 |
| រូបគំនូរបង្ហាញពីទិដ្ឋភាពការសម្លាប់បណ្ឌិត កែម ឡី |
អង្គការ ជាង៦០ ទាមទារ ឲ្យស៊ើបអង្កេត ករណី បាញ់សម្លាប់ បណ្ឌិត កែម ឡី ឡើងវិញ
RFA / វិទ្យុ អាស៊ី សេរី | ២៣ មិនា ២០១៧
អង្គការ សង្គមស៊ីវិល ជាង៦០ ស្ថាប័ន ចេញសេចក្ដី ថ្លែងការណ៍ រួមគ្នា នៅថ្ងៃ ទី២៣ មីនា ទាមទារ ឲ្យបង្កើត គណៈកម្មការ ឯករាជ្យ ស៊ើបអង្កេត ករណី បាញ់សម្លាប់ បណ្ឌិត កែម ឡី ឡើងវិញ បន្ទាប់ ពីតុលាការ ក្រុងភ្នំពេញ សម្រេច ផ្ដន្ទាទោស ជនជាប់ចោទ អឿត អាង ហៅ ជួប សម្លាប់ ដាក់ពន្ធនាគារ ១ជីវិត។
នៅព្រឹកថ្ងៃទី២៣ មីនានេះ ចៅក្រមជំនុំជម្រះសាលាដំបូងរាជធានីភ្នំពេញ លោក លាង សំណាត់ សម្រេចចោទប្រកាន់ជនជាប់ចោទ ជួប សម្លាប់ ពីបទឃាតកម្មគិតទុកជាមុនលើបណ្ឌិត កែម ឡី និងកាន់កាប់អាវុធខុសច្បាប់ តាមមាត្រា២០០ និងមាត្រា៤៩០ នៃក្រមព្រហ្មទណ្ឌ។
សេចក្ដីថ្លែងការណ៍នោះ ចាត់ទុកការសម្រេចរបស់តុលាការថា ខ្វះតម្លាភាពក្នុងការស៊ើបអង្កេតលើការស្លាប់របស់បណ្ឌិត កែម ឡី នីតិវិធីជំនុំជម្រះខ្លីពេក និងខកខានក្នុងការស៊ើបអង្កេតឲ្យបានពេញលេញ ជុំវិញមូលហេតុ អ្នកសមគំនិត និងស្ថានភាពនៃការចាប់ខ្លួនជនជាប់ចោទ ជួប សម្លាប់។
ជនជាប់ចោទ ជួប សម្លាប់ គឺជាមនុស្សតែម្នាក់គត់ដែលត្រូវបានសមត្ថកិច្ចចាប់ខ្លួនភ្លាមៗ កាលពីថ្ងៃទី១០ ខែកក្កដា ២០១៦ នៅក្រោយការបាញ់សម្លាប់បណ្ឌិត កែម ឡី ក្នុងស្ដារម៉ាត (StarMart) ជាប់ស្ថានីយ៍ប្រេងឥន្ទនៈកាល់តិច (Caltex) កណ្ដាលរាជធានីភ្នំពេញ៕
No comments:
Post a Comment