សង្គមស៊ីវិល អះអាងថា, ការចុះស្រង់ស្ថិតិ ជនបរទេស នៅកំពង់ឆ្នាំង ពុំមាន សុក្រឹតភាព
RFA / វិទ្យុ អាស៊ី សេរី | ៨ តុលា ២០១៤
សកម្មភាព អាជ្ញាធរ ស្រង់ឈ្មោះ ជនបរទេស នៅសង្កាត់ផ្សារ ឆ្នាំង,
ក្រុង កំពង់ឆ្នាំង, ខេត្ត កំពង់ឆ្នាំង កាលពីថ្ងៃ ទី៦ ខែតុលា ឆ្នាំ២០១៤។ RFA/Chin Chetha
មន្ត្រីជាន់ខ្ពស់ រដ្ឋាភិបាល និងសមត្ថកិច្ច ថ្នាក់មូលដ្ឋាន សុទ្ធតែ បង្ហាញ ពីភាពជឿជាក់ និងអះអាង អំពី សុក្រឹតភាព នៃការចុះស្រង់ ស្ថិតិ និងគ្រប់គ្រង ជនជាតិបរទេស ដែលកំពុង រស់នៅ ក្នុងប្រទេសកម្ពុជា។
ចំណែក សង្គមស៊ីវិល និងអ្នកវិភាគ បញ្ហាសង្គម យល់ថា, ការគ្រប់គ្រង ប្រកប ដោយប្រសិទ្ធភាព និងមាន តួលេខ ជនបរទេស ត្រឹមត្រូវ គឺ ជាគុណប្រយោជន៍ ដ៏ច្រើន ក្នុងការគ្រប់គ្រង ស្ថានការណ៍ និងធ្វើ ផែនការ អភិវឌ្ឍន៍ជាតិ។ ប៉ុន្តែ ការចុះស្រង់ស្ថិតិ ឬគ្រប់គ្រង ជនបរទេស ដែលក្រសួង មហាផ្ទៃ កំពុងអនុវត្ត គឺ ពុំមាន សុក្រឹតភាពឡើយ។
រយៈពេលជិតពីរខែមកហើយដែលក្រុមការងារថ្នាក់ជាតិនៃក្រសួង មហាផ្ទៃ សហការជាមួយមន្ត្រីថ្នាក់មូលដ្ឋាននៅតាមបណ្ដាខេត្តនានា ដើម្បីចុះស្រង់ និងគ្រប់គ្រងស្ថិតិជនបរទេស។
ដោយឡែកនៅខេត្តកំពង់ឆ្នាំង ដែលជាខេត្តមួយមានពលរដ្ឋវៀតណាម ទាំងស្រប និងមិនស្របច្បាប់រស់នៅច្រើនជាងគេនោះ ខាងសមត្ថកិច្ចបានចុះអនុវត្តការងារជិតមួយសប្ដាហ៍មកហើយ ប៉ុន្តែព័ត៌មានទាក់ទងនឹងសកម្មភាពការងារ ឬនីតិវិធីនៃការចុះស្រង់ស្ថិតិនេះ មិនត្រូវបានគេបញ្ចេញឲ្យដឹងនៅឡើយទេ ដោយអះអាងថា ក្រុមការងារជំនាញកំពុងចុះធ្វើការមិនទាន់ចប់។
ចាប់តាំងពីព្រឹកព្រលឹម ជនបរទេសចម្រុះជាតិសាសន៍ ជាពិសេសជនជាតិវៀតណាម ខ្លះឈរ និងខ្លះអង្គុយប្រជ្រៀតគ្នានៅលើបង់ក្រោមដើមពោធិ៍ ក្បែរប៉ុស្តិ៍នគរបាលរដ្ឋបាលសង្កាត់ផ្សារឆ្នាំង ដើម្បីរង់ចាំផ្ដល់ព័ត៌មានអំពីប្រវត្តិ និងការស្នាក់នៅរបស់ខ្លួននៅលើទឹកដីប្រទេសកម្ពុជា ជូនសមត្ថកិច្ច។ ទីតាំងចុះឈ្មោះ និងប្រមូលព័ត៌មានជនបរទេស នៅក្រុងកំពង់ឆ្នាំង មាន ៤ទីតាំង គឺទី១ នៅម្ដុំវត្តយាយទេព ទី២នៅក្រោមដើមពោធិ៍ក្បែរមាត់ទន្លេផ្សារក្រោម និងចំនួនពីរទីតាំងទៀតនៅចុង និងដើមភូមិចុងកោះ ស្ថិតនៅក្នុងសង្កាត់ផ្សារឆ្នាំង ក្រុងកំពង់ឆ្នាំង។
ពលរដ្ឋវៀតណាម ម្នាក់រស់នៅភូមិកណ្ដាល សង្កាត់ផ្សារឆ្នាំង កំពុងឈរផ្អៀងផ្អងមើលទៅក្រុមសមត្ថកិច្ចសាកសួរព័ត៌មាន និងសរសេរបំពេញឯកសារដល់ជនបរទេសផ្សេងទៀត លោក ចាំង អៀងយុង មានប្រសាសន៍ថា រូបលោក និងប្រពន្ធកូន ទើបបានចុះឈ្មោះ និងថតរូប ហើយរង់ចាំទទួលយកបង្កាន់ដៃដែលចេញដោយក្រុមការងារថ្នាក់ក្រសួង។ លោកអះអាងថា លោកព្យាយាមនាំកូនប្រពន្ធមកចុះឈ្មោះនៅម្ដុំដើមពោធិ៍ផ្សារក្រោម រយៈពេលបីថ្ងៃជាប់ៗគ្នាមិនបានសម្រេច ដោយសារតែមានមនុស្សច្រើនពេក។ លោកសប្បាយចិត្ត និងសង្ឃឹមថា គ្រួសាររបស់លោកនឹងទទួលបានឯកសារស្នាក់នៅក្នុងប្រទេសកម្ពុជា ពីព្រោះគ្រួសាររបស់លោកបានចូលមកតាំងទីលំនៅនៅស្រុកខ្មែរជិត ៤០ឆ្នាំមកហើយ ប៉ុន្តែពុំមានឯកសារអ្វីសោះ៖ «បួនប្រាំនាក់ទាំង ប្ដីទាំងប្រពន្ធកូនទាំងអស់។ យើងអត់មានសំបុត្រ (ឯកសារស្នាក់នៅ) កម្ពុជា មានតែសំបុត្រវៀតណាម ទាំង។ សប្បាយចិត្ដ ឥឡូវនៅលើទឹកដីគេនៅពេលគេហៅឲ្យធ្វើអីក៏ធ្វើដែរ។»
រហូតមកដល់ពេលនេះ ខាងក្រុមការងារថ្នាក់ជាតិ និងសមត្ថកិច្ចមូលដ្ឋាន នៅតែព្យាយាមលាក់បាំងអំពីនីតិវិធី នៃការចុះស្រង់ស្ថិតិ និងគ្រប់គ្រងជនបរទេស ដោយមិននិយាយចេញឲ្យបានច្បាស់លាស់នៅឡើយ។ ប៉ុន្តែជនបរទេសដែលឆ្លងកាត់ការជួបសម្ភាស និងផ្ដល់ព័ត៌មានដល់សមត្ថកិច្ច បង្ហើបថា ក្រុមការងារបានសួរផ្ដោតសំខាន់ទៅលើប្រវត្តិនៃការរស់នៅមុនឆ្នាំ ១៩៧៩ ហើយចូលមករស់នៅស្រុកខ្មែរនៅឆ្នាំណា និងចូលតាមច្រកព្រំដែនណា ជាដើម។
ទាក់ទងបញ្ហានេះ អ្នកសម្របសម្រួលនៃអង្គការការពារសិទ្ធិជនជាតិភាគតិច (MIRO) ប្រចាំខេត្តកំពង់ឆ្នាំង លោក ទត គឹមស្រូយ ថ្លែងថា ក្នុងរយៈពេលជិតមួយសប្ដាហ៍ គឺចាប់ពីថ្ងៃទី២ ដល់ថ្ងៃទី៦ ខែតុលា ឆ្នាំ២០១៤ ខាងលោកមិនទាន់រកឃើញពីភាពមិនប្រក្រតី ឬការទារប្រាក់ពីជនបរទេស ដែលចូលមកបង្ហាញអត្តសញ្ញាណកម្មរបស់ខ្លួន ដល់ក្រុមមន្ត្រីសមត្ថកិច្ចនៅឡើយទេ។ លោកបន្តថា ការអនុវត្តការងាររបស់ក្រុមមន្ត្រីសមត្ថកិច្ចនៅជំហានទី១នេះ អាចនឹងទទួលបានលទ្ធផលល្អប្រសើរច្រើន ប៉ុន្តែលោកស្នើឲ្យអាជ្ញាធរ និងសមត្ថកិច្ចពាក់ព័ន្ធ ស្រង់ស្ថិតិឲ្យបានល្អិតល្អន់ និងគ្រប់ជនបរទេសទាំងអស់ដែលកំពុងរស់នៅក្នុងទឹកដីខេត្ត កំពង់ឆ្នាំង៖ «ការចុះធ្វើស្ថិតិជំរឿនដល់ប្រជាពលរដ្ឋវៀតណាម នេះ ខ្ញុំឃើញថា មានភាពល្អប្រសើរ ដោយសារអី ព្រោះទីតាំងនៅជិតទីលំនៅរបស់ប្រជាពលរដ្ឋ។ ហើយមួយទៀតមានការបង្កលក្ខណៈពីអាជ្ញាធរ បានទៅជម្រាបពួកគាត់ឲ្យពួកគាត់មកធ្វើគ្រប់ៗគ្នា។ នៅក្នុងនេះ បើតាមខ្ញុំជួបសម្ភាសផ្ទាល់ជាមួយអ្នកដែលបានធ្វើហើយហ្នឹង គឺអត់ទេ។ សូម្បីតែទឹកសុទ្ធ ឬទឹកក្រូចដែលយើងទិញយកទៅឲ្យអ្នកធ្វើ ជាពិសេសគឺប៉ូលិសមកពីក្រសួង គេមិនទទួលយកទេ គេខ្លាចមេគេថាគេពុករលួយអ៊ីចឹងទៅណា។»
ប្រធានក្រុមការងារចុះស្រង់ស្ថិតិម្នាក់ដែលថ្លែងក្នុងលក្ខខណ្ឌ មិនបញ្ចេញឈ្មោះ និងសំឡេង ឲ្យដឹងថា សម្រាប់នៅខេត្តកំពង់ឆ្នាំង ចាប់តាំងពីការចុះស្រង់ស្ថិតិនៅឃុំឆ្នុកទ្រូ ស្រុកបរិបូរណ៍ រហូតមកដល់ក្រុងកំពង់ឆ្នាំង ខាងក្រុមការងារថ្នាក់ក្រសួង បានបែងចែកពី ៣ ទៅ ៥ក្រុម ទៅតាមចំនួនជនបរទេសមានច្រើន ឬតិចនៅតាមតំបន់នីមួយៗ។ លោកថា ការចុះអនុវត្តការងារនេះ មិនកំណត់ពេលវេលាបញ្ចប់ ប៉ុន្តែបានយកចិត្តទុកដាក់ និងស្រង់ទាល់តែអស់ជនបរទេសក្នុងមូលដ្ឋាន ដោយសន្និដ្ឋានទៅលើរបាយការណ៍ ឬស្ថិតិរបស់អាជ្ញាធរមូលដ្ឋានដែលមានស្រាប់។
ចំណែកស្នងការរង និងជាអ្នកទទួលបន្ទុកការងារស្ថិតិ នៃស្នងការដ្ឋាននគរបាលខេត្តកំពង់ឆ្នាំង លោក ប៉ាល់ សូត្រ បដិសេធមិនធ្វើអត្ថាធិប្បាយជុំវិញសកម្មភាពចុះអនុវត្តការងារស្រង់ ស្ថិតិ និងគ្រប់គ្រងជនបរទេសនេះឡើយ ដោយលោកប្រាប់ថា កំពុងជាប់ប្រជុំ។
យ៉ាងណា ប្រធានសេនាធិការ លោក ស៊ុំ សុជាតិ ថ្លែងបញ្ជាក់ថា ខាងលោកក៏មិនទាន់អាចផ្ដល់ព័ត៌មានអ្វីបានដែរ ពីព្រោះមិនទាន់មានរបាយការណ៍ពីមន្ត្រីអ្នកចុះអនុវត្តផ្ទាល់ ប៉ុន្តែលោកថា លទ្ធផលការងារជំហានទី១ អាចនឹងដឹងក្នុងពេលឆាប់ៗ៖ «ក្រុម ដែលចុះមកហ្នឹង គឺសហការជាមួយថ្នាក់ជាតិ គឺអគ្គនាយកដ្ឋានអន្តោប្រវេសន៍មក។ ដូច្នេះ អត់ទាន់បានរាយការណ៍មួយជំហាននៅឡើយទេ។ ឥឡូវនៅក្រុងកំពង់ឆ្នាំង ដល់ចប់វគ្គក្រុងកំពង់ឆ្នាំង គេទៅស្រុករលាប្អៀរ គេចប់មួយជុំហ្នឹង បានគេរាយការណ៍ បានយើងបូកសរុបម្ដង។»
បើទោះបីជាពុំមានស្ថិតិផ្លូវការណាមួយបង្ហាញពីចំនួនជនបរទេស ដែលកំពុងរស់នៅក្នុងទឹកដីខេត្តកំពង់ឆ្នាំង ប៉ុន្តែអធិការក្រុងកំពង់ឆ្នាំង និងមន្ត្រីទទួលបន្ទុកស្ថិតិនៃស្នងការនគរបាលខេត្ត បានអះអាងតាមរយៈបណ្ដាញផ្សព្វផ្សាយព័ត៌មានក្នុងស្រុកថា នៅទូទាំងខេត្តកំពង់ឆ្នាំង ក្នុងឆ្នាំ២០១៤ តួលេខនៃជនបរទេសដែលភាគច្រើនជាជនជាតិវៀតណាម មានចំនួន ១.៧២៣គ្រួសារ ស្មើនឹងចំនួនមនុស្ស ៨.៦៦៩នាក់។ ក្នុងនោះ នៅក្រុងកំពង់ឆ្នាំង មានចំនួន ៧៤៨គ្រួសារ ស្មើនឹងចំនួនមនុស្ស ៣.៩០៧នាក់។
អ្នកស្រាវជ្រាវផ្នែកអភិវឌ្ឍន៍សង្គម លោក កែម ឡី យល់ថា សកម្មភាពចុះស្រង់ស្ថិតិ និងគ្រប់គ្រងជនបរទេសរបស់ក្រសួងមហាផ្ទៃ នៅពេលនេះ គឺពុំមានប្រសិទ្ធភាពច្រើនឡើយ ដោយសារតែពុំមានការចូលរួមពីដៃគូពាក់ព័ន្ធ ឬក្រុមហ៊ុនមានជំនាញឯកទេសធ្វើស្ថិតិចូលរួម។ លោកបន្តថា ប្រសិនបើមានតួលេខនៃជនអន្តោប្រវេសន៍ត្រឹមត្រូវអាចយកជាការបាន គឺអាចញែកដាច់នូវជនបរទេសណារស់នៅស្របច្បាប់ និងជនបរទេសណារស់នៅខុសច្បាស់ ដើម្បីកាត់បន្ថយហានិភ័យជាតិសំខាន់ៗ ដូចជា អាណានិគមបែបថ្មីរបស់បរទេស ឬបទឧក្រិដ្ឋកម្មផ្សេងៗ៖ «ប៉ូលិស គ្រាន់តែជាអ្នកអនុវត្តន៍ទេ ប៉ុន្តែដល់ពេលឲ្យទៅធ្វើការសិក្សាស្រាវជ្រាវធំៗ អ៊ីចឹងទាល់តែគេជួយសហការជាមួយដៃគូអភិវឌ្ឍន៍ ហើយគេធ្វើម្ដង៦ ទៅ ៧លានដុល្លារ ហើយគេធ្វើមានវិធីសាស្ត្រអីត្រឹមត្រូវ មិនចេះតែឆ្លើយអ៊ីចឹងទេ។ ថ្នាក់ដឹកនាំយើងអត់សូវប្រើបញ្ញវន្តខ្មែរដែលនៅក្នុងរដ្ឋាភិបាល មានសមត្ថភាពទេ ច្រើនតែប្រើអ្នកមានលុយ ឬមួយក៏មានបក្សមានពួកអ៊ីចឹងណា។ ទាល់តែអ្នកហ្នឹងគាំទ្រនយោបាយច្បាស់ មិនមែន ប៉ុន្តែអ្នកដែលមានសមត្ថភាពពិតប្រាកដមិនសូវប្រើទេ ដល់អ៊ីចឹងទៅ ប្រសិទ្ធភាពការងារវាទៅតាមហ្នឹងដែរ។»
មន្ត្រីជាន់ខ្ពស់របស់រដ្ឋាភិបាល និងជាអ្នកនាំពាក្យក្រសួងមហាផ្ទៃ លោក ខៀវ សុភ័គ ធ្លាប់បញ្ជាក់ប្រាប់វិទ្យុអាស៊ីសេរី ថា ក្រសួងបានបង្កើតក្រុមការងារថ្នាក់ជាតិ ដើម្បីចុះធ្វើការងារស្រង់ស្ថិតិ និងគ្រប់គ្រងជនបរទេស ដោយបែងចែកចេញជា ៧តំបន់គោលដៅនៅទូទាំង ២៥ខេត្ត និងក្រុង ហើយអ្នកអនុវត្តន៍ការងារនេះ គឺយកតែមន្ត្រីរាជការស៊ីប្រាក់ខែរដ្ឋ។ លោកថា ការរិះគន់នានាតែងតែកើតមានឡើង ប៉ុន្តែលោកបញ្ជាក់ថា ប្រសិនបើការចុះធ្វើស្ថិតិ និងគ្រប់គ្រងជនបរទេសនាពេលនេះ ពុំមានសុក្រឹតភាព ហើយតួលេខអាចយកជាផ្លូវការបាន ប្រហែលជាក្រសួងមិនចាំបាច់បង្កើតក្រុមការងារថ្នាក់ជាតិ ចុះធ្វើការងារនេះឡើយ៕
No comments:
Post a Comment