 |
| លោក សម រង្ស៊ី អតីតប្រធានគណបក្សសង្គ្រោះជាតិ ផ្ដល់បទសម្ភាសន៍ដល់អាស៊ីសេរី កាលពីថ្ងៃទី១៣ ខែមិថុនា ឆ្នាំ២០១៧។ RFA |
បក្សប្រឆាំង សាទរ ចំពោះ ការប្រកាស លុបបម្រាម មិន ឲ្យលោក សម រង្ស៊ី ចូលស្រុក
RFA / វិទ្យុ អាស៊ី សេរី | ១៤ មិថុនា ២០១៧
អ្នកនាំពាក្យ គណបក្ស សង្រ្គោះជាតិ លោក យឹម សុវណ្ណ បានប្រកាស អបអរសាទរ ភ្លាមៗ នៅថ្ងៃ ទី១៤ ខែមិថុនា ក្រោយពេល រដ្ឋាភិបាល បានសម្រេច លុបចោល លិខិតលេខ ១៥១ ចុះថ្ងៃ ទី១២ ខែតុលា ឆ្នាំ២០១៦ ហាម មិនឲ្យ ក្រុមហ៊ុន អាកាសចរណ៍ ទាំងអស់ ដឹកលោក សម រង្ស៊ី វិលចូលស្រុក វិញ។
លោក យឹម សុវណ្ណ អះអាងថា ការសម្រេចរបស់រដ្ឋាភិបាលនេះ គឺជាសញ្ញាវិជ្ជមានមួយសម្រាប់គណបក្សសង្រ្គោះជាតិ។ ទោះបីជាយ៉ាងនេះក្ដី លោក យឹម សុវណ្ណ មិនធ្វើអត្ថាធិប្បាយអ្វីច្រើនក្រៅពីនេះទេ ដូចជាឆ្លើយសំណួរថា តើគណបក្សសង្រ្គោះជាតិ មានចរចាអ្វីពីក្រោយខ្នងជាមួយរដ្ឋាភិបាលចំពោះករណីលោក សម រង្ស៊ី ឬទេ ហើយថាតើលោក សម រង្ស៊ី នឹងវិលចូលស្រុកវិញនៅពេលណាជាដើម។
ទីស្ដីការគណៈរដ្ឋមន្ត្រីបានចេញលិខិតមួយច្បាប់នៅថ្ងៃទី១៤ ខែមិថុនា ដែលចុះហត្ថលេខាដោយលោក តឹករ៉េត សំរេច រដ្ឋលេខាធិការនៃទីស្ដីការគណៈរដ្ឋមន្ត្រី លុបចោលលិខិត ១៥១ ដែលជាចំណាររបស់លោកនាយករដ្ឋមន្ត្រី ហ៊ុន សែន បញ្ជាឲ្យអគ្គនាយកដ្ឋានអន្តោប្រវេសន៍បង្ការទប់ស្កាត់ទុកជាមុនមិនអនុញ្ញាតឲ្យក្រុមហ៊ុនអាកាសចរណ៍ណាមួយដឹកលោក សម រង្ស៊ី វិលចូលស្រុកវិញ ដោយអាជ្ញាធរមានសមត្ថកិច្ចមិនបានដឹងជាមុនឡើយ។
ការប្រកាសរបស់រដ្ឋាភិបាលលុបចោលបម្រាមនេះវិញ គឺធ្វើឡើងមួយថ្ងៃបន្ទាប់ពីលោក សម រង្ស៊ី ប្រាប់អាស៊ីសេរីថា លោកនឹងវិលចូលកម្ពុជា វិញនៅឆ្នាំ២០១៨។
លោក សម រង្ស៊ី បានថ្លែងនៅក្នុងវេទិការអ្នកស្តាប់វិទ្យុអាស៊ីសេរី កាលពីយប់ថ្ងៃអង្គារ ទី១៣ មិថុនា ថា លោកបេ្តជ្ញាចិត្តវិលត្រឡប់ទៅប្រទេសកម្ពុជា ដើម្បីប្រកួតប្រជែងតំណែងនាយករដ្ឋមន្ត្រីជាមួយនឹងលោក ហ៊ុន សែន ប្រធានគណបក្សប្រជាជនកម្ពុជា នៅក្នុងការបោះឆ្នោតជាតិ ឆ្នាំ២០១៨ ខាងមុខ។
លោក សម រង្ស៊ី ស្នើឲ្យលោកនាយករដ្ឋមន្ត្រី ហ៊ុន សែន ដកបទបញ្ជាទាំងឡាយដែលហាមលក់សំបុត្រយន្តហោះឲ្យលោកក្នុងការធ្វើដំណើរទៅកាន់ប្រទេសកម្ពុជា ដើម្បីឲ្យលោកចូលរួមប្រកួតប្រជែងការបោះឆ្នោតសកលឆ្នាំ២០១៨។
No comments:
Post a Comment