ការមិនចុះបញ្ជី អត្តសញ្ញាណ នាំឲ្យពលរដ្ឋ បាត់សិទ្ធិ ទទួលបាន សេវា ជាច្រើន
ក្មេងៗអន្តោប្រវេសន៍ដែលគ្មានអត្តសញ្ញាណ។ថ្វីបើ មានបច្ចេកវិជ្ជា សម័យឌីជីថល [digital?] ទំនើប និងមាន សារគមនាគមន៍ ជឿនលឿនក្តី មានមនុស្ស ច្រើនណាស់ នៅតំបន់ អាស៊ី ប៉ាស៊ីហ្វិក នៅតែ រស់នៅ, ហើយ ស្លាប់ទៅវិញ ដោយគ្មាន បន្សល់អត្តសញ្ញាណ ជាផ្លូវការ អ្វីសោះ។
នៅខែវិច្ឆិកា មន្ត្រី រដ្ឋាភិបាល ជាន់ខ្ពស់ នៅតំបន់នេះ នឹងត្រូវ គេ ស្នើ ឲ្យធ្វើការ តាំងចិត្ត ផ្តល់ការ ទទួលស្គាល់ ក្មេងៗ គ្រប់រូប ដោយមុនដំបូង ចាប់ផ្តើម ការចុះបញ្ជី ជាតិ កំណើត របស់គេ ជាផ្នែកមួយ នៃការជំរុញ ឲ្យមាន ការចុះបញ្ជី ស៊ីវិល និងស្ថិតិ ដ៏សំខាន់ ជាសាកល។
មន្ត្រី រដ្ឋាភិបាលនានា នឹងកោះប្រជុំ នៅទីក្រុង បាងកក នៅក្នុងឆ្នាំនេះ។
ទីប្រឹក្សា ការពារកុមារ ក្នុងតំបន់ នៃអង្គការ Unicef គឺ លោក Stephen Blight និយាយ ថា, នៅក្នុងសករាជនេះ កង្វះ អត្តសញ្ញាណ ផ្លូវច្បាប់ នៅពេល មនុស្សយើង ពេញវ័យ អាចបង្ក ឲ្យមាន ការប្រឈមមុខ ជាច្រើន។
«ក្នុងពិភពលោក សម័យទំនើប, យើង ត្រូវតែ បញ្ជាក់ ពីអាយុ របស់យើង, ហើយ យើង ត្រូវ បញ្ជាក់អត្តសញ្ញាណ របស់យើង ដើម្បី ឲ្យយើង មានឱកាស ធ្វើអ្វីមួយ។»
កត្តាទាំងនេះ រួមមាន ការទទួល បាននូវ ឯកសារ សំខាន់ៗ ដូចជា លិខិតឆ្លងដែន និងអត្តសញ្ញាណបណ្ណ បើកបរ ដើម្បី រកការធ្វើ ក្នុងផ្នែកណាមួយ ជាផ្លូវការ ឬដើម្បី បើកគណនី ធនាគារ។ សព្វថ្ងៃនេះ កង្វះអត្តសញ្ញាណ អាចជាឧបសគ្គ ដល់ឱកាស ទទួលបាន អ្វីមួយ ដែលអាច ជារបស់ធម្មតា ឬសំខាន់ ដូចជា ទូរស័ព្ទដៃ ជាដើម។
លោក Jonathan Marskell ទីប្រឹក្សា ខាងស្ថិតិ សម្រាប់ គណៈកម្មការ សេដ្ឋកិច្ច និងស្ថិតិ របស់ អ.ស.ប. សម្រាប់ តំបន់អាស៊ី និងប៉ាស៊ីហ្វិក UNESCAP និយាយ ថា, ចំពោះ អ្នក ដែលមិនបាន ចុះបញ្ជីនោះ, កូន របស់គេ ក៏ទំនង ជាមិនបាន ចុះបញ្ជីដែរ។
«ដូច្នេះការមិនបានចុះបញ្ជីនេះនឹងបន្តទៅដល់កូនចៅរបស់គេ។ ហើយបញ្ហានេះប៉ះពាល់ ជាពិសេសចំពោះពលរដ្ឋនៃក្រុមណាមួយ ដែលនៅក្រៅសង្គម ជាស្រេចទៅហើយនោះ។»
ការចុះបញ្ជីព័ត៌មានបុគ្គលមិនគ្រាន់តែធ្វើឲ្យបុគ្គលនោះទទួល បានសេវារបស់រដ្ឋាភិបាលប៉ុណ្ណោះទេ តែវាក៏ជួយឲ្យគេមានសិទ្ធិជាមូលដ្ឋានផងដែរ។ ការចុះបញ្ជីក៏ផ្តល់ប្រយោជន៍សម្រាប់ការធ្វើប្រជាសាស្ត្រច្បាស់ លាស់ និងជាប្រយោជន៍សម្រាប់សុខភាពប្រជាពលរដ្ឋផងដែរ។
សូម្បីស្ថិតិជាក់លាក់អំពីអ្នកស្លាប់ក៏មានសារៈសំខាន់ដែរ។ ព័ត៌មានអំពីទីកន្លែងមនុស្សស្លាប់ និងហេតុផលបណ្តាលឲ្យស្លាប់ក៏ជួយយើងក្នុងការប្រយុទ្ធប្រឆាំងនឹង ជំងឺ និងមរណភាពកុមារផងដែរ។ ប៉ុន្តែបើយោងតាមអង្គការសុខភាពពិភពលោក WHO បានឲ្យដឹងថា មនុស្ស៩នាក់ក្នុងចំណោម១០នាក់ នៅតំបន់អាស៊ីប៉ាស៊ីហ្វិក រស់នៅក្នុងប្រទេស ដែលស្ថិតិអំពីមរណភាពមិនអាចគួរឲ្យជឿជាក់បាន។
លោក Nicholas Oakeshott មន្ត្រីផ្នែកការពារប្រចាំតំបន់នៃស្នងការជាន់ខ្ពស់អ.ស.ប.សម្រាប់ ជនភៀសខ្លួន UNHCR និយាយថា មានរដ្ឋាភិបាលច្រើនឡើងៗកំពុងទទួលស្គាល់តម្លៃរបស់ទិន្នន័យ ដែលជាក់លាក់ និងទូលំទូលាយ។
«យើងអាចមើលឃើញថា សន្ទុះនៃការអភិវឌ្ឍនៅទីនេះឲមានឧបសគ្គខ្លះ ដូចការចុះបញ្ជីជាពិសេស ការចុះបញ្ជីជាតិកំណើតរបស់កុមារជនជាតិភាគតិច ឬកុមារដែលរស់នៅក្នុងតំបន់ដែលពិបាកធ្វើដំណើរទៅដល់។ គេកំពុងតែពុះពារ។»
លោក Anis Chowdhury នាយកផ្នែកស្ថិតិនៃអង្គការ UNESCAP កំពុងធ្វើការអំពាវនាវឲ្យបណ្តាញព័ត៌មានក្នុងប្រទេសកំពុង អភិវឌ្ឍន៍នានា ជួយផ្សព្វផ្សាយព័ត៌មាននេះ។
«មានមនុស្សជាច្រើនមិនដឹងថា គេមានសិទ្ធិក្នុងការចុះបញ្ជីទេ។ នេះជាបញ្ហាដែលបណ្តាញព័ត៌មានអាចជួយយើងបង្កើនការយល់ដឹង។»
មានប្រទេសកំពុងអភិវឌ្ឍន៍ជាង១០០នៅទូទាំងពិភពលោកនៅតែមិនទាន់ មានប្រព័ន្ធប្រតិបត្តិការដើម្បីគាំទ្រដល់ការចុះបញ្ជីអត្រាកំណើត មនុស្សឲ្យបានគ្រប់គ្រាន់ និងចងក្រងនឹងព្រឹត្តិការណ៍សំខាន់ៗផ្សេងៗទៀតក្នុងជីវិតរបស់គេ។ ព្រឹត្តិការណ៍នេះសំខាន់ណាស់នៅតំបន់អាស៊ី ដែលមានតួលេខខ្ពស់ក្នុងចំណោមមនុស្ស១៥លាននាក់ដែលមិនមានឈ្មោះ ក្នុងបញ្ជីរបស់រដ្ឋណាមួយ នៅទូទាំងពិភពលោក។
អស់ពេលជាយូរមកហើយ ដែលប្រជាជនទាំងនេះត្រូវគេមិនយកចិត្តទុកដាក់ ហើយបំភ្លេចចោល នេះបើយោងតាមលោក Hatai Limprayoonyong ធ្វើការនៅអង្គការក្រៅរដ្ឋាភិបាលឈ្មោះ Plan International ដែលជាដៃគូក្នុងសន្និសីទរួមជាមួយមន្ត្រីរដ្ឋាភិបាលដែលរៀបចំដោយ UNESCAP ក្នុងពេលខាងមុខនេះ។
ដៃគូផ្សេងទៀតមានធនាគារអភិវឌ្ឍន៍អាស៊ី អង្គការអន្តោប្រវេសន៍អន្តរជាតិ អង្គការកម្មវិធីអភិវឌ្ឍន៍អ.ស.ប. អង្គការ Unicef និងអង្គការសុខភាពពិភពលោក WHO។
មន្ត្រីអ.ស.ប.ម្នាក់ដែលថ្លែងប្រាប់អ្នកយកព័ត៌មាននៅក្រុងបាងកក កាលពីថ្ងៃព្រហស្បតិ៍ បានទទួលស្គាល់ថា មានកន្លែងច្រើនណាស់ ដែលអំពើពុករលួយ កង្វះប្រព័ន្ធសមស្រប ហើយនឹងកង្វះបុគ្គលិកបានបន្តរារាំងមិនឲ្យមនុស្សជាច្រើនចុះឈ្មោះ របស់គេ និងកូនចៅរបស់គេទេ។
កិច្ចប្រជុំរយៈពេល៤ថ្ងៃរបស់មន្ត្រីរដ្ឋាភិបាលជាន់ខ្ពស់ ស្តីអំពីការចុះបញ្ជីជនស៊ីវិល និងស្ថិតិអ្នកស្លាប់នេះ នឹងត្រូវធ្វើឡើងនៅក្រុងបាងកក ដោយចាប់ផ្តើមនៅថ្ងៃទី២៤ ខែវិច្ឆិកា ហើយមានបំណងជំរុញឲ្យមានការផ្លាស់ប្តូរស្ថានភាពបច្ចុប្បន្ននេះ៕
No comments:
Post a Comment