 |
| លោក នី ចរិយា ក្រោយចេញពីការសាកសួរបន្ថែមនៅសាលាដំបូង កាលពីពេលកន្លងទៅ |
គ្រួសារ មន្រ្តី សិទ្ធិមនុស្ស អាដហុក រកអន្តរាគមន៍ ពីព្រះមហាក្សត្រ និងលោក ហ៊ុន សែន
| ក្រុមគ្រួសារ មន្ត្រី សិទ្ធិមនុស្ស អាដហុក និងអគ្គលេខាធិការ រង គ.ជ.ប. បាននាំគ្នា ទៅដាក់ញត្តិ ទៅកាន់ ខុទ្ទការល័យ ព្រះមហាក្សត្រ និងនាយករដ្ឋមន្ត្រី នៅថ្ងៃ អង្គារនេះ សូម ឲ្យដោះលែង អ្នកជាប់ឃុំ ទាំង ៥នាក់ ខណៈ គម្រោងចរចា ផ្នែកនយោបាយ ដែលគេ រំពឹង ថា នឹងឈានទៅ ដោះស្រាយ បញ្ហា ទាំងនោះ ត្រូវ បានគណបក្ស កាន់អំណាច លុបចោល។
អស់រយៈពេលជិត១ឆ្នាំហើយ ដែល មន្ត្រីសិទ្ធិមនុស្សអាដហុក មានលោក ណៃ វ៉ង់ដា លោក យី សុខសាន្ត លោក នី សុខា លោកស្រី លឹម មុនី និងមន្ត្រីគ.ជ.ប លោក នី ចរិយា ត្រូវបានសាលាដំបូងរាជធានីភ្នំពេញសម្រេចឲ្យឃុំខ្លួនបណ្តោះសន្នទាក់ទងនឹងបទចោទសូកប៉ាន់សាក្សី ក្នុងសំណុំរឿងនាង ខុម ចាន់តារ៉ាទី ហៅស្រីមុំ ដែលត្រូវបានគេទម្លាយថាជាស្រីកំណាន់របស់លោក កឹម សុខា។
ក្នុងលិខិតបោះត្រាចូលទីស្តីការគណរដ្ឋមន្ត្រី នៅថ្ងៃទី២៤ មករានេះ ក្រុមគ្រួសារអ្នកជាប់ឃុំទាំង៥នាក់បានស្នើសុំឲ្យលោកនាយករដ្ឋមន្ត្រី ហ៊ុន សែន ជួយអន្តរាគមន៍ឲ្យទម្លាក់ការចោទប្រកាន់លើអ្នកទាំង៥។
កូនស្រី របស់ លោកស្រី លឹម មុន្នី គឺ កញ្ញា អ៊ុន ប៊ុណ្ណារី បានឲ្យវីអូឌីដឹងថាមូលហេតុដែលអ្នកពួកគេនាំគ្នាមកដាក់ញាត្តិសុំឲ្យមានការអន្តរាគមន៍នេះក៏ព្រោះតែការរងចាំចំណាត់ការពីតុលាការចេះតែអូសបន្លាយ និងបន្តឃុំខ្លួនម្តាយ រួមទាំងអ្នកផ្សេងទៀតនោះទាំងមិនទាន់រកឃើញកំហុសផងនោះ។ កញ្ញាបន្ថែមថា ចាប់តាំងពីតុលាការឃុំខ្លួនម្តាយរបស់ខ្លួនមក ក្រុមគ្រួសាររបស់នាងជួបការលំបាក ខណៈដែលកញ្ញាកំពុងនៅសិក្សានៅឡើយ។
កញ្ញា អ៊ុន ប៊ុណ្ណារី ថា៖ «រឿងនេះអ្នកដែលផ្តើមរឿងគាត់រួចចេញក្រៅឃុំគាត់រួចទោសអស់ហើយ ហើយយើងអត់បានទៅជួយអីឯកឧត្តមកឹម សុខា ហ្នឹងផង។ យើងអត់ដឹងអីផងយើងគ្រាន់តែជួយជនរងគ្រោះនាងស្រីមុំ ហ្នឹងមកប្តឹងហ្នឹង! ហេតុអីបានជាទុកពួកគាត់ទាំងអត់ទាន់មានបន្តនីតិវិធីអីអញ្ចឹង! ខ្ញុំដឹងថាអំណាចទាំងបីហ្នឹងផ្សេងគ្នាហើយ ប៉ុន្តែអត់មានអ្នកពន្លឿនអញ្ចឹងដូចជាតុលាការអត់មានអើពើ។ គ្រាន់តែថាមិនបាច់ឲ្យសម្តេចហ្នឹងគាត់លូកដៃអីទេគ្រាន់តែថាសុំឲ្យលោកជួយ ធ្វើម៉េចឲ្យប្រព័ន្ធតុលាការបន្តនីតិវិធីទៅបើគាត់រកឃើញថាមានកំហុសគាត់កាត់សេចក្តីទៅ ហើយបើរកមិនឃើញទេឲ្យគាត់ចេញមកមិនគួរទុកគាត់នៅឃុំរាប់ខែអញ្ចឹងទេ!»
ភរិយាអគ្គលេខាធិការរងគ.ជ.ប លោក នី ចរិយា គឺអ្នកស្រីយ៉ែម ចន្ថា មានប្រសាសន៍ថាការសម្រេចឡើងមកដាក់ញាត្តិនេះគឺជាការយល់ស្របគ្នារវាងក្រុមគ្រួសារអ្នកទាំង៥ ដោយថាមិនមានការផ្តល់យោបល់ឬគំនិតពីខាងណាឡើយ។ អ្នកស្រីថាអស់រយៈពេលជាច្រើនខែហើយដែលគ្រួសារអ្នកស្រីបានបែកគ្នា ដោយបន្ទុកគ្រួសារត្រូវធ្លាក់លើកអ្នកស្រីតែឯង។ អ្នកស្រីចាត់ទុកថា ការអូសបន្លាយឃុំខ្លួន អ្នកទាំង៥ ទាំងរកមិនឃើញកំហុសនេះវាជាភាពអយុត្តិធម៌ធ្លាក់មកលើអ្នកការពារសិទ្ធិមនុស្ស។
អ្នកស្រី ថា៖ «អ្នកប្តឹងនោះមិនដឹងថានៅណា នៅណីប្តឹងឆ្លងឆ្លើយគ្នារកខុសត្រូវអីវាមិនឃើញ វាមិនដឹងយ៉ាងម៉េចអ្នកណាចោទអ្នកណាអ្នកណាស្អី ដើមចោទមិនដឹងនៅឯណានៅឯណី អ្នកជាប់ឃុំនោះគិតតែពីជាប់ទៅ អ្នកចោទគិតតែពីចោទទៅ យូរៗទៅខ្ញុំ ភាពអត់ធ្មត់ដែលខំប្រឹងទ្រាំតាំងពីណាពីណីមក វាល្មមដូចថា ជិតដំបៅដើមទ្រូងហើយ ដូចវាដល់ពេលហើយជិតមួយឆ្នាំហើយយកមនុស្សទៅឃុំអញ្ចឹង។»
ប្រធានគណៈកម្មការចម្រុះ នៃខុទ្ទការល័យនាយករដ្ឋមន្ត្រីលោក ប៉ាល់ ចន្ទតារា មានប្រសាសន៍ថាលោកមិនទាន់ដឹងពីលិខិតសុំអន្តរាគមន៍នេះនៅឡើយទេ តែលោកថាតាមនីតិវិធីរាល់លិខិតដែលបានដាក់ចូលដល់ខុទ្ទកាល័យនាយករដ្ឋមន្ត្រីហើយ មន្ត្រីទទួលពាក្យនឹងរៀបចំទៅកាន់លោកនាយករដ្ឋមន្ត្រីដើម្បីសម្រេចជាចុងក្រោយ។
ក្នុងបទវិភាគជាមួយវីអូឌីកាលពីម្សិលមិញ អ្នកសិក្សាស្រាវជ្រាវបញ្ហាសង្គម និងជាអ្នកវិភាគនយោបាយ លោកបណ្ឌិត មាស នី បានចាត់ទុកការបន្តឃុំខ្លួនសកម្មជនការពារសិទ្ធិមនុស្ស និងមន្ត្រី គ.ជ.ប. ថាជាការបន្តឱបដុំភ្លើងមួយដុំនៅជាប់នឹងខ្លួនពីសំណាក់គណបក្សកាន់អំណាច ដែលអ្នកវិភាគរូបនេះថា បញ្ហានេះធ្វើឲ្យប៉ះពាល់ដល់ប្រជាប្រិយភាពរបស់គណបក្សប្រជាជនកម្ពុជា ក៏ដូចជារដ្ឋាភិបាលផងដែរ។ លោកបន្ថែមថាបក្សកាន់អំណាចគួរតែពិចារណាដោះស្រាយបញ្ហាទាំងនេះឲ្យចប់ ហើយងាកមកធ្វើផ្តោតបញ្ហាជាតិវិញជាជាងទុករឿងនេះដែលនាំឲ្យខ្លួនរងឈ្មោះអាក្រក់នោះទេ។
លោក មាស នី មានប្រសាសន៍ថា៖ «តាមខ្ញុំមើលទៅ ការបន្តការឃុំឃាំងនេះ វាធ្វើឲ្យស្ថានភាពនយោបាយទាំងក្នុងស្រុក និងក្រៅស្រុក កាន់តែអាក្រក់ថែមទៀត។ ខ្ញុំមិនដឹងថា រដ្ឋាភិបាលនៅឱបដុំភ្លើងមួយដុំហ្នឹងទុកធ្វើអីទៀត។ បើយើងមើលទោសទណ្ឌអីទៅ ក៏វាមិនត្រូវជាប់យូរបែបហ្នឹងទេ បើយើងប្រៀបធៀបជាមួយនឹងថ្លៃខ្សាច់ប៉ុន្មានរយលានដុល្លារ ដែលមិនមាននរណាខ្វល់ខ្វាយ ហើយតាមអ្វីដែលលេចចនូវសំឡេងឆ្លើយឆ្លើយគ្នារវាងថ្នាក់ដឹកនាំខ្មែរជាន់ខ្ពស់ទាក់ទងនឹងលុយរាប់លានដុល្លារទៀត ក៏គ្មាននរណាខ្វល់ខ្វាយលូកដៃទៅស្រាវជ្រាវរកលុយហ្នឹងឲ្យឃើញមក ហើយទុកការឃុំខ្លួនមន្ត្រីសិទ្ធិមនុស្ស និងគ.ជ.ប.ហ្នឹង ឲ្យនៅត្រាំត្រែងវេទនា។»
គួរបញ្ជាក់ផងដែរ ក្តីសង្ឃឹមក្នុងការមានការដោះលែងអ្នកទាំង៥នាក់នេះត្រូវបានបានលោក ស ខេង បង្ហើបម្តងកាលពីចុងឆ្នាំ២០១៦។ពេលនោះលោកថាអាចនឹងមានការចរចារជាមូយបក្សប្រឆាំងក្នុងការសម្របសម្រួលដោះលែងអ្នកទាំងនោះ តែនៅពេលថ្មីនេះលោកហ៊ុន សែន បានប្រកាសពីក្រៅប្រទេសវិញថាខ្លួនលែងចង់មានការចរចារជាមួយបក្សប្រឆាំងទៀតហើយ។ លោក ហ៊ុន សែន អះអាងថាបក្សប្រឆាំងតែងតែប៉ុនប៉ងប្រើប្រាស់ការចរចានេះ ដើម្បីដោះលែងមនុស្សមួយចំនួន ដែលលោក ហ៊ុន សែន ថាជាការបំពានដល់អំណាចតុលាការ៕
No comments:
Post a Comment