លោក សម រង្ស៊ី៖ សេចក្តីសម្រេចចិត្ត របស់ សភាអឺរ៉ុប គឺ ជាជោគជ័យមួយ
សមាជិក សភា សហភាព អឺរ៉ុប ចំនួន ៥៦៧ លើ ៧៥១នាក់ កាលពីថ្ងៃ ទី២៦ វិច្ឆិកា បានអនុម័ត លើសេចក្តី សម្រេចចិត្ត មួយ ស្តីពី ដំណោះស្រាយ បញ្ហា របស់ ប្រទេស កម្ពុជា នៅក្នុងកិច្ចប្រជុំ ពេញអង្គ របស់ខ្លួន ដែលធ្វើឡើង នៅឯទីក្រុង ស្ត្រាសបួរ (Strasbourg)ប្រទេស បារាំង។ សេចក្តីសម្រេចចិត្ តនេះ ដែលបានជម្រុញ ឲ្យរដ្ឋាភិបាល កម្ពុជា ទំលាក់ ការចោទប្រកាន់ លើរូប លោក សម រង្ស៊ី និង បញ្ចប់ ការយក ប្រព័ន្ធតុលាការ ធ្វើ ជាឧបករណ៍ នយោបាយ ដើម្បី កាត់ទោស សកម្មជន និងអ្នកនយោបាយ បក្សប្រឆាំង។ លោក សម រង្ស៊ី បានហៅ សេចក្តីសម្រេចចិត្ត នេះ ថា គឺ ជាជោគជ័យ មួយ។
លោក សម រង្ស៊ី ដែលពេលនេះ កំពុង ស្ថិតនៅ ប្រទេស បារាំង បានសរសេរ លើទំព័រ ហ្វេសបុក របស់លោក ថា, បន្ទាប់ ពីបាន នាំមក នូវជោគជ័យ សម្រាប់ ប្រទេស កម្ពុជា នៅសភា អឺរ៉ុប រួចមក, លោក បានធ្វើដំណើរ តាមរថយន្ត ទៅកាន់ទីក្រុង មូលូស (Mulhouse) ប្រទេស បារាំង កាលពីរសៀល ថ្ងៃទី២៦ វិច្ឆិកា ដើម្បី ទៅថ្វាយបង្គំ ព្រះសង្ឃ នៅវត្តខ្មែរ នៅទីនោះ, ព្រមទាំង ទៅសួរ សុខទុក្ខ សកម្មជន គណបក្សម្នាក់ ដែលកំពុង មានជំងឺ។ ក្រៅពីនេះ លោក សម រង្ស៊ី ក៏បានជួបជុំ ទទួលទានអាហារ ពេលល្ងាច ជាមួយសកម្មជន គណបក្ស សង្គ្រោះជាតិ ជាច្រើននាក់ ទៀត ដែលកំពុង រស់នៅ តំបន់ Alsace ប្រទេស បារាំង។
លោក សម រង្ស៊ី ដែលបានលុបចោលគម្រោងធ្វើដំណើរមកកាន់ប្រទេសកម្ពុជា កាលពីយប់ថ្ងៃទី១៦វិច្ឆិកា បានបង្វែរទិសធ្វើដំណើររបស់លោកពីប្រទេសកូរ៉េខាងត្បូងទៅកាន់ ប្រទេសហ្វីលីពីន និងបន្តដំណើរទៅកាន់ទីក្រុងស្ត្រាសបួរ (Strasbourg) ប្រទេសបារាំងកាលពីថ្ងៃទី២៤វិច្ឆិកា ដើម្បីស្តាប់លទ្ធផលនៃកិច្ចប្រជុំពេញអង្គរបស់សមាជិកសភាអឺរ៉ុបចំនួន ៧៥១រូប ស្តីពីដំណោះស្រាយបញ្ហាប្រទេសកម្ពុជា កាលពីថ្ងៃទី២៦វិច្ឆិកា។ សេចក្តីសម្រេចរបស់សភាសហភាពអឺរ៉ុបដែលមាន ១៤ចំណុច ស្តីពីដំណោះស្រាយលើបញ្ហាកម្ពុជា ដែលលោក សម រង្ស៊ី បានចាត់ទុកថា គឺជាជោគជ័យមួយ។
សេចក្តីសម្រេចកាលពីថ្ងៃទី២៦វិច្ឆិកានោះ បានកត់ត្រានូវព្រឹត្តិការណ៍ទាំងឡាយដែលបានកើតឡើងនៅក្នុងប្រទេស កម្ពុជា រាប់ចាប់តាំងពីការវាយអ្នកតំណាងរាស្រ្តគណបក្សប្រឆាំង, ការចាប់ខ្លួនសមាជិកព្រឹទ្ធសភាលោក ហុង សុខហួរ, ការដកតំណែងលោក កឹម សុខា ពីអនុប្រធានទី១នៃរដ្ឋសភា និងការចេញដីការចាប់ខ្លួនលោក សម រង្ស៊ីជាដើម។
សេចក្តីសម្រេចចិត្ត១៤ចំណុច ក៏បានអំពាវនាវ និងជម្រុញឲ្យរដ្ឋាភិបាលកម្ពុជា ទំលាក់ចោលការចោទប្រកាន់លើសកម្មជនគណបក្សប្រឆាំង និងសកម្មជនការពារសិទ្ធិមនុស្ស ហើយបញ្ចប់ការយកតុលាការធ្វើជាឧបករណ៍នយោបាយ ដើម្បីកាត់ទោសនិងធ្វើទុក្ខបុកម្នេញលើសកម្មជន និងអ្នកនយោបាយបក្សប្រឆាំងផ្សេងៗទៀត។
សភាអឺរ៉ុប គឺជាស្ថាប័ននីតិបញ្ញត្តិដ៍ធំមួយ តំណាងឲ្យសមាជិកសហភាពអឺរ៉ុបចំនួន២៨ប្រទេស ដែលជាម្ចាស់ជំនួយដ៏ធំរបស់កម្ពុជា។ ហើយនៅក្នុងកិច្ចប្រជុំកាលពីថ្ងៃទី២៦វិច្ឆិកានោះ សមាជិកសភាអឺរ៉ុបមួយចំនួន ក៏បានលើកឡើងពីការលប់ចោលជំនួយដល់ប្រទេសកម្ពុជា ប្រមាណជា៤៣៥លានដុល្លារអាមេរិកថែមទៀត។
រដ្ឋាភិបាលកម្ពុជា នៅមិនទាន់មានបញ្ចេញប្រតិកម្មផ្លូវការនៅឡើយទេ គិតត្រឹមយប់ថ្ងៃទី២៧វិច្ឆិកា ក៏ប៉ុន្តែអ្នកនាំពាក្យព្រឹទ្ធសភាកម្ពុជា បានចេញសេចក្តីថ្លែងការណ៍មួយ នៅថ្ងៃទី២៧វិច្ឆិកា ដោយបានសំដែងការសោកស្តាយយ៉ាងខ្លាំងចំពោះសេចក្តីសម្រេចចិត្តរបស់ សភាសហភាពអឺរ៉ុបកាលពីថ្ងៃទី២៦វិច្ឆិកា និងសមាជិកព្រឹទ្ធសភាអូស្រ្តាលីលោក Scott Ludiam ដែលបានជំរុញឲ្យរដ្ឋាភិបាល និងសភាកម្ពុជា ផ្តល់អភ័យឯកសិទ្ធិ និងលើកលែងការចោទប្រកាន់លើលោក សម រង្ស៊ី។ សេចក្តីថ្លែងការណ៍បានចាត់ទុកថា នោះគឺជាការជ្រៀតជ្រែកកិច្ចការផ្ទៃក្នុង និងរំលោភលើអធិបតេយ្យភាពរបស់កម្ពុជា៕
No comments:
Post a Comment