ពលរដ្ឋ នៅកំពង់ធំ ជួបបញ្ហា លំបាក, គ្មាន លុយសងបំណុល ធនាគារ បន្ទាប់ទឹកជំនន់
RFA / វិទ្យុ អាស៊ី សេរី | ៩ កញ្ញា ២០១៤
វាលស្រែបន្ទាប់ពីទឹកជំនន់ស្រកនៅខេត្តកំពង់ធំ។ រូបថតថ្ងៃទី៣ ខែកញ្ញា ឆ្នាំ២០១៤, RFA/Tin Zakariya
ដំណាំ កសិកម្ម, ស្រូវ គឺ ជាមុខរបរ ដ៏សំខាន់ សម្រាប់ ប្រជាពលរដ្ឋ រស់នៅ តំបន់ ដាច់ស្រយាល មួយចំនួន នៅខេត្ត កំពង់ធំ។ ក៏ប៉ុន្តែ ដោយសារ តែ ទឹកជំនន់ ឡើងជន់ លិចលឿនពេក កាលពីខែ សីហា នោះ បានធ្វើ ឲ្យប្រជាពលរដ្ឋ កំពុងតែ ជួបបញ្ហាលំបាក ជំពាក់បំណុល ធនាគារ និងគ្មាន លុយសង។
អ្នកខ្លះ ធ្វើចំណាកស្រុក, អ្នកខ្លះទៀត ចេញទៅ ស៊ីឈ្នួលគេ ដើម្បី រកលុយ សងបង្វិល ទៅធនាគារ ប្រចាំខែ។
ផ្ទៃដីស្រែ រាប់រយ ហិកតារ នៅក្នុងស្រុក កំពង់ស្វាយ និងស្រុក ស្ទឹងសែន នៃខេត្ត កំពង់ធំ ឃើញតែ ស្មៅ ដុះពណ៌ខៀវខ្ចី នៅពេលទឹក សម្រកវិញ, គឺ គ្មាន សល់ដើមស្រូវ នោះឡើយ។
ដីស្រែ មានទំហំធំ ល្វឹងល្វើយ មើលដាច់កន្ទុយភ្នែក ដែលក្ដីសង្ឃឹមតែមួយគត់របស់ប្រជាពលរដ្ឋរស់នៅទីនោះក្នុងការធ្វើ ស្រូវប្រាំង និងស្រែប្រដេញទឹក ក៏ប៉ុន្តែផ្ទៃស្រែទាំងនេះ ប្រជាពលរដ្ឋគ្មានបានប្រមូលផលដូចឆ្នាំមុនៗនោះឡើយ ដោយសារទឹកជំនន់ជន់លិចលឿនពេកកាលពីខែសីហា កន្លងទៅ។
ស្ត្រីឈ្មោះ ជា សឿន នៅភូមិព្រែកស្បូវ ឃុំអូរគន្ធរ អង្គុយនៅលើគ្រែខាងមុខផ្ទះ សម្លឹងមើលទៅដីស្រែក្រោយពីការលិចនោះទាំងទឹកមុខស្រងូតស្រងាត់ថា ស្រូវប្រាំងរបស់អ្នកស្រីជិតទុំហើយ តែមិនអាចច្រូតទាន់ ដោយសារតែទឹកជំនន់ឡើងជន់លិចលឿនពេក។ អ្នកស្រីបញ្ជាក់ថា ទឹកឡើងជន់លិចក្នុងឆ្នាំនេះ ឡើងលឿនរយៈពេលតែបីថ្ងៃទេ ជន់លិចស្រូវរបស់ពួកគាត់ទាំងស្រុង។ អ្នកស្រីអះអាងថា ក្ដីសង្ឃឹមរបស់គាត់ក្នុងការសងបំណុលធនាគារនោះ ពឹងអាស្រ័យលើទិន្នផលស្រូវ តែទឹកជន់លិចអស់ហើយនោះ គ្រួសារគាត់គ្មានអ្វីសងទៅធនាគារនោះឡើយ។
ផ្ទៃដីអ្នកភូមិធ្វើស្រែប្រាំងនោះ មានគ្រួសារខ្លះ ១ហិកតារ រហូតដល់ ១០ហិកតារ។ អ្នកធ្វើស្រែប្រាំងច្រើន គឺពួកគាត់ជួលដីគេបន្ថែម និងបានទុនមកពីការខ្ចីបុលពីធនាគារធ្វើដើមទុន។ អ្នកភូមិឲ្យដឹងថា ពួកគាត់ខ្ចីលុយធនាគារ គ្រួសារខ្លះខ្ចីពី ១ពាន់ ដល់ជិត ១ម៉ឺនដុល្លារ ដើម្បីធ្វើដើមទុន និងការចំណាយហូបចុកប្រចាំថ្ងៃ ទិញថ្លៃជី និងសម្រាប់ទិញទឹកដាក់ស្រែ ជាដើម។ តម្លៃជីក្នុងមួយបាវ ជាង ១ម៉ឺនរៀល និងទិញទឹកគេបូមដាក់ស្រែក្នុង១ហិកតារជាង ១០០ដុល្លារទៀត។
នៅបន្ទាប់ពីដំណាំស្រូវលិចលង់ និងខូចខាតស្ទើរតែទាំងស្រុងហើយនោះ ប្រជាពលរដ្ឋទាំងនោះបានត្អូញត្អែរប្រហាក់ប្រហែលគ្នា និងព្រួយបារម្ភគ្មានលុយសងរំលោះទៅធនាគារវិញ។ នៅតាមភូមិមួយចំនួន ពួកគាត់បានឲ្យដឹងថា ស្វាមីរបស់ពួកគាត់ទៅស៊ីឈ្នួលគេជម្រះស្មៅកៅស៊ូ និងទៅធ្វើការនៅប្រទេសថៃ ខ្លះទៀតបញ្ជូនកូនៗមកធ្វើការនៅភ្នំពេញ មានធ្វើការរោងចក្រ និងកម្មករសំណង់ ជាដើម ដើម្បីរកលុយសងធនាគារវិញ។
ក្នុងចំណោមប្រជាពលរដ្ឋទាំងនោះ មានអ្នកខ្លះមានលទ្ធភាពសងប្រចាំខែទាំងការទាំងដើម ឬសងរំលោះ។ អ្នកខ្លះទៀតមានលទ្ធភាពសងបានត្រឹមតែការប្រាក់ប៉ុណ្ណោះ។ ទន្ទឹមនឹងនេះ ប្រជាពលរដ្ឋមួយចំនួន ក៏ព្រួយបារម្ភខ្លាចធនាគាររឹបអូសយកផ្ទះសម្បែង និងដីធ្លី ដែលពួកគាត់ដាក់បញ្ចាំនោះ។
ស្ត្រីឈ្មោះ ស៊ឹម ហ័ន ដែលកំពុងហាលស្រូវបន្តិចបន្តួចដែលច្រូតបានខ្លះនៅមុនទឹកលិច ទាំងដៃរបស់ពួកគាត់កំពុងកាយស្រូវហាលបណ្ដើរ បានរៀបរាប់អំពីក្ដីអស់សង្ឃឹមរបស់ពួកគាត់បណ្ដើរថា គាត់បានចំណាយលុយអស់ជិត ៦ពាន់ដុល្លារ ចំណាយទៅលើការទិញហូបចុកប្រចាំថ្ងៃ និងធ្វើដើមទុនធ្វើស្រូវប្រាំងប្រមាណជា ១០ហិកតារ។ អ្នកស្រីសម្ដែងការសោកស្ដាយនៅពេលស្រូវជិតទុំ តែច្រូតមិនទាន់ទឹកជន់លិចនោះ។
មេឃុំកំពង់គោ លោក សន ប៊ុនស មានប្រសាសន៍ថា ប្រជាពលរដ្ឋនៅក្នុងឃុំរបស់លោក ខ្លះបានខ្ចីបុលពីធនាគារនោះ ចំពោះអ្នកដែលមានលទ្ធភាពសងទៅវិញទេ។ រីឯអ្នកគ្មានលទ្ធភាពសង ក៏មិនបានខ្ចីធនាគារវិញដែរ។ លោកបញ្ជាក់ថា ទឹកឡើងលិចស្រូវនេះ ប្រជាពលរដ្ឋមួយចំនួនបានច្រូតទាន់ ខ្លះទៀតមិនទាន់។ យ៉ាងនេះក្ដី លោកមេឃុំទទួលស្គាល់ថា ប្រជាពលរដ្ឋក្នុងឃុំរបស់លោក ប្រឈមនឹងបញ្ហាលំបាក ហើយលោកបានទាក់ទងអង្គការហូម ដើម្បីផ្ដល់ឥណទានខ្លះឲ្យប្រជាពលរដ្ឋខ្ចីបង្កើតមុខរបរជាលក្ខណៈ គ្រួសារ។
អភិបាលខេត្តកំពង់ធំ លោក អ៊ុត សំអន មានប្រសាសន៍ថា ខេត្តបានត្រៀមស្រូវពូជចែកប្រជាពលរដ្ឋនៅពេលខាងមុខ នៅពេលទឹកសម្រក ដើម្បីឲ្យប្រជាពលរដ្ឋមានលទ្ធភាពបង្កបង្កើនផលឡើងវិញ។ ទាក់ទងនឹងបញ្ហាប្រជាពលរដ្ឋជំពាក់បំណុលធនាគារវិញ លោក អ៊ុត សំអន អះអាងថា កាលពីឆ្នាំ២០១១ មានបញ្ហាទឹកជំនន់ស្រដៀងគ្នានេះដែរ អាជ្ញាធរខេត្តបានសុំឲ្យម្ចាស់មីក្រូហិរញ្ញវត្ថុពន្យារពេលការសង នេះ ហើយនៅឆ្នាំនេះ ខាងខេត្តនឹងពិនិត្យមើលករណីនេះទៀត។
ខេត្តកំពង់ធំ ស្ថិតនៅកណ្ដាលប្រទេស និងសម្បូរទៅដោយធនធានធម្មជាតិ ដូចជា ព្រៃឈើ មច្ឆជាតិ ជាដើម។ ខេត្តនេះមានផ្ទៃដីធំទី២នៃប្រទេសកម្ពុជា មានចម្ងាយ ១៦៨គីឡូម៉ែត្រពីទីក្រុងភ្នំពេញ។ ស្រុកដែលទឹកលិចស្រូវនោះ មាននៅស្រុកនៅតាមដងស្ទឹងសែន ដូចជា ស្រុកកំពង់ស្វាយ ស្រុកសណ្ដាន់ និងស្រុកប្រាសាទសំបូរ។ រីឯស្រុកសន្ទុក និងស្រុកបារាយណ៍ ក៏មានជំនន់ទឹកភ្លៀងលិចស្រូវដែរ។ ទឹកជំនន់ ទាំងនេះ ធ្វើឲ្យប៉ះពាល់ស្រែជាង ៥.៥០០ហិកតារ និងខូចខាតទាំងស្រុងជាង ២.៤០០ហិកតារ និងប៉ះពាល់ដល់ប្រជាពលរដ្ឋ ១.៩០០គ្រួសារ៕
No comments:
Post a Comment