរងគ្រោះខ្ពស់ ប្រចាំថ្ងៃ ដល់សុខភាព ការអប់រំ សុវត្ថិភាព និងការអភិវឌ្ឍដទៃទៀត ។
មិនតែប៉ុណ្ណោះស្ថានភាពប្រចាំថ្ងៃរបស់កុមារ ត្រូវបានប៉ះពាល់ទៅនឹងការរំលោភបំពាន ដោយហិង្សា ការកេងប្រវ័ញ្ច និងមិនសូវយកចិត្តទុកដាក់។
បញ្ហាទាំងនេះជាញឹកញាប់តែងកើតឡើងធ្ងន់ធ្ងរដោយភាពមិនស្នើគ្នា នៃយេនឌ័រ ជាពិសេសគម្លាតអ្នកទីក្រុង និងប្រជាជនក្រីក្រតាមជនបទ និងភាពអវិជ្ជមាន ពីការរើសអើងដល់ជនជាតិភាគតិច និងជនពិការ៕
No comments:
Post a Comment