អ្នកភូមិ នៅខេត្ត រតនគិរី យល់ព្រម ទទួលយកដី ទួលសុវត្ថិភាព ពីក្រុមហ៊ុន វៀតណាម
RFA / វិទ្យុ អាស៊ី សេរី | ១៥ កក្កដា ២០១៥
ប្រជាពលរដ្ឋភូមិថ្មី ឃុំជ័យឧត្ដម ស្រុកលំផាត់ ខេត្តរតនគិរី
នៅថ្ងៃទី៣០ ខែមេសា
ប្រមូលផ្តុំគ្នាបោះបង្គោលរបងហ៊ុមព័ទ្ធដីទួលសុវត្ថិភាព
ខណៈក្រុមហ៊ុន ហ័ង អាញ លំផាត់
គ្រោងកាន់កាប់ដោយសំអាងថាដីសម្បទានក្រុមហ៊ុន។ Adhoc
ជម្លោះ ទាមទារដី ទួលសុវត្ថិភាព ទំហំ ២០០ហិកតារ របស់ប្រជាពលរដ្ឋ ភូមិ ថ្មី, ឃុំ ជ័យឧត្ដម, ស្រុក លំផាត់, ខេត្ត រតនគិរី ជាមួយ ក្រុមហ៊ុន ដីសម្បទាន សេដ្ឋកិច្ច វៀតណាម ឈ្មោះ ហ័ង អាញ់ លំផាត់ (Hoang Ann LumPhat) ឈានដល់ ទីបញ្ចប់ បន្ទាប់ ពីអ្នកភូមិ យល់ព្រម ទទួលយក ចំណែកដី ៥០ភាគរយ នៃដីទាមទារ ពីក្រុមហ៊ុន។
មន្ត្រីអាជ្ញាធរខេត្តរតនគិរី បានសម្របសម្រួលឲ្យប្រជាពលរដ្ឋភូមិថ្មី ទទួលយកដី ១០០ហិកតារពីក្រុមហ៊ុន ហ័ង អាញ់ លំផាត់ សម្រាប់ធ្វើទីទួលសុវត្ថិភាព ដើម្បីបញ្ចប់ជម្លោះតវ៉ារឿងដីធ្លីរបស់ពលរដ្ឋ។
ប្រធានក្រុមការងារដោះស្រាយដីធ្លី និងជាអភិបាលរងខេត្តរតនគិរី លោក លី វិន មានប្រសាសន៍ថា កំណត់ហេតុយល់ព្រមរវាងតំណាងសហគមន៍ និងអាជ្ញាធរពាក់ព័ន្ធ បានធ្វើរួចហើយកាលពីសប្ដាហ៍មុន បន្ទាប់ពីក្រុមការងារ និងប្រជាពលរដ្ឋជិត ៨០គ្រួសារ បាននាំគ្នាទៅទីតាំងដីមានទំនាស់ជាក់ស្តែង ហើយសម្របសម្រួលគ្នាបញ្ចប់បញ្ហានេះ៖ «ប្រជាជនគាត់ចង់បានកន្លែង ណា យើងវាស់ឲ្យកន្លែងហ្នឹងទៅ។ ៧៤នាក់គាត់ទៅវាស់វែងទាំងអស់គ្នា ៤នាក់គាត់ផ្ដិតមេដៃឲ្យយើងយើងបានដាក់លក្ខខណ្ឌជាមួយក្រុមហ៊ុនឲ្យ យកតាមគោលដៅដែលយើងចុច ជី.ភី.អែស (GPS) ឃើញ។»
ប្រជាពលរដ្ឋរស់នៅភូមិថ្មី ជាង ១០០គ្រួសារ បានធ្វើការតវ៉ាទាមទារដី ២០០ហិកតារបន្ថែមទៀតពីក្រុមហ៊ុន ហ័ង អាញ់ លំផាត់ សម្រាប់ធ្វើទីទួលសុវត្ថិភាព បន្ទាប់ពីក្រុមហ៊ុននេះបានកាត់ចេញដីជាង ៧០០ហិកតារ សម្រាប់ទុកជាដីត្រៀមបម្រុងអ្នកភូមិកាលពីឆ្នាំ២០១២ ប៉ុន្តែដីនោះគ្មានទីទួលសម្រាប់ជម្លៀសប្រជាពលរដ្ឋគ្រាមានទឹក ជំនន់។
ទាក់ទិនករណីនេះដែរ តំណាងអ្នកភូមិ លោក រឿន សាយខឿន រៀបរាប់ថា អ្នកភូមិភាគច្រើនបានយល់ព្រមទទួលយកការសម្របសម្រួលរបស់អាជ្ញាធរ មូលដ្ឋាន ក៏ប៉ុន្តែមានប្រជាពលរដ្ឋមួយចំនួនទៀត នៅតែប្រកាន់ជំហរមិនទទួលយកដំណោះស្រាយនេះទេ។ យ៉ាងណា លោកថា តំណាងអ្នកភូមិយល់ព្រមផ្ដិតមេដៃទទួលយកដី ដោយសារតែការតវ៉ារបស់អ្នកភូមិអូសបន្លាយកាន់តែយូរ ចំណែកមន្ត្រីបរិស្ថាន ក៏បានប្ដឹងតំណាងអ្នកភូមិ ៤នាក់ តាមផ្លូវតុលាការទៀតផង៖ «ក្រុមហ៊ុនឲ្យ ១០០ហិកតារដីព្រៃ ព្រមមិនព្រមមិនដឹងធ្វើម៉េច ប៉ុន្មាននាក់ដែលទៅសាលាស្រុកគេព្រមអស់ហើយ។ ពីមុនថាចាំឯកឧត្តម លី ធុច គាត់ចុះមកកាត់ដីឲ្យប្រជាជនកន្លែងពាក់ព័ន្ធ ប៉ុន្តែបាត់គាត់រហូត។»
កាលពីខែមិថុនា មន្ត្រីអយ្យការតុលាការខេត្តរតនគិរី បានកោះហៅតំណាងអ្នកភូមិចំនួន ៤នាក់មកសាកសួរពីបទដឹកនាំអ្នកភូមិ ចូលទៅបោះបង្គោលហ៊ុមព័ទ្ធដីដែលក្រុមហ៊ុនបានឈូសឆាយ ក្នុងគម្រោងដីសម្បទានដែលក្រសួងបរិស្ថាន បានផ្តល់ទៅឲ្យក្រុមហ៊ុន ហ័ង អាញ់។
មន្ត្រីឃ្លាំមើលសិទ្ធិមនុស្សនៃសមាគមអាដហុក (Adhoc) ខេត្តរតនគិរី លោក ឆាយ ធី ចាត់ទុកការសម្របសម្រួលនេះជាឆន្ទៈរួមគ្នារបស់ភាគីទាំងពីរ ដើម្បីបញ្ចប់ជម្លោះដែលជាប្រការល្អសម្រាប់ការអភិវឌ្ឍរបស់ ក្រុមហ៊ុន និងប្រជាពលរដ្ឋ។ លោកកត់សម្គាល់ថា ដីដែលអ្នកភូមិស្នើសុំនោះទុកជាដីប្រើប្រាស់រួមរបស់អ្នកភូមិ ដីនោះក៏មិនមែនជាកម្មវត្ថុសម្រាប់អ្នកភូមិចែកគ្នាយកជា កម្មសិទ្ធិបានឡើយ។ ហេតុនេះ អ្នកភូមិត្រូវរួមគ្នាថែរក្សាដីឲ្យបាននៅគង់វង្ស៖ «បើសិន សហគមន៍ ហើយនិងក្រុមហ៊ុន ព្រមបញ្ចប់រឿងហ្នឹង យើងក៏បិទការអង្កេតរបស់សមាគមអាដហុក ដែរ ព្រោះជាការព្រមព្រៀងដោយឆន្ទៈរៀងៗខ្លួន។ ជាលទ្ធផលល្អប្រសើរដែរ ក្នុងការរកដំណោះស្រាយតាមរយៈអាជ្ញាធរខេត្ត។»
ជុំវិញរឿងក្តីនេះដែរ អតីតអភិបាលស្រុកលំផាត់ លោក គង់ ស្រ៊ុន មានប្រសាសន៍ថា អាជ្ញាធរមូលដ្ឋានស្រុក និងខេត្ត បានសម្របសម្រួលរកដំណោះស្រាយសន្តិភាពជូនពលរដ្ឋ។ ហេតុនេះ អាជ្ញាធរនឹងសម្របសម្រួលឲ្យភាគីពាក់ព័ន្ធ ដកពាក្យប្ដឹងតំណាងអ្នកភូមិតាមផ្លូវតុលាការចេញវិញ ដើម្បីបញ្ចប់បញ្ហាដូចគ្នា៕
No comments:
Post a Comment