 |
| លោក ថិត យ៉ូហូ សមាជិកសភាអាមេរិក ផ្ដល់បទសម្ភាសន៍ដល់អាស៊ីសេរី នៅថ្ងៃទី ០៨ ខែឧសភា ឆ្នាំ២០១៨។ |
តំណាងរាស្ត្រ អាមេរិក ថា ខ្លួន កំពុង បង្កើនល្បឿន ដាក់ទណ្ឌកម្ម បង្កក ទ្រព្យ អ្នកជំនួញ ស្និទ្ធ នឹងរបប លោក ហ៊ុន សែន
RFA / វិទ្យុ អាស៊ី សេរី | ១៩ កក្កដា ២០១៨
RFA / វិទ្យុ អាស៊ី សេរី | ១៩ កក្កដា ២០១៨
ស្ដាប់ ឬទាញយកសំឡេង
តំណាងរាស្ត្រសហរដ្ឋអាមេរិក ពីខាងគណបក្សសាធារណរដ្ឋ អះអាងថា សហរដ្ឋអាមេរិកកំពុងបង្កើនល្បឿនដាក់ទណ្ឌកម្ម បង្កកទ្រព្យសម្បត្តិក្រុមអ្នករកស៊ីធំៗដែល មានទំនាក់ទំនងជិតស្និត នឹងរបបលោក ហ៊ុន សែន។
ប្រធានអនុគណៈកម្មាធិការកិច្ចការបរទេសទទួលបន្ទុកតំបន់ អាស៊ី និងប៉ាស៊ីហ្វិក និងជាតំណាងរាស្ត្រសហរដ្ឋអាមេរិក ពីខាងគណបក្សសាធារណរដ្ឋលោក ថិត យ៉ូហូ (Ted Yoho) បញ្ជាក់ថា ក្រុមអ្នកជំនួញកំពូលៗនៅកម្ពុជាសព្វថ្ងៃ កំពុងជួយជ្រោមជ្រែងដល់របបដឹកនាំរបស់លោក ហ៊ុន សែន និងបានចូលដៃចូលជើងក្នុងការបំផ្លាញមូលដ្ឋានគ្រឹះនៃលទ្ធិប្រជាធិបតេយ្យនិង ដំណើរការបោះឆ្នោតបែបក្លែងក្លាយបែបអាមាសនៅកម្ពុជា។ លោកថា ពួកគេនឹងត្រូវប្រឈមការដាក់ទណ្ឌកម្មបង្កក ទ្រព្យសម្បត្តិ និងបិទទិដ្ឋាការមិនឲ្យជាន់ទឹកដីអាមេរិកតទៅទៀត។
សូមតាមដានបទសម្ភាសន៍តាមទូរស័ព្ទរបស់លោក តាំង សារ៉ាដា ជាមួយលោក ថិត យ៉ូហូ ដូចតទៅ៖
សារ៉ាដា៖ សូមជម្រាបសួររលោកតំណាងរាស្ត្រ ថិត យ៉ូហូ!
ថិត៖ បាទខ្ញុំមានកិត្តិយសណាស់ដែលបានជជែកជាមួយលោក ក្នុងប្រធានដ៏មានសារៈសំខាន់!
សារ៉ាដា៖ ការបោះឆ្នោតជាតិនៅកម្ពុជាកាន់តែខិតជិតចូលមកដល់ទៅហើយ ខណៈសេចក្ដីព្រាងច្បាប់លេខ H.R. 5754 ស្ដីពីលទ្ធិប្រជាធិបតេយ្យនៅកម្ពុជាឆ្នាំ២០១៨ ដើម្បីដាក់សម្ពាធលើរបបលោក ហ៊ុន សែន ឲ្យកែប្រែស្ថានការណ៍វិលមករកភាពប្រក្រតីវិញនោះ នៅស្ថិតក្នុងការរង់ចាំការអនុម័តឲ្យចូលជាធរមាននៅឡើយ។ តើសេចក្ដីព្រាងច្បាប់នេះអាចនឹងអនុម័តនៅពេលណាជាក់លាក់ដែរទេ?
ថិត៖ ជាអកុសលណាស់សេចក្ដីព្រាងច្បាប់នេះនឹងអាចត្រូវអនុម័តនៅក្រោយការបោះឆ្នោតនៅកម្ពុជា។ សេចក្ដីព្រាងច្បាប់នេះ យើងបានអនុម័តនៅថ្នាក់គណៈកម្មាធិការកិច្ចបរទេសរបស់យើងរួចហើយ ហើយនៅពេលនេះប្រធានគណៈកម្មាធិការកិច្ចការបរទេសនៃសភាសហរដ្ឋអាមេរិក លោក អេដ រ៉យ កំពុងពន្លឿនការអនុម័តសេចក្ដីព្រាងច្បាប់នេះក្នុងសភាពេញអង្គថែមទៀត។ ដូច្នេះយើងក៏ចង់អោយសេចក្ដីព្រាងច្បាប់អនុម័តចូលជាធរមានកាន់តែលឿនតាមដែលអាចធ្វើទៅបាន ដើម្បីដាក់ទណ្ឌកម្មបង្កកទ្រព្យសម្បត្តិ និងបិទទិដ្ឋាការដល់ក្រុមមន្ត្រីអាក្រក់របស់លោក ហ៊ុន សែន។
សារ៉ាដា៖ បាទលោក តំណាងរាស្ត្រ ថិត យូហូ របបលោក ហ៊ុន សែន នៅពេលនេះកំពុងព្រមានការចោទប្រកាន់ពីបទសល្មើសព្រហ្មទណ្ឌទៅលើជនទាំងឡាយណាដែលអំពាវនាវមិនឲ្យពលរដ្ឋចេញទៅបោះឆ្នោត។ តើលោកមានប្រតិកម្មអ្វីដែរទេចំពោះបញ្ហានេះ?
ថិត៖ អ្វីដែលលោកកំពុងនិយាយនេះគឺជាការឆ្លើយតបរបស់ជនផ្ដាច់ការដែលជ្រកក្រោយស្លាកប្រជាធិបតេយ្យ ហើយប្រកាសអំពីការបោះឆ្នោត ដោយសេរី ត្រឹមត្រូវ និងយុត្តិធម៌។ ប្រសិនបើលោក ហ៊ុន សែន ជឿជាក់លើលទ្ធិប្រជាធិបតេយ្យមែននោះ គាត់ត្រូវតែអនុញ្ញាតឲ្យពលរដ្ឋមានអំណាច និងសេរីភាពក្នុងការរិះគន់រដ្ឋាភិបាល។ ហេតុដូច្នេះបានជាលោក ហ៊ុន សែន មិនមែនជាមនុស្ស ដែលទទួលជោគជ័យក្នុងឆាកជីវិតនោះឡើយ បើទោះបីគាត់ជាមនុស្សដែលកំពុងរស់នៅលើគំនរមាសប្រាក់ក៏ដោយ គាត់មិនអាចមានឈ្មោះមេដឹកនាំដ៏ល្អ ក្នុងប្រវត្តិសាស្ត្រនោះទេ។ ប្រសិនបើ មិនមានពលរដ្ឋចេញទៅបោះឆ្នោតច្រើនទេ នោះមានន័យថាពួកគេ មិនទទួលភាពស្របច្បាប់នៃការបោះឆ្នោតនោះឡើយ ហេតុដូច្នេះ ហើយបានជាគាត់ចង់ឲ្យពលរដ្ឋចេញទៅបោះឆ្នោតខ្លាំងណាស់។ ប៉ុន្តែពលរដ្ឋខ្មែរយល់ដឹងច្បាស់ណាស់ថា ការបោះឆ្នោតនោះជាការបោះឆ្នោតក្លែងក្លាយ និងជាការបោះឆ្នោតដ៏អាមាស់មួយ ហេតុដូច្នេះ បានជាគាត់បង្ខំឲ្យពលរដ្ឋទៅបោះឆ្នោត។
សារ៉ាដា៖ ពលរដ្ឋខ្មែរជាច្រើនកំពុងមានអារម្មណ៍តានតឹងជាមួយភាពស្ងៀមស្ងាត់របស់រដ្ឋាភិបាលអាមេរិកាំង ខណៈលោក ហ៊ុន សែន កំពុងធ្វើយុទ្ធនាការឃោសនាបោះឆ្នោតយ៉ាងស្វិតស្វាញដោយគ្មានវត្តមានរបស់គណបក្សប្រឆាំង។ តើលោកយល់យ៉ាងណាដែរ?
ថិត៖ ពិតប្រាកដហើយមានអ្នកខ្លះបានស្ងៀមស្ងាត់លើបញ្ហានេះមែន ប៉ុន្តែ គណៈកម្មាធិការរបស់យើងបានធ្វើសកម្មភាពជាច្រើនណាស់ ហើយរហូតមកទល់ពេលនេះយើងបានសរសេរលិខិតច្បាប់មួយចំនួនថែមទៀត។ ហើយយើងនឹងបង្កើនការដាក់ទណ្ឌកម្មថែមទៀតដល់ របបលោក ហ៊ុន សែន។ នៅពេលដែលសេចក្ដីព្រាងច្បាប់លេខ ៥៧៥៤ ចូលជាធរមានហើយ ពេលនោះលោកបានឃើញការដាក់ទណ្ឌកម្មរបស់យើងបន្ថែមទៀត ដល់ក្រុមមេដឹកនាំនៃប្រទេសកម្ពុជា។ យើងនឹងស្វែងរកការបញ្ឈប់ពាណិជ្ជកម្មដល់ទៅ៦២% ជាមួយកម្ពុជាថែមទៀត។ ជាងនេះទៅទៀតយើងនឹងបញ្ឈប់រាល់ពាណិជ្ជកម្មទាំងអស់ ជាមួយកម្ពុជារហូតដល់មានការធ្វើឲ្យឡើងវិញនូវលទ្ធិប្រជាធិបតេយ្យ សិទ្ធិមនុស្ស នីតិរដ្ឋ និងរដ្ឋធម្មនុញ្ញរបស់ខ្លួននោះ។
សារ៉ាដា៖ តើសហរដ្ឋអាមេរិកនឹងទទួលស្គាល់លទ្ធផលពីការបោះឆ្នោត នេះដែរទេ ប្រសិនបើការបោះឆ្នោតនេះធ្វើឡើងគ្មានវត្តមាន របស់គណបក្សសង្គ្រោះជាតិដែលជាគណបក្សប្រឆាំងដ៏ធំមួយ នៅកម្ពុជា ត្រូវបានរបបលោក ហ៊ុន សែន រំលាយចេញពីបញ្ជីនយោបាយនោះ?
ថិត៖ តាមខ្ញុំដឹងគឺគណៈកម្មាធិការរបស់ខ្ញុំ នឹងមិនទទួលស្គាល់ការបោះឆ្នោតនេះ ប៉ុន្តែយើងទទួលស្គាល់ការបោះឆ្នោតនេះថា ជាការបោះឆ្នោតដ៏អាម៉ាស់ ជាការបោះឆ្នោតកែ្លងក្លាយ និងជាការបោះឆ្នោត ខុសច្បាប់ទៅវិញ។ ជាថ្មីម្តងទៀតខ្ញុំចង់បញ្ជាក់ថា នៅពេលដែលអ្នកឯងចាប់ខ្លួនលោក កឹម សុខា មេដឹកនាំបក្សប្រឆាំង ដាក់ពន្ធនាគារ ដោយសារខ្លាចប្រកួតការបោះឆ្នោតចាញ់គាត់នោះ គឺអ្នកឯងកំពុង តែរឹតត្បិតឆន្ទៈរបស់ពលរដ្ឋហើយ ដូច្នេះខ្ញុំមិនអាចទទួលស្គាល់ភាពស្របច្បាប់នៃការបោះឆ្នោតនេះឡើយ។
សារ៉ាដា៖ ប្រសិនបើរបបលោក ហ៊ុន សែន អនុញ្ញាតឲ្យគណបក្សសង្គ្រោះជាតិ ចូលរួមការបោះឆ្នោត ប៉ុន្តែ ស្របពេលជាមួយគ្នានេះលោក ហ៊ុន សែន បានកែប្រែច្បាប់បោះឆ្នោតដែលអាចឲ្យមាន ការរំលាយគណបក្សនយោបាយណាដែលរបបក្រុងភ្នំពេញ យល់ថា មានប្រៀបលើគណបក្សកាន់អំណាចនោះ ចំពោះលោកតើយល់យ៉ាងណាដែរ?
ថិត៖ ការលើកឡើងនេះត្រឹមត្រូវហើយ ប្រសិនបើមានការអនុញ្ញាតឲ្យគណបក្សសង្គ្រោះជាតិមានវត្តមានក្នុងប្រទេស ហើយមិនអនុញ្ញាតធ្វើជាបេក្ខភាពប្រកួតប្រជែងពិតប្រាកដនោះ វាប្រៀបបីដូចជាមាន សំបុត្រចូលមើលកុនហើយ ប៉ុន្តែគេមិនអោយចូលក្នុងរោងវិញនោះ។ បញ្ហានេះគឺគ្រាន់តែជាបោះឆ្នោតក្លែងក្លាយដដែលហ្នឹង ហើយយើងក៏មិនចាញ់ល្បិចកលអ៊ីចឹងដែរ។
សារ៉ាដា៖ ក្រសួងរតនាគារជាតិរបស់អាមេរិកកាលពីខែមិថុនាបាន បង្កក ទ្រព្យសម្បត្តិមេអង្គរក្សរបស់លោក ហ៊ុន សែន គឺលោក ហ៊ីង ប៊ុនហៀង ហើយថែមទាំងហាមមន្ត្រីរូបនេះមិនអោយចូលសហរដ្ឋអាមេរិកថែមទៀត។ តើរហូតមកទល់ពេលនេះមានមន្ត្រីជាន់ខ្ពស់នៃ របបលោក ហ៊ុន សែន ណាទៀតទេ ដែលអាចប្រឈមនឹងការដាក់ទណ្ឌកម្មបែបនេះ?
ថិត៖ បាទនេះសំណួរដ៏គួរឲ្យចាប់អារម្មណ៍មែនទែន ពីព្រោះយើងទើបតែជជែកអំពីបញ្ហានេះជាមួយក្រុមតំណាងឲ្យសហគមន៍ខ្មែរកាលពីម្សិលមិញ។ យើងមានបញ្ជីឈ្មោះមួយចំនួនដែលជាក្រុមឧត្តម សេនីយ៍យោធា និងក្រុមអ្នកជំនួញមានទំនាក់ទំនងជិតស្និទ្ធនឹងរបបលោក ហ៊ុន សែន។ អ្វីដែលយើងចង់ធ្វើនៅពេលនេះគឺយើងនឹងដាក់ទណ្ឌកម្ម ដល់ក្រុមអ្នកជំនួញដែលមានអំណាច និងមានលុយច្រើន សន្ធឹកសន្ធាប់ហើយកំពុងជ្រោមជ្រែងដល់របបដឹកនាំរបស់លោក ហ៊ុន សែន ហើយលោក ហ៊ុន សែន កំពុងការពារអ្នកជំនួញទាំងនោះ។ ដោយសារមានមនុស្សអាចដាក់សម្ពាធ ឬមានឥទ្ធិពលលើលោក ហ៊ុន សែន ដូច្នេះហើយបានជាយើងចង់ដាក់ទណ្ឌកម្មមនុស្សទាំងនោះ។ យើងមានបញ្ជីឈ្មោះអ្នកទាំងនោះហើយ ហើយខ្ញុំនៅមិនទាន់អាចបង្ហាញ ឈ្មោះពួកគេបាននៅឡើយទេ ដោយសារតែយើងកំពុងធ្វើកិច្ចការនេះជាមួយក្រសួងការបរទេស និងក្រសួងរតនាគារជាតិថែម ទៀត។
សារ៉ាដា៖ ទោះបីជាលោកមិនទាន់បញ្ហាញឈ្មោះពួកគេក៏ដោយ តើលោកមានដឹងថាក្រុមអ្នករកស៊ីលំដាប់កំពូលៗទាំងនោះមានចំនួនប៉ុន្មាននាក់ដែរទេ ដែលសហរដ្ឋអាមេរិកកំពុងរៀបចំដាក់ឈ្មោះពួកគេ ទៅក្នុងបញ្ជីខ្មៅក្នុងការដាក់ទណ្ឌកម្មនោះ?
ថិត៖ ឥឡូវនេះយើងមានឈ្មោះពួកគេប្រហែលពី១០ ទៅ២០នាក់ ប៉ុណ្ណោះ។
សារ៉ាដា៖ ពាក់ព័ន្ធនឹងបញ្ហានេះដែរ ទូរទស្សន៍ Ajazeera កាលពីពេល ថ្មីៗនេះបានរកឃើញអគ្គនាយកដ្ឋានពន្ធដារក្នុងប្រទេសកម្ពុជា គឺលោក គង់ វិបុល ដែលមានប្រាក់ខែជាង ១ពាន់ដុល្លារកំពុងជាប់ចោទមានមុខជំនួញរកស៊ីមិនស្របច្បាប់នៅកម្ពុជា និងអូស្ត្រាលី ក្នុងតម្លៃរាប់លានដុល្លារ។ តើលោក គង់ វិបុល មានស្ថិតក្នុងបញ្ជីរបស់លោកដែរទេ?
ថិត៖ ខ្ញុំមិនទាន់អាចប្រាប់បាននៅឡើយទេ ប៉ុន្តែនៅពេលដែលកិច្ចការនេះធ្វើបានជោគជ័យហើយ ខ្ញុំនឹងរីករាយចែកចាយដល់លោក។
សារ៉ាដា៖ បាទសូមអគុណច្រើនលោក តំណាងរាស្ត្រ ថិត យ៉ូហូ!
No comments:
Post a Comment