ប៉ូលិស អន្ដរជាតិ ចេញប្រតិបត្ដិការ បង្រ្កាប បណ្ដាញ ឧក្រិដ្ឋជន នៅអាស៊ាន
ABC Australia | ២៤ កញ្ញា ២០១៤
ប៉ូលិសអន្ដរជាតិចេញប្រតិបត្ដិការបង្រ្កាបបណ្ដាញឧក្រិដ្ឋជននៅអាស៊ាន (Credit: ABC Licensed)
ប៉ូលិស អន្ដរជាតិ និយាយ ថា, បណ្ដាកងកម្លាំង សន្ដិសុខ និងទីភ្នាក់ងារ ការពារព្រំដែន នៅក្នុងប្រទេស សមាជិក អាស៊ាន ដូចជា កម្ពុជា, រួមទាំង ប្រទេសចិន, និងឥណ្ឌា ផងនោះ, បានរឹបអូស យកផលិតផល ក្លែងក្លាយ មានតម្លៃ ជិត៥០លាន ដុល្លារ។ ក្នុងនោះ រួមមាន បារី, សុរា, គ្រឿងតុបតែងខ្លួន, សម្លៀកបំពាក់ និងឧបករណ៍ អេឡិចត្រូនិក ជាច្រើនទៀត។
អាជ្ញាធរបាន ឲ្យដឹងថា នៅក្នុងករណីមួយ ក្រុមឧក្រិដ្ឋជនមានដល់ទៅរោងចក្រទៀតផង ដើម្បីផលិតគ្រឿងតែងខ្លួនក្លែងក្លាយនៅប្រទេសចិន ដែលត្រូវអាជ្ញាធរវាយបំបែក។ នៅក្នុងប្រទេសចិនតែមួយ មានមនុស្ស៥៨៩នាក់ ត្រូវអាជ្ញាធរចាប់ខ្លួន ហើយរឹបអូសបានផលិតផលខុសច្បាប់តម្លៃ៣៧លានដុល្លារ។
ចំណែក អាជ្ញាធរនៅក្រុងហុងកុងវិញបានរកឃើញប្រអប់ជាច្រើននៅក្នុងរថ យន្ដដឹកកុងទីន័រ ដោយនាំឲ្យអាជ្ញាធររឹបអូសបានគ្រឿងអេឡិចត្រូនិកគេចពន្ធជាង៦០០ គ្រឿង។
នៅក្នុងប្រទេសវៀតណាមឯណោះវិញ ប៉ូលិសអន្ដរជាតិឲ្យដឹងថា មានទំនិញក្លែងក្លាយជាច្រើនដែលអាជ្ញាធររឹបអូសបានពីអ្នកលក់តាម ផ្លូវ និងក្នុងហាងទំនិញ។
Interpol បានឲ្យដឹងផងដែរថា នេះមិនមែនជាប្រតិបត្ដិការអន្ដរជាតិដ៏ធំដំបូងគេទេ។ កាលពីខែកុម្ភៈកន្លងទៅនេះ ប៉ូលិសអន្ដរជាតិនៅអឺរ៉ុបបានប្រកាសឲ្យដឹងថា នៅក្នុងប្រតិបត្ដិការផ្ដោតគោលដៅបោសសម្អាតផលិតផលក្លែងក្លាយនៅ ៣៣ប្រទេសនៅទ្វីបអឺរ៉ុប, អាម៉េរិកខាងជើង និងអាម៉េរិកខាងត្បូង រួមទាំងអាហ្រ្វិក និងអាស៊ីផងនោះ អាជ្ញាធររឹបអូសបានស្បៀងអាហារ និងភេសជ្ជៈក្លែងក្លាយជាង១ពាន់តោន៕
No comments:
Post a Comment