 |
| លោក យឹម សុវណ្ណ មន្ត្រីនាំពាក្យ និងជាប្រធានក្រុមការងារគណបក្សសង្គ្រោះជាតិ ប្រចាំមណ្ឌលភ្នំពេញ ក្នុងវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃទី១៥ ខែវិច្ឆិកា ឆ្នាំ២០១៣។ |
បក្សប្រឆាំង ឆ្លើយតប ចំពោះ ការចំអក របស់លោក ហ៊ុន សែន រឿងអ្នកជាប់ ឃុំឃាំង
RFA / វិទ្យុ អាស៊ី សេរី | ២ កញ្ញា ២០១៥
អ្នកនាំពាក្យ គណបក្ស សង្គ្រោះជាតិ លោក យឹម សុវណ្ណ បានថ្លែង ការពារ ប្រធាន គណបក្ស សង្គ្រោះជាតិ លោក សម រង្ស៊ី ថា, លោក ពុំបាន ភូតកុហក បោកប្រាស់ មន្ត្រី ឬសកម្មជន ដែលកំពុង ជាប់ឃុំឃាំង ក្នុងពន្ធនាគារ ដូចការចោទប្រកាន់ របស់ លោកនាយករដ្ឋមន្ត្រី ហ៊ុន សែន នោះឡើយ។ លោក យឹម សុវណ្ណ បញ្ជាក់ថា, ការចាប់ឃុំឃាំង អ្នកទាំងនោះ គឺ ជារឿង នយោបាយ។ ដូច្នេះ ការលើកឡើង របស់លោក សម រង្ស៊ី កន្លងមក គឺ ជាឆន្ទៈ នយោបាយ ក្នុងការដោះស្រាយ បញ្ហា ដើម្បី ឲ្យមាន ការបង្រួបបង្រួម ជាតិ៖ «ដំណោះស្រាយ ទាល់តែ គណបក្ស ទាំងពីរ ព្រមព្រៀងគ្នា ដោះស្រាយ, ហើយ អ្នក ដែលដើរ តួនាទី ក្នុងការ រកដំណោះស្រាយ គឺ អ្នកចោទប្រកាន់ ហ្នឹងហើយ, គឺ គណបក្ស កាន់អំណាច, ព្រោះ៖ ទី១, ជារឿង នយោបាយ; ទី២, គណបក្ស កាន់អំណាច; ហើយ ទី៣, អ្នកណា ក៏ដឹងដែរ ថា, គណបក្ស ប្រជាជន មានឥទ្ធិពល ច្រើន ទៅលើ ប្រព័ន្ធតុលាការ។»
ការបញ្ចេញ ប្រតិកម្មនេះ គឺ នៅបន្ទាប់ ពីលោក ហ៊ុន សែន បានថ្លែង ចំអក នៅក្នុងសន្និបាត តំណាងសមាគម អតីត យុទ្ធជន ទូទាំងប្រទេស នៅវិទ្យាស្ថាន ជាតិ អប់រំ កាលពីព្រឹក ថ្ងៃទី២ ខែកញ្ញា ដោយថ្លែងសំដៅ ដាក់ឲ្យលោក សម រង្ស៊ី ថា, បានត្រឹមតែ សន្យាខ្យល់ ក្នុងការដោះស្រាយ រឿង ឲ្យមាន ការដោះលែង មន្ត្រី និងសកម្មជន គណបក្ស ឲ្យនៅក្រៅឃុំនោះ៖ «ថាអូ! ខែ៨ ដោះចេញហើយ។ ឥឡូវខែ៩ ហើយ ដោះអត់ចេញ។ លោកឯង ថាម៉េច? ប្រជាពលរដ្ឋ គាំទ្រ លោកឯង និយាយថាម៉េច? បើ គេ ប្រកាសក្ដែង ថា, ខែ៨ ដោះរួចហើយ ឥឡូវខែ៩ ដោះមិនទាន់រួច។ ភូតត្លុក ភូតតាមដំណាក់។ អ៊ីចឹង មិនបានទេ។ បើ បានជាជ្រុលភូត, ភូត ដល់សមុទ្រ អាត្លង់ទិច ឬសមុទ្រ ប៉ាស៊ីហ្វិក ណោះ។»
កន្លងមក មេដឹកនាំ គណបក្ស សង្គ្រោះជាតិ ធ្លាប់បាន លើកឡើង ថា, នឹងប្រើ វប្បធម៌សន្ទនា ចរចា ជាមួយ ថ្នាក់ដឹកនាំ បក្សកាន់អំណាច ដើម្បី ឲ្យមាន ការដោះលែង មន្ត្រី និងសកម្មជន របស់ខ្លួន ចេញ ពីពន្ធនាគារ ព្រៃ ស ឆាប់ៗ។
ទាក់ទិនបញ្ហានេះ នាយកវេទិកា អនាគត និងជាអ្នកតាមដានស្ថានការណ៍នយោបាយនៅកម្ពុជា លោក អ៊ូ វីរៈ មានប្រសាសន៍ថា ការដែលប្រធានគណបក្សប្រជាជនកម្ពុជា ចំអកឲ្យប្រធានគណបក្សសង្គ្រោះជាតិ នោះ គឺដោយសារ លោក ហ៊ុន សែន ជាតួអង្គសំខាន់ក្នុងការដោះស្រាយបញ្ហានេះ ទើបអាចបញ្ចប់បាន៖ «គន្លឹះ នៅលើ លោក ហ៊ុន សែន អ៊ីចឹងហើយបានជា លោក ហ៊ុន សែន ឡកឡឺយថា គណបក្សសង្គ្រោះជាតិ ដោះស្រាយមិនបាន គឺត្រូវហើយ មានន័យថា អ្នកដឹកនាំគណបក្សសង្គ្រោះជាតិ និងតុលាការ ពុំមានអំណាចដោះស្រាយរឿងនេះឡើយ។»
រហូតមកទល់ពេលនេះ មានសកម្មជន និងមន្ត្រីជាន់ខ្ពស់របស់គណបក្សសង្គ្រោះជាតិ ចំនួន ១៥នាក់ កំពុងជាប់ឃុំឃាំងក្នុងពន្ធនាគារព្រៃស។ ទាក់ទិននឹងរឿងរ៉ាវដែលកើតឡើងកន្លងមកទាំងនេះដែរ ត្រូវបាន លោក ហ៊ុន សែន មើលឃើញថា ដោយសារមេដឹកនាំគណបក្សប្រឆាំង ពូកែបង្កហេតុតាមរយៈយុទ្ធសាស្ត្រចាក់ក្រឡេក។ យ៉ាងណាក៏ដោយ គេនៅចាំអ៊ុតមើលថា តើសកម្មជន និងមន្ត្រីបក្សប្រឆាំង នឹងមានជោគវាសនារួចខ្លួនពីពន្ធនាគារ ក្រោមការសម្របសម្រួលនយោបាយ ឬយ៉ាងណា?
No comments:
Post a Comment