មនុស្ស ជិត២០នាក់ របួស ក្នុងពេល កម្លាំងសន្តិសុខ វាយបំបែក អ្នកតវ៉ា រឿងដី
RFA / វិទ្យុ អាស៊ី សេរី | ២០ តុលា ២០១៤
អ្នកតវ៉ាដីធ្លីមកពីខេត្តព្រះវិហារ
ប្រឈមមុខដាក់គ្នាជាមួយកងកម្លាំងសន្តិសុខសាលាខណ្ឌដូនពេញ
នៅព្រឹកថ្ងៃទី២០ តុលា ២០១៤។ RFA/Leng Maly
មានមនុស្ស ចំនួន ជិត២០នាក់ រងរបួស នៅក្នុងពេល កងសន្តិសុខ ខណ្ឌដូនពេញ ប្រើកម្លាំង ដោយហិង្សា វាយបំបែក លើអ្នកតវ៉ា រឿងដីធ្លី មកពីខេត្ត ព្រះវិហារ នៅថ្ងៃ ទី២០ តុលា។ ក្នុងចំណោម អ្នករងរបួស គឺ មានកុមារផង។
ពលរដ្ឋ ដែលមាន បញ្ហាដីធ្លី នៅឃុំ កន្ទួត, ស្រុក ជាំក្សាន្ត, ខេត្ត ព្រះវិហារ ជិត១០០នាក់ នាំគ្នា ព្យាយាម យកលិខិត សុំអន្តរាគមន៍ ដោះស្រាយ ទំនាស់ដីធ្លី នៅខុទ្ទកាល័យ លោក នាយករដ្ឋមន្ត្រី ហ៊ុន សែន, ប៉ុន្តែ កងសន្តិសុខ រារាំង នៅសួនច្បារនាគ បាញ់ទឹក ខាងកើត វិមានឯករាជ្យ បានរារាំងក្បួន អ្នកតវ៉ា ដោយមិន ឲ្យចូល ទៅជិត ផ្ទះលោក នាយករដ្ឋមន្ត្រី ឡើយ។
សំឡេង ស្រែកតវ៉ា៖ «បងប្អូនខ្ញុំ វេទនាណាស់ នៅខេត្ត ព្រះវិហារ។ ចំនួន ៣ភូមិ រងគ្រោះ ដោយសារដីធ្លី។ រកភាពយុត្តិធម៌ អត់ឃើញទេ, អត់បាយ អត់ទឹក, រស់នៅ តាមវត្ត។ ហេតុអី ក៏លោក មិនរក ភាពយុត្តិធម៌ ឱ្យបងប្អូនខ្ញុំផង?»
នៅវេលា ថ្ងៃត្រង់ កងសន្តិសុខ ខណ្ឌដូនពេញ រាប់សិបនាក់ ដែលគាំទ្រ កម្លាំង ពីក្រោយ ដោយកងអាវុធហត្ថ រាប់រយនាក់ បានប្រើ អំពើហិង្សា បណ្ដេញអ្នកតវ៉ា ចេញពីទីនោះ។
អ្នករបួស ដែលអាជ្ញាធរ វាយ ត្រូវ បានពេទ្យ អង្គការ ការពារ សិទ្ធិមនុស្ស លីកាដូ (Licadho) ជួយសង្គ្រោះ និងព្យាបាល។
មន្ត្រី អង្គការ ការពារ សិទ្ធិមនុស្ស លីកាដូ លោក អំ សំអាត ឱ្យដឹងថា, ក្រោយ ការវាយបង្ក្រាប ដោយហិង្សា របស់ អាជ្ញាធរ មួយប្រាវនោះ, ខាងលោក បានទទួល អ្នកតវ៉ា ដែលរងរបួស ទាំងក្មេង និងចាស់ ជិតម្ភៃនាក់។ ក្នុងនោះ មានប្រាំនាក់ រងរបួស ធ្ងន់៖ «អ្នក ដែលរងរបួសហ្នឹង ចំនួន ១៨នាក់ ដែលកំពុង តែ ព្យាបាល នៅអង្គការ លីកាដូនេះ។ នៅក្នុងនោះ យើង ឃើញមាន របួសធ្ងន់ ៥នាក់, ហើយ ផុតពីហ្នឹង យើង ចាត់ទុក ថា មិនស្រាល ប៉ុន្មានដែរ គឺ មធ្យម។ ក្នុងហ្នឹង ក៏មាន ការប៉ះពាល់ ដល់កុមារ ដែលមក តាមម្ដាយ តាមឪពុកហ្នឹង ៣នាក់ទៀត, គឺ ១០ឆ្នាំមួយ, ៥ឆ្នាំមួយ, និង២ឆ្នាំ មួយទៀត ដែលត្រូវ រងរបួស ដោយសារ អំពើហិង្សានេះ ផងដែរ ដែលយើង គិតថា, នេះ ជាអំពើឃោរឃៅ ដែលធ្វើ ឱ្យប៉ះពាល់ ធ្ងន់ធ្ងរ ដល់ផ្នែក សិទ្ធិមនុស្ស។»
មន្ត្រី សម្របសម្រួល អង្គការ ការពារ សិទ្ធិមនុស្ស អាដហុក (Adhoc) ប្រចាំខេត្តព្រះវិហារ ចាត់ទុកការបង្ក្រាបដោយហិង្សាលើអ្នកតវ៉ារឿងដីធ្លីមកពីខេត្ត ព្រះវិហារនេះ គឺជាការរំលោភសិទ្ធិមនុស្ស៖ «គឺជាការ រំលោភសិទ្ធិមនុស្សយ៉ាងធ្ងន់ធ្ងរ ពីព្រោះពួកគាត់ឡើងទៅតវ៉ា គឺតវ៉ាដោយសន្តិវិធី ដូចជាមិនបានប្រើហិង្សាទៅនឹងក្រុមអាជ្ញាធរណាមួយទេ ហើយពេលពួកគាត់តវ៉ា បែរជាអាជ្ញាធរទៅវាយដំឱ្យរបួសបែបនេះ គឺជាការរំលោភសិទ្ធិមនុស្ស ហើយក៏ជាការបិទសិទ្ធិសេរីភាពក្នុងការបញ្ចេញមតិ ក្នុងការតវ៉ារកយុត្តិធម៌ជូនពួកគាត់។»
នៅក្នុងលិខិតសុំអន្តរាគមន៍ពីលោកនាយករដ្ឋមន្ត្រី ហ៊ុន សែន ក្រុមអ្នកតវ៉ាបានសរសេរថា ពលរដ្ឋដែលមានបញ្ហាដីធ្លីនេះមានចំនួន ៣៣១គ្រួសារស្ថិតនៅក្នុងស្រុកជាំក្សាន្ត និងក្រុងព្រះវិហារ ខេត្តព្រះវិហារ។ ពួកគាត់ឱ្យដឹងថា បញ្ហាដីធ្លីនេះកើតឡើងចំពោះពលរដ្ឋ ៧៨គ្រួសារ នៅពេលដែលអាជ្ញាធរខេត្តចង់ពង្រីកវាលយន្តហោះ។ រីឯពលរដ្ឋ ២៥៣គ្រួសារទៀត ត្រូវបានអាជ្ញាធរឈូសឆាយ និងដុតផ្ទះសម្បែង សាលា និងវត្ត ហើយឱ្យពួកគាត់ទៅរស់នៅក្នុងចម្ការមីន។
មន្ត្រីសម្របសម្រួលអង្គការការពារសិទ្ធិមនុស្សអាដហុក ប្រចាំខេត្តព្រះវិហារ លោក ឡោ ច័ន្ទ បញ្ជាក់បន្ថែមថា នៅឆ្នាំ២០១២ ពលរដ្ឋនៅយល់ព្រមតាមអាជ្ញាធរដោះដូរដីពីឃុំកន្ទួត ទៅនៅទីតាំងថ្មីឈ្មោះស្រះក្ដុល។ លោកថា ការយល់ព្រមនោះ ក៏ព្រោះតែអាជ្ញាធរខេត្តធ្លាប់សន្យានឹងពលរដ្ឋរៀបចំឱ្យមាន ហេដ្ឋារចនាសម្ព័ន្ធ ដែលមានផ្លូវទឹកភ្លើងសម្រាប់ពលរដ្ឋដែលរើទៅនោះ។ ប៉ុន្តែរហូតមកដល់ពេលនេះមិនអ្វីដូចការសន្យាទេ៖ «ភាព ជាក់ស្ដែងនៅស្រះក្ដុលពួកប្រជាពលរដ្ឋ ក៏ដូចជាប្រជាសហគមន៍រស់នៅសព្វថ្ងៃនេះ គឺពុំទាន់ហេដ្ឋារចនាសម្ព័ន្ធអីឱ្យបានច្បាស់លាស់ទេ។ ប្រព័ន្ធទឹកភ្លើងអត់ ហើយម្យ៉ាងដីកសិកម្ម ដីបង្កបង្កើនផលរបស់គាត់ គឺមានមីន។ អ៊ីចឹងហើយបានជាពួកគាត់ចង់ដូរទៅនៅទីតាំងចាស់របស់ពួកគាត់វិញ ហ្នឹង។»
នៅព្រឹកថ្ងៃទី២០ តុលា ដដែល មុនពេលហែក្បួនទៅរកអន្តរាគមន៍ពីខុទ្ទកាល័យលោក ហ៊ុន សែន ពលរដ្ឋបានហែញត្តិទៅដាក់នៅតាមស្ថានទូតមួយចំនួន ដូចជា ស្ថានទូតចិន (China) រុស្សី (Russia) អូស្ត្រាលី (Australia) និងរដ្ឋសភាជាដើម ដើម្បីឱ្យស្ថានទូត និងស្ថាប័នទាំងនោះធ្វើអន្តរាគមន៍ទៅរដ្ឋាភិបាលជួយដោះស្រាយដីធ្លី ជូនពួកគាត់៕
No comments:
Post a Comment